الەمدەگى ەڭ تانىمال Coursera ونلاين وقىتۋ پلاتفورماسى قر ەڭبەك جانە حالىقتى الەۋمەتتىك قورعاۋ مينيسترلىگىمەن جانە «ەڭبەك رەسۋرستارىن دامىتۋ ورتالىعى» اق-مەن بىرلەسىپ, قازاقستاندىقتار ءۇشىن تەگىن ونلاين وقىتۋدىڭ اۋقىمدى جوباسىن ىسكە اسىرۋدا.
بۇگىنگى كۇنى اعىمداعى جىلعى 1 قازان مەن 15 جەلتوقسان ارالىعىندا تىركەۋدەن وتكەن قازاقستاندىقتار وتەۋسىز نەگىزدە 500 كۋرس بويىنشا وقىتۋدان وتەدى, جالپى العاندا ولار 262 مىڭنان استام وقۋ ساعاتىن ءوتتى. بۇل رەتتە 20 مىڭ ادام ءبىر مەزگىلدە 2 جانە ودان دا كوپ كۋرستاردا وقيدى. 10 مىڭنان استام ادام وقۋدى اياقتاپ, الەمنىڭ تۇكپىر-تۇكپىرىنەن تانىلعان ءبىلىم بەرۋ ۇيىمدارىنىڭ راستايتىن سەرتيفيكاتتارىن الدى.
وقىتۋدىڭ ەڭ تانىمال باعىتتارى بيزنەس, IT جانە كومپيۋتەرلىك عىلىمدار, تىلدەردى وقىتۋ, جەكە دامۋ جانە دەرەكتەر عىلىمى بولدى. كۋرستاردان ءوتۋدىڭ ارقاسىندا 15 مىڭ قاتىسۋشى بيزنەس-اعىلشىن ءتىلىنىڭ داعدىلارىن جاقسارتتى. 9 مىڭ ادام Python تىلىندە باعدارلامالاۋ داعدىلارىن يگەردى. 4 مىڭ قازاقستاندىق SMM نەگىزدەرى بويىنشا ءبىلىم الدى.
كۋرستاردا وقيتىنداردىڭ كوپشىلىگى (12,3 مىڭ ادام) 26-دان 30 جاسقا دەيىنگى جاستاعى ادامدار. ودان كەيىن 21-25 جاس ارالىعىندا – 11,1 مىڭ قاتىسۋشى, 31-35 جاس – 8,5 مىڭ, 20 جاسقا دەيىنگى سانات – 6,4 مىڭ ءبىلىم الۋشى.
قازاقستاندىقتار وقيتىن توپ-10 كۋرسقا «Teach English Now! Technology Enriched Teaching», «Programming for Everybody (Getting Started with Python)», «Busines sEnglish: Basics», «جوبالار مەن ونىمدەرمەن جۇمىس جاساۋداعى ەپتىلىك پەن Scrum», «Python-عا ەنۋ», سونداي-اق «اعىلشىن تىلىندەگى كاسىبي ەمال», «SMM ناۋقانى: ماقساتتار, ستراتەگيا, الگوريتمدەر جانە ماركەتينگتىك الەۋەت», «راسترلىق گرافيكا. Adobe Photoshop CC», ء«وز اقشاڭا بيزنەس اشۋ», «ومىرلىك ءىستى تابۋ نەگىزدەرى. 1-ءبولىم. ءىستى كەيىنگە قالدىرۋدى قالاي توقتاتۋعا بولادى؟».
ەستەرىڭىزگە سالا كەتەيىك, Coursera الاڭىندا تەگىن وقىتۋ كۋرستارىنا تىركەلۋ 2020 جىلدىڭ 15 جەلتوقسانىندا اياقتالدى. تىركەلگەن قاتىسۋشىلار ءۇشىن كۋرستار 2021 جىلدىڭ 15 اقپانىنا دەيىن قولجەتىمدى.
