بۇۇ باس حاتشىسى پان گي مۋن فرانتسياداعى ساپارىن اياقتاي سالىپ, نەلسون ماندەلامەن قوشتاسۋ كەشىنە قاتىسۋ ءۇشىن وڭتۇستىك افريكا رەسپۋبليكاسىنا اتتانادى. بۇل تۋرالى حالىقارالىق ۇيىمنىڭ مالىمەتىنە سىلتەمە جاساعان يتار-تاسس حابارلادى.
«باس حاتشى 10 جەلتوقساندا وار-دىڭ بۇرىنعى پرەزيدەنتى نەلسون ماندەلامەن قوشتاسۋ راسىمىنە قاتىسادى», – دەپ جازىلدى بۇۇ ءباسپاسوز قىزمەتىنىڭ اقپارىندا.
6 جەلتوقساندا قايتىس بولعان وڭتۇستىكافريكالىق كوشباسشىمەن قوشتاسۋ ءراسىمى سەيسەنبى كۇنى يوحاننەسبۋرگتەگى ستاديوندارىڭ بىرىندە وتەدى. ال 15 جەلتوقساندا ول ءوزىنىڭ تۋعان كۋنۋ قالاسىندا جەرلەنەدى دەپ كۇتىلۋدە.
بۇۇ باس اسسامبلەياسى 2009 جىلدان بەرى 18 شىلدەنى «نەلسون ماندەلانىڭ حالىقارالىق كۇنى» دەپ بەكىتتى. سونداي-اق نەلسون ماندەلانىڭ قۇرمەتىنە نيۋ-يوركتاعى 102 قاباتتىق «Empire State Building» عيماراتى سەنبى كۇنى وار تۋىنىڭ تۇستەرىمەن بويالدى.
اقش پرەزيدەنتى باراك وباما نەلسون ماندەلانىڭ ومىردەن وتكەنىن ەستىگەندە, ونىڭ قۇرمەتىنە اق ءۇيدىڭ, وزگە دە فەدەرالدى مەكەمەلەردىڭ, ەلدەگى جانە شەتەلدەگى اسكەري بازالار مەن ەلشىلىكتەردىڭ تۋلارىن تۇسىۋگە تاپسىرما بەردى. باراك وبامامەن قاتار, تاعى كوپتەگەن مەملەكەت باسشىلارى نەلسون ماندەلامەن قوشتاسۋ راسىمىنە قاتىسۋعا نيەت ءبىلدىرىپ وتىر.
ايدار ورىسباەۆ.
دەرەككوز: Itar-tass.com
