جەكە ەلەكتروندىق قۇجاتتاردى ساقتاۋ بويىنشا «تسيفرلىق قۇجاتتار» سەرۆيسى «eGov mobile» ەلەكتروندىق ۇكىمەت قوسىمشاسىنىڭ باستى بەتىندە ورنالاستىرىلعان. ستۋدەنتتىڭ باسقا دا جەكە قۇجاتتارىمەن بىرگە ەلەكتروندى ستۋدەنتتىك بيلەتى وسى سەرۆيستىڭ ىشىندە قولجەتىمدى. ءموبيلدى قوسىمشانى Google Play جانە AppStore ارقىلى جۇكتەپ الۋعا بولادى. قوسىمشادا ەتسق نەمەسە ءبىر رەتتىك قۇپيا ءسوز ارقىلى اۆتوريزاتسيادان ءوتۋ قاجەت.
«بارلىق جوعارى وقۋ ورىندارى مەن كوللەدجدەر قاعاز تۇرىندەگى ستۋدەنتتىك بيلەتتەرگە قىرۋار قاراجات جۇمسايدى. ورتاشا ەسەپپەن ءاربىر ستۋدەنتتىك بيلەت 1000-1200 تەڭگە تۇرادى. ستۋدەنتتىك جەڭىلدىكتەردى پايدالانۋ بارىسىندا قاعاز قۇجاتتاردىڭ شىنايىلىعىن راستاۋ قيىندىق تۋدىرىپ جاتاتىنى بەلگىلى. ال «eGov mobile» ءموبيلدى قوسىمشاسىندا قۇجاتتىڭ شىنايىلىعىن ەلەكتروندىق ۇكىمەت راستايدى. سوندىقتان ستۋدەنتتىك بيلەتتەردى ساندىق فورماتقا اۋىستىرۋ تەك اقشا ۇنەمدەپ قانا قويماي, سونىمەن قاتار ستۋدەنت مارتەبەسىن راستاۋ كەزىندە ىڭعايلى بولىپ تابىلادى», دەدى ءبىلىم جانە عىلىم ۆيتسە-ءمينيسترى رۇستەم بيعاري.
