كىشكەنتاي داليدا اۋرۋحاناعا جەلكەسىنەن ۇلكەن كاۆەرنوزدى گەمانگيومامەن ءتۇستى. تۋىلعان كەزدە گەمانگيوما قال سياقتى بولدى, مۇلدەم كورىنبەيتىن, دەيدى داليدانىڭ اناسى.
"دارىگەرلەر داقتىڭ ءوسۋى مەن ءتۇسىنىڭ ديناميكاسىن قاداعالاڭىزدار دەدى. گەمانگيوما وزدىگىنەن كەتەر دەپ ۇمىتتەندىك, بىراق «تومپەشىك» وسە باستادى", دەيدى اناسى اسەل.
قىزدىڭ اتا-اناسى ىسىكتىڭ سەبەبىن ءتۇسىنۋ ءۇشىن قانشا ءتۇرلى اناليزدەر تاپسىرعان. ۋاقىت وتە ىسىك تەننيس دوبىنىڭ كولەمىنە جەتتى.
"انا مەن بالا ۇلتتىق ورتالىعىندا دا بىزگە ىسىك تۋرالى ناقتى تۇسىنىك بەرە المادى, ءبىزدى وپەراتسياعا اپارۋدان قورىقتى", دەيدى قىزدىڭ اناسى.
№2 كوپسالالى قالالىق بالالار اۋرۋحاناسىنىڭ ماماندارىمەن بايلانىسقاننان كەيىن, ىسىكتى تەز ارادا الىپ تاستاۋ بويىنشا وپەراتسيا جاساۋ تۋرالى شەشىم قابىلداندى. الايدا, وتباسىنا وپەراتسيانىڭ قيىن جانە قاۋپى جوعارى ەكەندىگى تۋرالى بىردەن ەسكەرتىلدى.
"بالادا تامىرلى تۋا بىتكەن ىسىك بار (وكسيپيتالدى ايماقتىڭ كاۆەرنوزدى گەمانگيوماسى). وپەراتسياعا دايىندىقتان كەيىن بالاعا وتا جاسالدى. گەمانگيوما الىنىپ تاستالدى. ىسىكتىڭ ەداۋىر مولشەرىن ەسكەرە وتىرىپ, وپەراتسيادان قان كەتۋ قاۋپى بولدى. ءبىز ونى اسقىنۋسىز الىپ تاستادىق. بارلىعى ويداعىداي ءوتتى!", دەيدى حيرۋرگ, جالپى حيرۋرگيا ءبولىمىنىڭ مەڭگەرۋشىسى يرەك مينگازوۆ.
ەندى ءبىر جاسار داليدا ءوزىن ەداۋىر جاقسى سەزىنەدى. تۋىستارى داليداعا ىسىكسىز جاڭا ءومىر سىيلاعان ادامدارعا شىن جۇرەكتەن ريزاشىلىقتارىن بىلدىرەدى.
