مەملەكەتتىك باعدارلامالاردى ورىنداۋ بارىسىندا دەنساۋلىق ساقتاۋ مينيسترلىگى بىرقاتار ولقىلىقتارعا جول بەردى. اتالعان كەلەڭسىزدىكتى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى انىقتاعان. بۇل تۋرالى Kapital.kz حابارلادى.
تەكسەرۋ كەزىندە جەرگىلىكتى وڭىرلەردەگى دەنساۋلىق ساقتاۋ سالاسىنىڭ 5 باعىت بويىنشا جۇمىستى جۇيەلى جۇرگىزبەگەنى ءمالىم بولدى. سونىڭ ءبىرى – «سالاماتتى قازاقستان» باعدارلاماسىنان شيكىلىك شىقتى. 2012-2016 جىلدارعا ارنالعان قاتەرلى ىسىككە شالدىققانداردى وڭالتۋ ءىسى دە ويداعىداي اتقارىلماعان. جالپى ايتقاندا, بيۋدجەت پەن باسقا دا مىندەتتى ىستەردىڭ ءتيىستى دارەجەدە ورىندالماۋىنان 74 ملرد. تەڭگەنىڭ زاڭ بۇزۋشىلىعى انىقتالعان ەكەن. ال جىل وتكەن سايىن وسى سالانىڭ بيۋدجەتىن وڭتايلاندىرۋ ماسەلەسى وتكىر كۇيىندە قالىپ وتىر. جۇمىستى بىرىڭعايلاۋعا ارنالعان جانە سىرقاتتاردى ەمدەۋ جونىندەگى قۇجاتتار نەگىزگى تالاپتارعا سايكەس كەلمەيدى. ءتىپتى ءبىر جىلدارى جازىلعان قۇجات ماتىنىندەگى سوزدەر ءالى كۇنگە دەيىن قايتالانىپ جازىلۋدا.
زاڭ جۇزىندە بەلگىلى ءبىر سىرقات تۇرلەرىنە تەگىن مەديتسينالىق كومەك كورسەتىلەتىنى بەلگىلى.بىراق, وسىعان بايلانىستى 179 كەمشىلىك انىقتالىپتى. دەنساۋلىق سالاسىنا ارنالعان نىسانداردى ماقساتسىز سالۋ فاكتىسى دە ورىن العان. سونىڭ سالدارىنان رەسپۋبليكامىزداعى 9 وبلىستا قۇنى 830 ملن. تەڭگەنىڭ قۇرال-جابدىقتارى كادەگە جاراتىلماي تۇر. قۇرىلىستى سالۋعا جوسپارلانعان قۇجاتتاردان دا شيكىلىك انىقتالدى.
رەسپۋبليكامىزداعى مەديتسينا سالاسىنا كادرلار دايارلايتىن 6-عا جۋىق وقۋ ورىندارىنىڭ وقۋ باعدارلاماسى مەن وقىتۋشىلىق قۇرامى تالاپقا سايكەس كەلمەيدى. سونىمەن بىرگە, جەرگىلىكتى جەردەگى مەديتسينا نىساندارى قىزمەتكەرلەرمەن جەتكىلىكتى قامتىلماعان. ەسەپ كوميتەتى وسى جۇمىستاردىڭ دۇرىس جۇيەلەنبەگەنىن دەنساۋلىق ساقتاۋ مينيسترلىگى تاراپىنان باقىلاۋدىڭ بولماۋىمەن بايلانىستىردى. وسى تەكسەرۋدەن كەيىن عانا 53 ادام اكىمشىلىك جانە 36 ادام تارتىپتىك جاۋاپكەرشىلىككە تارتىلعان.
باقىتبەك كەنەش ۇلى.
دەرەككوز: Kapital.kz
