سولتۇستىكتەگى كورشىسىنەن قانداي قاۋىپ كەلەتىنىن تۇسىنگەن فرانتسيا بىردەن شەكارانى جابۋ تۋرالى شەشىم قابىلداعان. بۇعان ۇلىبريتانيا ۇكىمەتىنىڭ COVID-19 ىندەتىنىڭ جاڭا اسا جۇقپالى ءتۇرى تابىلعانى تۋرالى مالىمدەمەسى سەبەپ بولدى. شەكارانى ەشكىمدى وتكىزبەستەن, تولىق 48 ساعاتقا جابۋ كەرىسىنشە ەكى ەل اراسىنداعى قاربالاستى ودان سايىن ۇدەتە ءتۇستى. جولدا جۇك تاسيتىن مىڭداعان كولىك تۇرىپ قالعان. ونىڭ كوبى ازىق-ت ۇلىك تاسيتىنىن ەسكەرسەك, ب ۇلىنگەن ءونىمنىڭ شىعىنى كاسىپكەرلەر ءۇشىن دە وڭاي بولمايىن دەپ تۇر. وسىنىڭ بارلىعىن ەسكەرگەن فرانتسيا ۇكىمەتى قاۋىپسىزدىك شاراسىن جەڭىلدەتىپ, ەكى ەل اراسىنداعى شەكارانى قايتا اشۋ تۋرالى شەشىم قابىلدادى. تەمىر جول, اۋە جانە تەڭىز بايلانىسى قايتا جانداناتىن بولادى. دەگەنمەن شەكارادان كەز كەلگەن ادام وتە المايدى. فرانتسيا ازاماتتارى, فرانتسيادا تۇراتىن بريتان ازاماتتارى مەن جۇك تاسىمالداۋشىلار كوروناۆيرۋس جۇقتىرماعانىن دالەلدەيتىن انىقتاما كورسەتىپ قانا ساياحاتتاي الادى. قازىر اسكەريلەر ۇلتتىق دەنساۋلىق ساقتاۋ قىزمەتىمەن بىرلەسە وتىرىپ, جولدا تۇرىپ قالعان جۇك كولىكتەرىنىڭ جۇرگىزۋشىلەرىنەن ىندەتتى انىقتايتىن جەدەل تەست الىپ جاتقان كورىنەدى.
ۇلىبريتانيادان كەلگەن ساياحاتشىلاردىڭ جاعدايى باسقا ەلدەردە دە ءماز ەمەس. نيدەرلاند پەن بەلگيا ۆيرۋس جۇقتىرماعانى تۋرالى انىقتاماسى بار ازاماتتاردى عانا ەلىنە كىرگىزەتىن بولدى. الايدا وزگە 50-دەن استام ەل ونىڭ ىشىندە يتاليا, ءۇندىستان جانە پاكىستان ۇلىبريتانيالىق ساياحاتشىلاردى مۇلدەم قابىلدامايدى. وسىلايشا, ەۋروپادا قاۋىپتىڭ قايتا كۇشەيۋىنە ۇلىبريتانياداعى جاعداي تىكەلەي سەبەپكەر بولىپ وتىر.
بۇل وقيعا ەۋروپالىق وداق پەن ۇلىبريتانيا اراسىنداعى ونسىز دا شيەلەنىسكەن جاعدايدى قيىنداتا تۇسەتىن سەكىلدى. شەكارانىڭ جابىلۋى ەڭ الدىمەن بيزنەسكە سالقىنىن تيگىزبەك. ۇلىبريتانيالىق ازىق-ت ۇلىك وندىرۋشىلەر ءوز تاۋارىن ساتىپ الۋشى ەلگە ۋاقتىلى جەتكىزە الماي سان سوعىپ وتىرعان جايى بار. ەلدەگى ازىق-ت ۇلىك جانە سۋسىندار فەدەراتسياسىنىڭ (FDF) باسشىسى يەن رايت شەكاراداعى كىدىرىستەردىڭ ۇلىبريتانيا بيزنەسىنە جانە تاۋار جەتكىزۋ قاۋىپسىزدىگىنە اسەرىن زەرتتەۋ قاجەت ەكەنىن ايتىپ, پارلامەنت پالاتاسىنىڭ بيزنەس كوميتەتىندە شۇعىل جيىن وتكىزۋ كەرەكتىگىن العا تارتىپ وتىر. ونىڭ سونداي-اق ۇكىمەتتىڭ حابار تاراتقانىنا كوڭىلى تولمايدى. ناتيجەسىندە, شىعىنعا ۇشىراعان ازاماتتارعا وتەماقى تولەۋ قاجەت دەيدى.
شەكارانىڭ جابىلۋى بريتاندىق وندىرۋشىلەرگە عانا كەسىرىن تيگىزگەن جوق. British Retail Consortium (BRC) سالالىق توبىنىڭ مالىمەتى بويىنشا ۇلىبريتانيا تۇرعىندارى تۇتىناتىن تاعامنىڭ شامامەن 30%-ى ەۋرووداقتان كەلەدى ەكەن. اسىرەسە جىلدىڭ سۋىق مەزگىلىندە جەمىس-جيدەك پەن كوكونىس جاعىنان ۇلىبريتانيا يمپورتقا تاۋەلدى.
سونىمەن, كوروناۆيرۋستىڭ اسا جۇقپالى مۋتاتسيالانعان ءتۇرى تۋرالى نە بىلەمىز؟ ۇلىبريتانيادا ۆيرۋس جۇقتىرعاندار سانى كۇرت ءوسىپ كەلەدى. سەيسەنبىنىڭ وزىندە 36 804 ادامنىڭ ىندەت جۇقتىرعانى راستالعان. بۇل – جاز ايلارىنداعى جاپپاي تەستىلەۋدەن كەيىن بولعان ءبىر كۇندىك رەكورد. ال سوڭعى 28 كۇندە ىندەت جۇقتىرعانداردىڭ ىشىندە 691 ءولىم تىركەلگەن. ماماندار ۆيرۋستار ۇنەمى مۋتاتسياعا ۇشىراپ, وزگەرىپ وتىراتىنىن ايتادى, ونى تەك ءجىتى باقىلاپ وتىرۋ كەرەك. جالپى, ۆيرۋستىڭ بۇل ءتۇرى قىركۇيەكتە تىركەلگەنى بەلگىلى. قاراشا ايىندا لوندوندا انىقتالعان ناۋقاستاردىڭ تورتتەن ءبىر بولىگى وسى ۆيرۋستى جۇقتىرعان. ال جەلتوقساننىڭ ورتاسىندا ناۋقاستاردىڭ ۇشتەن ەكىسىنەن ۆيرۋستىڭ جاڭا ءتۇرى انىقتالىپ وتىر. وسىدان-اق, ونىڭ قانشالىقتى جۇقپالى ەكەنىن بايقاۋعا بولادى. ساراپشىلار دانيا, اۋستراليا نيدەرلاندتا تىركەلگەن ۆيرۋستىڭ ءدال وسى ءتۇرى ۇلىبريتانيادان كەلگەن بولۋى مۇمكىن دەپ توپشىلاعان. دەنساۋلىق ساقتاۋ سالاسىنىڭ ماماندارى الەمنىڭ ءار تۇپكىرىندە تىركەلگەن ۆيرۋستىڭ باستاپقىدا ۋحاننان تاراعان كوروناۆيرۋستان وزگەرەك ەكەنىن ايتادى. ماسەلەن, اقپاندا ەۋروپادا انىقتالعان ۆيرۋستىڭ ءتۇرى كەيىننەن جاپپاي تاراي باستاعان. A222V دەپ اتالاتىن تاعى ءبىر ءتۇرى يسپانياداعى جازعى دەمالىستا ورشىگەن. ۇلىبريتانياداعى اسا جۇقپالى ءتۇرىنىڭ پايدا بولۋىن كەزەكتى ناۋقاسپەن بايلانىستىرىپ وتىر. بولجام بويىنشا ىندەتپەن كۇرەسۋگە كۇشى جەتپەگەن يممۋندىق جۇيەسى ءالسىز ناۋقاستىڭ اعزاسى ۆيرۋستىڭ مۋتاتسياعا ۇشىراۋىنا تاپتىرمايتىن ورتا بولعان. دەگەنمەن ۆيرۋستىڭ قانشالىقتى قاۋىپتى ەكەنىن كورسەتەتىن ناقتى دالەلدەر ءالى جوق. عالىمدار زەرتتەۋى ءبىر ناتيجە بەرگەنگە دەيىن, ەۋروپا ءۇشىن ەڭ قاربالاس مەرەكەلىك كەزەڭنەن ەش قيىندىقسىز ءوتۋ ماڭىزدى.
