اتاپ ايتقاندا, دەپۋتاتتار مەملەكەتتىك ساتىپ الۋ ماسەلەلەرى بويىنشا زاڭ جوبانى ءبىرىنشى وقىلىمدا ماقۇلدادى. وسىعان وراي, ءماجىلىس توراعاسى نۇرلان نىعماتۋلين زاڭعا ەنگىزىلگەن نورمالار مەملەكەتتىك ساتىپ الۋدىڭ تيىمدىلىگىن ارتتىرۋعا, ەڭ باستىسى – سىبايلاس جەمقورلىقتى تومەندەتەتىنىن ايتتى. سونداي-اق, نۇرلان نىعماتۋلين مەملەكەتتىك ساتىپ الۋ سالاسىندا باسشىلاردىڭ قىزمەتىن مىندەتتى رەيتينگتىك باعالاۋ زاڭ دەڭگەيىندە بەكىتىلەتىنىنە نازار اۋداردى. ول ەڭ الدىمەن, مەملەكەت مۇددەسىن ساقتاي وتىرىپ, اشىق جۇمىس ىستەۋگە جول اشادى.
ايتا كەتۋ كەرەك, قازىرگى زاڭدا جەتكىزۋشىلەرمەن تىكەلەي شارت جاساپ, ءبىر كوزدەن ساتىپ الۋ قاراستىرىلعان. بۇل نورمالاردى دەپۋتاتتار تاپسىرىس بەرۋشىگە مەملەكەتتىك ساتىپ الۋدا باسەكەلەستىك ادىستەرى تاۋسىلعان كەزدە عانا قولدانۋعا بولادى دەپ تولىقتىردى. بۇنى ورىنداماعان باسشىلار 100 ايلىق ەسەپتىك كورسەتكىش كولەمىندە جاۋاپكەرشىلىككە تارتىلاتىن بولادى.
سونىمەن قاتار جالپى وتىرىستا پالاتا اتوم ەنەرگياسىن پايدالانۋ تۋرالى زاڭ جوباسىنا ەنگىزىلگەن تۇزەتۋلەردى ماقۇلدادى. قۇجاتتى تالقىلاۋ بارىسىندا جۇمىس توبى قازاقستان رەسپۋبليكاسىنىڭ اتوم ەنەرگياسىن پايدالانۋ سالاسىنداعى زاڭناماسىنىڭ تالاپتارىن بۇزۋشىلىقتاردى انىقتاۋ جاعدايلارى, قىزمەتىن يادرولىق قوندىرعىلارمەن جانە ىقتيمال رادياتسيالىق قاۋىپتىلىگى I جانە II ساناتتاعى وبەكتىلەرمەن جۇزەگە اسىراتىن سۋبەكتىلەرگە تەكسەرۋ جۇرگىزۋ, اتوم ەنەرگياسىن پايدالانۋ سالاسىنداعى قىزمەتتى ليتسەنزيالاۋ ءتارتىبى جانە تاعى باسقالارىنا قاتىستى ۇسىنىستار ەنگىزدى. بۇگىنگى جالپى وتىرىستا بىرقاتار راتيفيكاتسيالىق زاڭ جوبالارى ماقۇلداندى.
اتاپ ايقاندا, ء«ولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» زاڭ جوباسى. حاتتاما قازاقستان رەسپۋبليكاسىنىڭ ءولىم جازاسىنىڭ كۇشىن جويۋ بويىنشا حالىقارالىق مىندەتتەمەلەردى قابىلداۋىنا باعىتتالعان. اتالعان قۇجاتتىڭ 2-بابىنىڭ 1-تارماعىندا سوعىس ۋاقىتىندا جاسالعان اسكەري سيپاتتاعى اسا اۋىر قىلمىستار جاساعانى ءۇشىن كىنالى دەپ تانىلعاننان كەيىن سوعىس ۋاقىتىندا ءولىم جازاسىن قولدانۋدى كوزدەيتىن, راتيفيكاتسيالاۋ نەمەسە قوسىلۋ كەزىندە جاسالعان ەسكەرتپەنى قوسپاعاندا, وسى حاتتاماعا ەشقانداي ەسكەرتپەلەرگە جول بەرىلمەيتىنى كوزدەلگەن. قازاقستان حاتتاماعا كورسەتىلگەن ەسكەرتپەمەن قوسىلىپ وتىر. راتيفيكاتسيالانعان قۇجاتتاردىڭ قاتارىندا تمد قاتىسۋشى مەملەكەتتەردىڭ يادرولىق اۆاريا نەمەسە رادياتسيالىق اۆاريالىق احۋالدىڭ تۋىنداۋ جاعدايىنا دايىندىقتى جانە ولاردىڭ زارداپتارىن جويۋ كەزىندەگى ءوزارا كومەكتى قامتاماسىز ەتۋ بويىنشا ءوزارا ءىس-قيمىلى تۋرالى كەلىسىمدى راتيفيكاتسيالاۋ تۋرالى زاڭ جوباسى بار.
سونىمەن قوسا, ەۋرازيالىق ەكونوميكالىق كوميسسيانىڭ باسەكەلەستىكتىڭ بىرىڭعاي قاعيدالارىنىڭ ساقتالۋىن باقىلاۋ جونىندەگى وكىلەتتىكتەردى جۇزەگە اسىرۋى كەزىندە قۇپيا اقپاراتتى قورعاۋ ءتارتىبى جانە ونى جاريا ەتكەنى ءۇشىن جاۋاپتىلىق تۋرالى كەلىسىمگە ارمەنيا رەسپۋبليكاسىنىڭ قوسىلۋى تۋرالى حاتتامانى راتيفيكاتسيالاۋ تۋرالى زاڭ جوباسى ماقۇلداندى.
سونداي-اق بۇگىن ەۋرازيالىق ەكونوميكالىق وداقتىڭ كەدەن كودەكسى تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى, سونىمەن قاتار قازاقستان مەن حالىقارالىق قارجى كورپوراتسياسى اراسىنداعى قازاقستان رەسپۋبليكاسىندا وفيستەر قۇرۋ جانە ولاردىڭ قىزمەتى تۋرالى كەلىسىمدى راتيفيكاتسيالاۋ تۋرالى زاڭ جوبالارى ماقۇلداندى.
بۇگىن دەپۋتاتتار «جەر قويناۋى جانە جەر قويناۋىن پايدالانۋ تۋرالى» قازاقستان رەسپۋبليكاسىنىڭ كودەكسىنە ۋران ءوندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبانى ەكىنشى وقىلىمدا ماقۇلدادى. پالاتا اسىل تۇقىمدى مال شارۋاشىلىعى ماسەلەلەرىنە قاتىستى زاڭ جوبالارىمەن جۇمىستى جالعاستىرۋ تۋرالى ۇسىنىسپەن كەلىستى. جالپى وتىرىستا دەپۋتاتتار ءبىرشاما زاڭ جوبالارىنا سەنات ەنگىزگەن تولىقتىرۋلارمەن كەلىستى. ولار: قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ جولداۋىنىڭ جەكەلەگەن ەرەجەلەرىن ىسكە اسىرۋ ماسەلەسى بويىنشا جانە ەكونوميكالىق ءوسۋدى قالپىنا كەلتىرۋ مەن ەكولوگيا جانە اقپارات ماسەلەلەرىنە قاتىستى زاڭ جوبالارى.
جالپى وتىرىستا ءماجىلىس جىلجىمايتىن م ۇلىكتىڭ بىرىڭعاي مەملەكەتتىك كاداسترى شەڭبەرىندە مەملەكەتتىك كورسەتىلەتىن قىزمەتتەردى تسيفرلاندىرۋ ماسەلەلەرى تۋرالى زاڭ جوباسىن جۇمىسقا الدى. سونداي-اق, جالپى وتىرىستا دەپۋتاتتار ءماجىلىس رەگلامەنتىنە تولىقتىرۋلار ەنگىزدى. ول پارلامەنتتىك وپپوزيتسيا تۋرالى زاڭنامانى ىسكە اسىرۋعا باعىتتالعان.
