كوپ ەلدە جەلتوقسان ايى وتباسىلىق مەيرامدارعا تولى. بۇل ايدا بارلىعى قالادان قالاعا, ەلدەن ەلگە ساياحاتتاپ, جاقىندارىمەن كەزدەسۋگە اسىعادى. ەل ۇكىمەتتەرى مەن دەنساۋلىق ساقتاۋ سالاسىنىڭ وكىلدەرى وسىعان بايلانىستى دابىل قاعادى. ماسەلەن, يتاليا روجدەستۆو قارساڭىنداعى دەمالىس كۇندەرىنە جارتىلاي لوكداۋن جاريالادى. ەلدىڭ پرەمەر-ءمينيسترى دجۋزەپپە كونتە بۇل شەكتەۋدى ەنگىزۋ وڭاي بولماعانىن ايتا كەلە, وتباسىلار مەن جاقىنداردىڭ جيىنى ۆيرۋستىڭ تارالۋىن قايتا ءورشىتۋى مۇمكىن دەگەن الاڭداۋشىلىق ءبىلدىردى. بۇل قادام لومبارديا, ۆەنەتو جانە لاتسيو وڭىرلەرىندە ۆيرۋس جۇقتىرعاندار سانىنىڭ قايتا وسۋىنە بايلانىستى جاسالىپ وتىر. ەستە بولسا, ءدال وسى يتاليا ەۋروپا ەلدەرىنىڭ ىشىندە ۆيرۋستان ەڭ كوپ زارداپ شەككەن ەل سانالادى. ۆيرۋستان قايتىس بولعاندار سانى بويىنشا دا كارى قۇرلىقتا الدا تۇر. قابىلدانعان شەشىم نەگىزىندە 21 جەلتوقساننان 6 قاڭتارعا دەيىن مەرەكە جانە دەمالىس كۇندەرى قوزعالىسقا قاتاڭ شەكتەۋ قويىلادى. ال قوناققا ەكى ادامنان ارتىق بارۋعا بولمايدى.
ەۋروپانىڭ باسقا ەلدەرى دە دەمالىسقا وراي قاتاڭ شارالار قاراستىرعان. ماسەلەن, نيدەرلاند بەس اپتالىق لوكداۋن ەنگىزسە, وتكەن اپتادا گەرمانيا ەلدەگى COVID-19 جۇقتىرعانداردىڭ ءوسۋىن توقتاتۋ ءۇشىن كارانتين شارالارىن 19 قاڭتارعا دەيىن كۇشەيتكەن. ال اۋستريا روجدەستۆودان كەيىن بىردەن ءۇشىنشى لوكداۋن ەنگىزەتىنىن مالىمدەدى.
كورشىلەس وزگە ەلدەر قاتاڭ شارالار قولدانعاندا شۆەتسيا ءاۋ باسىندا كوروناۆيرۋسپەن كۇرەستىڭ باسقا جولىن تاڭداعانى بەلگىلى. تۇرعىندارعا ماسكا تاعۋ, بارلار مەن رەستورانداردىڭ جۇمىسىن شەكتەۋ سەكىلدى قاراپايىم بولىپ كورىنگەن قاۋىپسىزدىك شارالارى ەنگىزىلمەدى. سول سەبەپتى دە شۆەتسيانىڭ ۆيرۋسپەن كۇرەس ستراتەگياسى كوپ سىنعا قالعان-دى. ەل بيلىگى وسىعان دەيىن ەركىن بولىپ كەلگەن قاۋىپسىزدىك شارالارىن ەندى قاتاڭداتۋدى كوزدەپ وتىر. تۇرعىندارعا العاش رەت قوعامدىق كولىكتە ماسكا تاعۋ كەرەكتىگى ايتىلدى. پرەمەر-مينيستر ستەفان لەۆەن مەيرامحانادا بىرگە تاماقتاناتىن ادامداردىڭ سانىن ەكى ەسە ازايتۋ جانە الكوگول ساتۋعا كومەندانتتىق ساعات ەنگىزۋ سياقتى باسقا دا شەكتەۋلەر الداعى ۋاقىتتا كۇشىنە ەنەتىنىن ايتتى. بۇرىن سەگىز ادام بىرگە تاماقتانا الاتىن بولسا, قازىر ولاردىڭ سانى تورتكە دەيىن قىسقارادى جانە كەشكى 8-دەن كەيىن الكوگول ساتۋعا تىيىم سالىنباق. ساۋدا ورتالىقتارى مەن فيتنەس زالداردا دا وزگەرىستەر بولادى. جوعارى سىنىپ وقۋشىلارى 24 قاڭتارعا دەيىن قاشىقتان وقيدى. مۇنىڭ بارلىعى مەيرام قارساڭىنداعى قاربالاستى بولدىرماۋدىڭ امالدارى بولار. ويتكەنى باتىس ەلدەرى ءۇشىن روجدەستۆو قارساڭى دۇكەنگە ەڭ كوپ باراتىن جانە ساياحاتتاۋعا ارنالعان ۋاقىت دەسە بولادى.
ەۋروپاداعى جاعدايدى قيىنداتقان تاعى ءبىر وقيعا بريۋسسەل سامميتىنە قاتىسقان كوشباسشىلاردىڭ ءبىرى – فرانتسيا پرەزيدەنتى ەممانۋەل ماكروننىڭ كوروناۆيرۋس جۇقتىرعانى بولدى. العاشىندا ساياساتكەردىڭ ىندەتتى ناقتى قايدا جۇقتىرعانى بەلگىلى بولماعانىمەن, وسى ءىرى شاراعا نازار بىردەن اۋدى. ەۋروپالىق وداق وكىلدەرى ءىس-شارانى ۇيىمداستىرۋ بارىسىندا بارلىق قاۋىپسىزدىك شارالارى ورىندالعانىن ايتادى. الايدا ماكرونمەن كەزدەسكەن بارلىق كوشباسشىلار مەن ساياساتكەرلەر وقشاۋلانىپ, باقىلاۋعا الىنعان. ءبىر كۇننەن كەيىن جيىنعا قاتىسقان تاعى ءبىر كوشباسشىنىڭ – سلوۆاكيا پرەمەر-ءمينيسترى يگور ءماتوۆيچتىڭ ىندەت جۇقتىرعانى بەلگىلى بولدى. جالپى, وسىعان دەيىن ۆيرۋس جۇقتىرعان باسشىلار قاتارىندا ارمەنيا پرەمەر-ءمينيسترى, بەلارۋس پرەزيدەنتى, بولگاريا پرەمەر-ءمينيسترى, حورۆاتيا پرەمەر-ءمينيسترى, موناكو كنيازى, پولشا پرەزيدەنتى مەن ۇلىبريتانيانىڭ پرەمەر-ءمينيسترى بولعان.
مەرەكە قارساڭىندا قاتاڭ شاراعا كوشكەن ەلدەر قاتارىندا ۇلىبريتانيا دا بار. دەنساۋلىق ساقتاۋ وكىلدەرىن انگليانىڭ وڭتۇستىك-شىعىسىندا تەز تارالىپ جاتقان كوروناۆيرۋستىڭ جاڭا قارقىنى الاڭداتىپ وتىر. ۇلىبريتانيانىڭ دەنساۋلىق ساقتاۋ ءمينيسترى مەتت حانكوك العاش رەت كوروناۆيرۋستىڭ مۋتاتسيالانعان ءتۇرى لوندون مەن انگليانىڭ وڭتۇستىك-شىعىسىندا الدەقايدا جىلدام تارالىپ جاتقانىن ايتقان ەدى. بوريس دجونسوننان باستاپ ەل ۇكىمەتى بۇل قاۋىپتى بىردەن قاپەرگە الدى. الايدا جاڭا ۆيرۋس تۋرالى عىلىمي نە وزگە دە دالەلدەر جوق. ەۋروپانىڭ الدىنداعى قازىرگى مىندەت – مەرەكە كۇندەرىن امان-ەسەن وتكىزۋ بولىپ وتىر.
