ادىلەت ءمينيسترىنىڭ ايتۋىنشا, ۇكىمەتتىڭ زاڭ جوبالاۋ جۇمىستارىنىڭ 2020 جىلعا ارنالعان جوسپارى بەكىتىلگەندە 17 زاڭ جوباسىن ازىرلەۋدى جانە پارلامەنتكە ەنگىزۋدى كوزدەدى. جىل ىشىندە ەنگىزىلگەن تۇزەتۋلەردى ەسكەرە وتىرىپ, جوسپار 22 زاڭ جوباسىن ازىرلەۋدى جانە پارلامەنتكە ەنگىزۋدى كوزدەيدى. مارات بەكەتاەۆ تۇزەتۋلەرمەن 7 زاڭ جوباسى ەنگىزىلگەنىن ناقتىلادى, 2 زاڭ جوباسى الىپ تاستالدى, 2 زاڭ جوباسى بويىنشا ەنگىزۋ مەرزىمدەرى اۋىستىرىلدى.
«مەملەكەتتىك ورگانداردىڭ زاڭ جوبالارىن ەنگىزۋ مەرزىمدەرىن اۋىستىرۋى پرەمەر-ءمينيسترى كەڭسەسى جانە پرەزيدەنت اكىمشىلىگى باسشىلىعىمەن كەلىسىلدى. ازىرلەۋشى ورگاندار ۇكىمەتتىڭ زاڭ جوبالاۋ جۇمىستارى جوسپارىنىڭ ۋاقىتىلى ورىندالۋى بويىنشا, سونداي-اق زاڭ جوبالاۋ قىزمەتىن ءتيىمدى جوسپارلاۋ بويىنشا بارلىق قاجەتتى شارالاردى قابىلداعانىن اتاپ وتكەن ءجون», — دەدى ول.
بۇگىنگى تاڭدا ۇكىمەتتىڭ زاڭ جوبالاۋ جۇمىستارىنىڭ 2020 جىلعا ارنالعان جوسپارى تولىق كولەمدە ورىندالدى, 22 زاڭ جوباسىنىڭ بارلىعى پارلامەنتكە ۋاقىتىلى ەنگىزىلدى. ودان سوڭ مينيستر ۇكىمەتتىڭ زاڭ جوبالاۋ جۇمىستارىنىڭ 2021 جىلعا ارنالعان جوسپار جوباسى تۋرالى باياندادى.
«ادىلەت مينيسترلىگى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ مۇشەلەرىمەن بىرلەسىپ, مەملەكەتتىك ورگانداردىڭ ۇسىنىستارى بويىنشا ۇكىمەتتىڭ زاڭ جوبالاۋ جۇمىستارىنىڭ 2021 جىلعا ارنالعان جوسپار جوباسىن دايىندادى. جوسپار جوباسى مەملەكەت باسشىسى جانە ستراتەگيالىق قۇجاتتاردا ايقىندالعان تاپسىرمالار نەگىزىندە قالىپتاستىرىلدى, وندا 25 زاڭ جوباسىن ازىرلەۋ كوزدەلگەن», — دەدى مينيستر.
ول سونىمەن قاتار ازىرلەنۋگە ۇسىنىلعان زاڭ جوبالاردىڭ ىشىنەن 2021 جىلدىڭ ءبىرىنشى جارتىجىلدىعىندا پارلامەنتكە 13 زاڭ جوباسىن, ال ەكىنشى جارتىجىلدىعىندا 12 زاڭ جوباسىن ەنگىزۋ جوسپارلانىپ وتىرعانىن جەتكىزدى.
الداعى جىلى «قوعامدىق باقىلاۋ تۋرالى», «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى», «گەودەزيا, كارتوگرافيا جانە كەڭىستىكتىك دەرەكتەر تۋرالى» جانە «اسكەري پوليتسيا ورگاندارى تۋرالى» جاڭا زاڭ جوبالارىنىڭ ازىرلەنۋى كوزدەلۋدە.
جالپى, ادىلەت ءمينيسترى ءوز سوزىندە اتاپ وتكەندەي, زاڭ جوبالاۋ جۇمىستارىنىڭ جوسپارىندا كوزدەلگەن زاڭ جوبالارى مەملەكەت باسشىسى قويعان ءبىرىنشى كەزەكتەگى زاڭنامالىق مىندەتتەردى شەشۋدى كوزدەيدى. ونىڭ ىشىندە حالىقتىڭ الەۋمەتتىك جانە ەكونوميكالىق ماسەلەلەرىن شەشۋگە, سونداي-اق جەكەلەگەن سالالارداعى زاڭنامانى ودان ءارى جەتىلدىرۋگە باعىتتالعان.
