ءىس-شارانى يسلام ىنتىماقتاستىق ۇيىمىنىڭ عىلىم جانە تەحنولوگيالار سالاسىنداعى ىنتىماقتاستىق ماسەلەلەرى جونىندەگى تۇراقتى كوميسسياسى (كومستەك) پاكىستان پرەزيدەنتى اريف ءالۆيدىڭ تىكەلەي قولداۋىمەن جانە قاتىسۋىمەن وتكىزدى.
فورۋم بيىل يۋنەسكو اياسىندا قازاقستاندا جانە شەتەلدە كەڭىنەن اتالىپ وتكەن ءال-ءفارابيدىڭ مەرەيتويىنىڭ اياقتاۋشى ءىس-شارالارىنىڭ ءبىرى بولدى.
اتالمىش شاراعا 17 مەملەكەتتەن 150-دەن استام ادام قاتىستى, ولاردىڭ ىشىندە پاكىستان, اقش, ۇلىبريتانيا, گەرمانيا, كاتار, قازاقستان جانە باسقا دا ەلدەردىڭ جەتەكشى ۋنيۆەرسيتەتتەرىنىڭ كورنەكتى فارابيتانۋشى عالىمدارى, ءتۇرلى حالىقارالىق ۇيىمداردىڭ, سونىڭ ىشىندە حالىقارالىق تۇركى اكادەمياسىنىڭ, سونداي-اق ەلدە اككرەديتتەلگەن ديپلوماتيالىق كورپۋستىڭ وكىلدەرى بار.
قازاقستان اتىنان يىۇ جانىنداعى قر تۇراقتى وكىلى بەرىك ارىن, قر پاكىستانداعى ەلشىسى اقان راحمەتۋللين جانە قازاق ۇلتتىق ۋنيۆەرسيتەتى جانىنداعى ءال-فارابي ورتالىعىنىڭ جەتەكشىسى بەكجان مەيىرباەۆ قاتىستى.
جاھاندىق فورۋمنىڭ اشىلۋ سالتاناتىندا ءسوز سويلەگەن پاكىستان پرەزيدەنتى اريف الۆي ءال-فارابي ءىلىمىنىڭ جالپى ادامزات ءۇشىن, اتاپ ايتقاندا يسلام الەمى ءۇشىن مىزعىماس وزەكتىلىگىن ەرەكشە اتاپ ءوتتى. وسىعان بايلانىستى ول سوڭعىسىن ءال-ءفارابيدىڭ زياتكەرلىك مۇراسىنىڭ ادامگەرشىلىك قۇرامداس بولىگىنە سۇيەنە وتىرىپ, عىلىم مەن تەحنولوگيا سالاسىندا وزىنە قاجەتتى سەرپىلىس جاساۋ ءۇشىن كۇش-جىگەرىن جۇمىلدىرۋعا شاقىردى.
يىۇ باس حاتشىسىنىڭ عىلىم جانە تەحنولوگيالار جونىندەگى ورىنباسارى اسقار مۋسينوۆ قاتىسۋشىلاردى ءال-ءفارابيدىڭ عىلىمي مۇراسىن يىۇ ەلدەرىندە عانا ەمەس, جاھاندىق دەڭگەيدە كەڭىنەن تاراتۋ جونىندەگى حالىقارالىق ءىس-شارالاردى تۇراقتى وتكىزۋ تۋرالى ۇسىنىسپەن مۇشە مەملەكەتتەردىڭ سىرتقى ىستەر مينيسترلەرى ءبىراۋىزدان قابىلداعان ارنايى قارار تۋرالى حاباردار ەتتى.
قازاقستاننىڭ يىۇ جانىنداعى تۇراقتى وكىلى, ساۋد ارابياسىنداعى ەلشىسى ب.ارىن بيىلعى جىلى قازاقستاندا جانە شەتەلدە ءال-فارابي مۇراسىنا ارنالعان اۋقىمدى عىلىمي-پراكتيكالىق ءىس-شارالار تۋرالى ايتىپ, ونىڭ ءححى عاسىردىڭ وزەكتى گۋمانيتارلىق حابارلاندىرۋىنا سايكەس بۇكىل ادامزاتتىڭ يگىلىگى بولىپ تابىلاتىنىن اتاپ كەتتى.
ەكى كۇندىك فورۋم بارىسىندا قاتىسۋشىلار ءال-ءفارابيدىڭ دۇنيەتانىمىنىڭ نەگىزگى ەرەكشەلىكتەرىن, ونىڭ فيلوسوفياعا, لينگۆيستيكاعا, مەتافيزيكاعا, پسيحولوگياعا ارنالعان ەڭبەكتەرىنىڭ نەگىزگى ەرەجەلەرىن, ولاردىڭ يسلام الەمى مەن باتىس ەلدەرى عالىمدارىنىڭ ورتا عاسىرلار مەن جاڭا داۋىردەگى كوزقاراستارىنىڭ قالىپتاسۋىنا ىقپالىن, سونداي-اق ۇلى ويشىلدىڭ ادامزات وركەنيەتىنىڭ دامۋىنا ولشەۋسىز ۇلەسىن جان-جاقتى تالقىلادى.
