قازاقستان قۇراماسى بەس بىردەي بايراقتى باسەكەگە قاتىسا الادى. ولاردىڭ بارلىعى دا كەلەسى جىلدىڭ العاشقى جارتىسىندا وتەدى. العاشقى جارىستىڭ جالاۋى 4-7 ناۋرىز ارالىعىندا يتاليانىڭ باس شاھارى – ريمدە جەلبىرەيدى. بۇل ۇزاق جىلدار بويى ايتۋلى فەدەراتسيادا ۆيتسە-پرەزيدەنتتىك قىزمەتتى اتقارعان ماتتەو پەلليكونەنى ەسكە تۇسىرۋگە ارنالعان حالىقارىلىق تۋرنير. 9-11 ساۋىردە الماتىدا سارى قۇرلىقتىڭ سايىپقىراندارى باس قوسادى. 12-17 ساۋىردە الاتاۋ باۋرايىندا ازيا چەمپيوناتى ۇيىمداستىرىلادى.
وزدەرىڭىز بايقاعانداي, ءبىزدىڭ بالۋاندار ءۇشىن تاماشا مۇمكىندىك تۋىنداپ وتىر. ءوز ەلىمىزدە, ءوز جانكۇيەرلەرىمىزدىڭ كوز الدىندا وتەتىن قوس بىردەي بايراقتى باسەكەدە جەرلەستەرىمىز بارىن سالىپ ايقاسىپ, كوزدەگەن ماقساتتارىنا قول جەتكىزۋگە ءتيىس. ال ودان كەيىنگى جارىستاردا ليتسەنزياعا يەلىك ەتۋ قيىنداي تۇسەدى. سەبەبى, 6-9 مامىر ارالىعىندا سوفيادا تۇساۋى كەسىلەتىن الەمدىك ىرىكتەۋ ءتۋرنيرى مەن 8-13 ماۋسىمدا ۆارشاۆادا ۇيىمداستىرىلاتىن رەيتينگتىك جارىستا تورتكۇل دۇنيەنىڭ ءار قيىرىنان جينالعان مىقتىلار كۇش سىناسادى.
