قوعام • 24 جەلتوقسان، 2020

قاۋىپتى وپەراتسيا ءساتتى ءوتتى

ەلوردا دارىگەرلەرى كىشكەنتاي سابيگە كۇردەلى وپەراتسيا جاسادى. №2 كوپسالالى قالالىق بالالار اۋرۋحاناسىنا داليدانى الىپ كەلگەندە، ونىڭ جەلكەسىندەگى قانتالاپ تۇرعان گەمانگيوماتوزدىڭ ۇلكەندىگى تەننيس دوبىنىڭ كولەمىندەي بولاتىن.

انار تولەۋحانقىزى

– العاشىندا ول مەڭ ءتارىزدى كىشكەنتاي ەدى، بارا-بارا ۇلعايىپ وسە باستادى. دارىگەرلەر ء«تۇيىننىڭ ءتۇسى مەن مولشەرىن باقىلاپ جۇرىڭىزدەر» دەگەن. ىسىك وزدىگىنەن تاراپ كەتەر دەگەن ءۇمىتىمىز بولدى، الايدا ول وسە بەردى، وسكەن سايىن قاتتى قورىقتىق، – دەيدى داليدانىڭ اناسى اسەل. ول ىسىكتىڭ تابيعاتىن تانۋ ءۇشىن قانشاما تالداما تاپسىرىپ، دارىگەر جاعالاپ جۇرگەن كۇندەردىڭ ارتتا قالعانىنا شۇكىرشىلىك ايتادى. – قايتەرىمىزدى بىلمەي «انا مەن بالا» ۇلتتىق ورتالىعىنا دا باردىق، بىراق ونداعى ماماندار دا ناقتى شەشىمگە كەلە المادى. قاپ-قاتتى بولىپ، تالاۋراپ تۇرعان ىسىككە قاراۋدىڭ ءوزى جۇرەككە قورقىنىش ۇيالاتتى.

ال داليدانى №2 كوپسالالى قالالىق بالالار اۋرۋحاناسىنا الىپ كەلگەندە مۇنداعى ماماندار ىسىكتى تەز ارادا الىپ تاستاۋ ءۇشىن وپەراتسيا جاساۋ تۋرالى شەشىم قابىلدايدى. الايدا ونىڭ قيىن جانە قاۋپى جوعارى ەكەنى بىردەن ەسكەرتىلدى.

«بالادا تامىرلى ىسىك (جەلكە ايماعىنىڭ كاۆەرنوزدى گەمانگيوماسى) ەدى. وپەراتسياعا دەيىنگى دايىندىقتان كەيىن بالاعا شۇعىل تۇردە وپەراتسيا جاسالدى. گەمانگيوما الىندى. زاقىمدانۋدىڭ ايتارلىقتاي ۇلكەن قاتەرىنەن حيرۋرگيالىق قان كەتە مە دەگەن قاۋپىمىز جوعارى بولدى. بىراق ءبىز ونى قيىندىقسىز الىپ تاستادىق. بارلىعى جاقسى ءوتتى»، دەيدى جالپى حيرۋرگيا ءبولىمىنىڭ مەڭگەرۋشىسى يرەك مينگازوۆ.

قازىر داليدانىڭ جاعدايى جاقسى، جەلكەسىندەگى كۇدىرەيگەن ىسىكسىز ەمىن-ەركىن ءوسىپ كەلەدى. بۇرىن ويناۋعا دا، ۇيىقتاۋعا دا، كيىم كيۋگە دە قيىندىق تۋدىراتىن ىسىك الىنىپ تاستالعان داليدا قازىر قۇلدىراڭداپ ءجۇر. ال ونىڭ تۋىسقاندارى بولسا ق ۇلىنشاقتى ىسىكتەن قۇتقارعان بارشا مەديتسينا قىزمەتكەرىنە وزدەرىنىڭ شەكسىز العىسىن بىلدىرەدى.