قىزىلوردا سوتى جاپپاي توبەلەس كەزىندە قۇرداسىن ولتىرگەن جەتكىنشەككە قاتىستى ۇكىمىن شىعاردى.
قىزىلوردا سوتى جاپپاي توبەلەس كەزىندە قۇرداسىن ولتىرگەن جەتكىنشەككە قاتىستى ۇكىمىن شىعاردى.
بۇل وقيعا بيىلعى جىلعى وقۋ ءبىتىرۋ كەشىنەن كەيىن ورىن الدى. قىزىلوردا قالاسى كوشەلەرىنىڭ بىرىندە ەكى مەكتەپ وقۋشىلارى اراسىندا كيكىلجىڭ تۋدى. سول كەزدە وقۋشىلاردىڭ ءبىرى ەكىنشىسىن پىشاقپەن ۇرعان. وسىدان كەيىن جارالانعان جىگىتتىڭ دوسى سىنىپتاسى ءۇشىن كەك الماق بولىپ, ءبىر تانىسىنان قولدان قارۋ جاساپ بەرۋدى سۇرايدى. قارۋ دايىن بولعاندا جەتكىنشەك سىنىپتاستارىن جيناپ, دوسىن جارالاعان جىگىتتى ىزدەپ بارعان. مۇنىڭ سوڭى ەكى توپ اراسىندا توبەلەس تۋىپ كەتۋىنە اپارىپ سوقتىرادى.
قالادا مەكتەپ وقۋشىلارى اراسىندا توپتىق توبەلەس بولىپ جاتقانىنان حاباردار بولعان پوليتسيانىڭ «بوران» جاساعى شۇعىل جەتىپ كەلەدى. ءتارتىپ ساقشىلارىن كورگەن توپتار سول بويدا جان-جاققا بىتىراي قاشادى. سول كەزدە قولىندا قارۋى بار ماناعى بالا قاشىپ بارا جاتقان قۇرداسىن ارتىنان كەلىپ, پىشاقپەن ۇرادى. قاتتى تيگەن سول جاراقاتتان وقۋشى وقيعا بولعان جەردە كوز جۇمادى.
سوت بارىسىندا جىگىتتىڭ كىناسى تولىعىمەن دالەلدەندى. وسىعان وراي سوت ونى 11 جىلعا باس بوستاندىعىنان ايىردى. بۇعان قوسا, وعان قولدان قارۋ جاساپ بەرگەن ادام دا جازاسىز قالمادى. ول شارتتى تۇردە 2 جىلعا باس بوستاندىعىنان ايىرۋعا كەسىلدى. ۇكىم ءالى زاڭدى كۇشىنە ەنگەن جوق.
قۇرىش نۇرىمبەت.
