كاسپي تەڭىزىن زەرتتەۋدەگى حالىقارالىق ىنتىماقتاستىقتى دامىتۋ, انتروپوگەندىك جۇكتەمەلەردى باعالاۋ جانە ەكومونيتورينگ, سونىمەن قاتار كاسپي ماڭى ەلدەرىنىڭ تۇراقتى دامۋى ءۇشىن ەكولوگيالىق ءبىلىم بەرۋدى ينتەگراتسيالاۋ ماقساتىندا وتكىزىلگەن كونفەرەنتسيادا كاسپي تەڭىزىنىڭ بۇگىنگى تاڭداعى وتكىر جانە وزەكتى ماسەلەلەرى تالقىلاندى.
كونفەرەنتسيانى قۇتتىقتاۋ سوزىمەن ۋنيۆەرسيتەت رەكتورى ب.ب. احمەتوۆ اشىپ, مەرەيتوي يەسىنىڭ عىلىمدا جەتكەن جەمىستى تابىستارى مەن ونەگەلى ىستەرىنە توقتادى. سونىمەن بىرگە وزىق عىلىمنىڭ تەتىكتەرىن يگەرگەن ارداگەر عالىمىمىزدى ماڭعىستاۋ وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى د.ت. قۇسبەكوۆ جانە «كاسپي ماڭى مەملەكەتتەرىنىڭ مەملەكەتتىك ۋنيۆەرسيتەتتەرى قاۋىمداستىعى مەن زەرتتەۋ ورتالىقتارى» رەكتورلارى قۇتتىقتاپ, جىلى لەبىزدەرىن ءبىلدىردى. كونفەرەنتسيا بارىسىندا تيۋمەن يندۋستريالدى ۋنيۆەرسيتەتىنىڭ پروفەسسورى ۆ.ن. پەرمياكوۆ, باكۋ مەملەكەتتىك ۋنيۆەرسيتەتىنىڭ "كاسپي" عىلىمي-زەرتتەۋ جانە اقپاراتتىق ورتالىعىنىڭ ديرەكتورى ش.ن. يسمايلوۆ, رعا «شيرشوۆ اتىنداعى وكەانولوگيا ينستيتۋتى» ديرەكتورىنىڭ عىلىمي-ۇيىمداستىرۋشىلىق جۇمىستار جونىندەگى ورىنباسارى پ.و. زاۆيالوۆ, ەگەي ۋنيۆەرسيتەتىنىڭ پروفەسسورى ا. يبراگيموۆ سىندى الەمنىڭ ءار تۇكپىرىنەن جينالعان, عىلىمدا ۇلكەن جەتىستىكتەر مەن زور تابىستارعا يە عالىمدار باياندامالارىن جاسادى. كونفەرەنتسيادا كاسپي ماڭى ەلدەرىنىڭ ەكونوميكاسىن جاڭعىرتۋ مەن وڭىرلىك دامىتۋدىڭ ەكولوگيالىق-ەكونوميكالىق ماسەلەلەرى قاراستىرىلىپ, كاسپي ماڭى ەلدەرىنىڭ جوعارى وقۋ ورىندارىنىڭ, عىلىمي مەكەمەلەر مەن ۇەۇ-نىڭ كاسپي تەڭىزىنىڭ ەكولوگيالىق مونيتورينگىن ۇيىمداستىرۋ جولدارى تالقىلاندى.
مەرەكەلىك شارا بارىسىندا ۋنيۆەرسيتەتىمىزدىڭ ءوسىپ-وركەندەۋىنە, ونداعى عىلىم سالاسىنىڭ دامۋىنا قوسقان ۇلەسى ەسكەرىلە وتىرىپ, ارداگەر عالىمىمىزعا ارناپ ۋنيۆەرسيتەتىمىزدىڭ قابىرعاسىنان «پروفەسسور گ.كەنجەتاەۆ اتىنداعى كابينەتى» اشىلدى. جاڭا كابينەتتىڭ اشىلۋى جاڭا عىلىمي باعىتتارعا سەرپىن بەرىپ, كوپتەگەن زەرتتەۋلەردىڭ جۇرگىزىلۋىنە سەبەپ بولماق.
تەحنيكا عىلىمدارىنىڭ دوكتورى, پروفەسسور گ.كەنجەتاەۆ «قازاق پوليتەحنيكالىق ينستيتۋتىن» «ونەركاسىپتىك جانە ازاماتتىق قۇرىلىس» ماماندىعى بويىنشا بىتىرگەن, ءومىرىن عىلىممەن ورنەكتەگەن ۇلاعاتتى ۇستاز 1975-1986 جىلدار ارالىعىندا كاسپي ماڭى قۇرىلىس باسقارماسىندا قىزمەت اتقارعان.
-عىلىمي جاڭالىقتاردى اشۋدا تاباندى ىزدەنىستەر ارقىلى تالاي بەلەستەردى باعىندىرعان, وڭىرىمىزدەگى عىلىمنىڭ نەگىزىن قالاعان ىزدەنۋشى - ءبىلىم بەرۋ مەن عىلىمي زەرتتەۋ باعىتىن 1987 جىلدىڭ 1-ءشى قىركۇيەگىندە ش.ەسەنوۆ اتىنداعى كمتيۋ-دە اعا وقىتۋشى قىزمەتىنەن باستاعان. دەكاننىڭ ورىنباسارى, «قولدانبالى ەكولوگيا» كافەدراسىنىڭ مەڭگەرۋشىسى, ينجەنەرلىك فاكۋلتەتىنىڭ دەكانى, ينجەنەرلىك-تەحنيكالىق ينستيتۋتىنىڭ ديرەكتورى لاۋازىمدارىندا قىزمەت اتقارىپ ءجۇرىپ, ءتۇرلى جەتىستىكتەرگە قول جەتكىزگەن عالىم, بۇگىنگى تاڭدا, ۋنيۆەرسيتەت جانىنداعى عىلىمي-زەرتتەۋ ينستيتۋتىنىڭ ديرەكتورى بولىپ تابىلادى, دەيدى شاكىرتى, «ەكولوگيا جانە گەولوگيا» كافەدراسىنىڭ اعا وقىتۋشىسى ل.س.تايجانوۆا.
«ەكولوگيا» ماماندىعى بويىنشا قر جاك پروفەسسورى گ. ج. كەنجەتاەۆ وسى باعىتتا 200-دەن استام عىلىمي ماقالالار, 6 پاتەنت, 3 مونوگرافيا, 10-نان استام وقۋ قۇرالدارىن جارىققا شىعارعان. قر بعم گرانتتىق قارجىلاندىرۋ جوباسىنىڭ عىلىمي جەتەكشىسى, ماڭعىستاۋ وبلىسىنىڭ شەگىندەگى كاسپي جاعالاۋىنىڭ قازىرگى جاعدايى بويىنشا بىرنەشە عىلىمي-زەرتتەۋ جوبالارىنىڭ ورىنداۋشىسى:
- مۇناي-گاز كەشەنىنىڭ ايماقتىڭ تابيعي ورتاسىنا اسەرىن زەرتتەۋ;
- ماڭعىستاۋ وبلىسىنداعى ەكولوگيالىق جاعدايدى جاقسارتۋ بويىنشا زەرتتەۋ جۇرگىزۋ جانە ۇسىنىستار ازىرلەۋ;
- كاسپي تەڭىزىن زەرتتەۋ جانە تەڭىز سۋىن تۇششىلاندىرۋ مەن اعىزىندى سۋلاردى تازارتۋ جونىندەگى ازىرلەنىمدەر جاساقتاۋ باعىتتارىندا عىلىمي قىزمەتىن اتقارادى.
