سۋ-30سم – «4++» جاڭا بۋىنىنىڭ جويعىشى. ول كەز كەلگەن اۋا رايىندا كۇندىز دە, تۇندە دە ارەكەت ەتۋگە, قارسىلاستىڭ ۇشاقتارىن اتىپ ءتۇسىرىپ قانا قويماي, جەرۇستى نىسانالارىن دا جويۋعا, اۋەدە بارلاۋ جۇرگىزۋگە جانە باسقا ۇشاقتارعا نىسانا كورسەتۋگە قابىلەتتى. سۋ-30سم ۇشاعى ۇزاققا ۇشا الادى جانە وعان وتىندى اۋەدە تولتىرىپ قۇيۋ مۇمكىندىگى بار. قازىرگى كەزدە بۇل الەمدەگى ەڭ ۇزدىك كوپفۋنكتسيونالدى اسكەري جويعىشتاردىڭ ءبىرى.
اۆياتسيالىق بازادا ۇشاقتاردى قورعانىس ءمينيسترى گەنەرال-لەيتەنانت نۇرلان ەرمەكباەۆ, قر قك اقك باس قولباسشىسى اۆياتسيا گەنەرال-لەيتەنانتى نۇرلان ورمانبەتوۆ, قاراعاندى وبلىسىنىڭ اكىمى جەڭىس قاسىمبەك قارسى الدى.
قورعانىس ءمينيسترى گەنەرال-لەيتەنانت نۇرلان ەرمەكباەۆ جاڭا اۆياتسيالىق تەحنيكانىڭ اسكەري-اۋە كۇشتەرىنە قازاقستان قارۋلى كۇشتەرىن قايتا جاراقتاندىرۋ جوسپارىنا سايكەس جەتكىزىلگەنىنە توقتالىپ ءوتتى.
ول جوعارى مانەۆرلى كوپ ماقساتتى سۋ-30سم جويعىشتارى اسكەرلەردى جانە وبەكتىلەردى اۋەدەن شابۋىلداۋ قۇرالدارىنان بۇركەمەلەۋ, اۋەدەگى جانە جەرۇستى نىسانالارىن انىقتاۋ جانە جويۋ مۇمكىندىگىن ايتارلىقتاي ارتتىراتىنىن, ونىڭ ناتيجەسىندە قارۋلى كۇشتەردىڭ جاۋىنگەرلىك الەۋەتى كۇشەيەتىنىن ءسوز ەتتى.
