قازاق رەجيسسەرى شىڭعىس ايتماتوۆ اتىنداعى حالىقارالىق سىيلىقتىڭ لاۋرەاتى اتاندى
بۇل وقيعانى ءبىر جاعىنان قازاق پەن قىرعىزدىڭ باۋىرمالدىق بەلگىسى رەتىندە دە قابىلداۋعا بولار ەدى. سوڭعى جىلدارى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى الاتاۋدىڭ ارعى بوكتەرىندەگى قىرعىز ەلىنە ءبىر ەمەس, بىرنەشە رەت بارىپ, ونەردەن كوپىر سالدى. ايىرقالپاقتى باۋىرلاردىڭ ەلىندە قازاقستاننىڭ مادەني كۇندەرى وتۋىنە تەاتر قال-قادەرىنشە ۇلەسىن قوستى.
قازاق رەجيسسەرى شىڭعىس ايتماتوۆ اتىنداعى حالىقارالىق سىيلىقتىڭ لاۋرەاتى اتاندى
بۇل وقيعانى ءبىر جاعىنان قازاق پەن قىرعىزدىڭ باۋىرمالدىق بەلگىسى رەتىندە دە قابىلداۋعا بولار ەدى. سوڭعى جىلدارى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى الاتاۋدىڭ ارعى بوكتەرىندەگى قىرعىز ەلىنە ءبىر ەمەس, بىرنەشە رەت بارىپ, ونەردەن كوپىر سالدى. ايىرقالپاقتى باۋىرلاردىڭ ەلىندە قازاقستاننىڭ مادەني كۇندەرى وتۋىنە تەاتر قال-قادەرىنشە ۇلەسىن قوستى.
جۋىردا بىشكەك قالاسىندا جازۋشى شىڭعىس ايتماتوۆتىڭ 85 جىلدىعىنا وراي IV حالىقارالىق ART-ORDO اتتى تەاتر فەستيۆالى بولىپ ءوتتى. فەستيۆالعا ت.ابدۋمومۋنوۆ اتىنداعى قىرعىز ۇلتتىق اكادەميالىق دراما تەاترى, جامبىل وبلىستىق ورىس دراما تەاترى, ءنوۆوسىبىر مەملەكەتتىك تەاتر ينستيتۋتى ۇجىمى, ب.قىدىكەەۆ اتىنداعى بىشكەك تەاترى, ىستامبۇلدىق «ادانا داۆلەت» جانە ەلىمىزدىڭ ع.مۇسىرەپوۆ اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق قازاق تەاترى قاتىسقان بولاتىن.
فەستيۆال بارىسىندا ەلىمىزدىڭ بەلگىلى رەجيسسەرى, ستسەناريست تالعات تەمەنوۆ حالىقارالىق شىڭعىس ايتماتوۆ اتىنداعى سىيلىقپەن ماراپاتتالدى. جوعارى دەڭگەيدەگى جۇلدەنى قىرعىز رەسپۋبليكاسىنىڭ مادەنيەت, اقپارات جانە تۋريزم ءمينيسترى سۇلتان راەۆ تابىس ەتتى.
ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا سوڭعى 2-3 جىل كولەمىندە تالعات تەمەنوۆتىڭ ساحنالاۋىمەن شىڭعىس ايتماتوۆتىڭ «قىزىل ورامالدى شىنارىم» ەكى ءبولىمدى دراماسى, «تەڭىز جاعالاي جۇگىرگەن تارعىل توبەت» تراگەدياسى قويىلدى.
قازىرگى كۇندەرى ت.تەمەنوۆ ءوز قالامىنان تۋعان «سۋداعى ءىز...» 24 سەريالى كوركەمفيلمىن «قازاقستان» تەلەارناسىنىڭ ارنايى تاپسىرىسى بويىنشا ءتۇسىرۋ ۇستىندە.
ايناش ەسالي,
«ەگەمەن قازاقستان».
الماتى.
