ل.بارانكۋلوۆانىڭ ايتۋىنشا, قوردىڭ الداعى بەس جىلعا ارنالعان دامۋ جوسپارىنىڭ نەگىزگى مىندەتتەرى قارجىلىق تۇراقتىلىقتى قامتاماسىز ەتۋ, كورپوراتيۆتىك ورتالىق پەن قوردىڭ پورتفەلدىك كومپانيالارى وتىمدىلىگىنىڭ جەتكىلىكتى دەڭگەيىن قولداۋ.
ل.بورانقۇلوۆا قوردىڭ 2021 جىلى ينۆەستيتسيالىق حولدينگكە بەلسەندى تۇردە قايتا قۇرىلا باستايتىنىن اتاپ ءوتتى. جاڭا قورجىننىڭ ءوسۋىن قامتاماسىز ەتۋ ءۇشىن قور بولاشاق ۇرپاق قورىن قالىپتاستىرۋ جونىندەگى جۇمىستى جالعاستىرادى, سونداي-اق بىرلەسكەن ينۆەستيتسيالاۋ قاعيداتتارى بويىنشا تىكەلەي ينۆەستيتسيالاردى باستايدى.
ونىڭ ايتۋىنشا, بۇل قور پورتفەلىندەگى كوممەرتسيالىق اكتيۆتەردى قالىپتاستىرۋعا مۇمكىندىك بەرەدى. وسىلايشا, قور 2024 جىلعا قاراي ينۆەستيتسيالىق پورتفەلىن بەلسەندى باسقارۋعا تولىق كوشە وتىرىپ, پورتفەلدى وڭتايلاندىرۋدى جانە قايتا قۇرىلىمداۋدى جالعاستىرۋعا باعىتتالادى.
سونداي-اق ل.بورانقۇلوۆا 2021 جىلدان باستاپ قور بەلسەندى تۇردە ينۆەستيتسيالاي باستايتىنىن اتاپ ءوتتى. قازىرگى ۋاقىتتا قور 12 باسىم سالانى انىقتادى, ولاردىڭ ىشىندە اقپاراتتىق تەحنولوگيالار, ينفراقۇرىلىمدىق قۇرىلىس, جاسىل ەنەرگەتيكا, حيميا ونەركاسىبى, دەنساۋلىق ساقتاۋ, ماشينا جاساۋ, لوگيستيكا, اۋىل شارۋاشىلىعى, تاۋ-كەن ونەركاسىبى, عىلىمي ازىرلەمەلەر جانە ت.ب. بۇل ءتىزىم تولىق ەمەس جانە الەمدىك جانە ايماقتىق تەندەنتسيالار مەن نارىقتىڭ وزگەرۋىنە بايلانىستى جىل سايىن جاڭارتىلىپ وتىرادى.
ل.بورانقۇلوۆانىڭ ايتۋىنشا, الەمدىك داعدارىس قور توبىنىڭ قارجىلىق كورسەتكىشتەرىنە اسەر ەتتى. الايدا «سامۇرىق-قازىنا» 2020 جىلدى باستاپقى جوسپارلاردان الدەقايدا جوعارى ناقتى كورسەتكىشتەرمەن اياقتاۋعا نيەتتى.
«قالىپتاسقان سىرتقى فاكتورلارعا قاراماستان, 2021 جىلى كومپانيالار توبىنىڭ نەگىزگى ستراتەگيالىق كورسەتكىشتەرى اعىمداعى جىلدىڭ باعاسىمەن سالىستىرعاندا جاقسارۋدا. قوردىڭ تازا اكتيۆتەرىنىڭ قۇنى 2021 جىلى 653 ملرد تەڭگەگە ءوسىپ, 14 ترلن تەڭگەنى قۇرايدى. سوڭعى 6 جىلدا ورتاشا جىلدىق ءوسۋ قارقىنى 8,2% - عا, سوڭعى 10 جىلدا - 9,1%-عا تەڭ. كۇتىلەتىن ءوسىم 8% دەڭگەيىندە بەكىتىلگەن ستراتەگيانىڭ ماقساتتارىنان اسىپ تۇسەدى», دەدى ل.بورانقۇلوۆا.
سونداي-اق 2025 جىلعا قاراي قوردىڭ تازا اكتيۆتەرىنىڭ قۇنى 6,9 ترلن تەڭگەگە ارتىپ, 21 ترلن تەڭگەنى قۇرايدى دەپ كۇتىلۋدە, ال 2021 جىلى قوردىڭ تازا كىرىسى 523 ميلليارد تەڭگەگە جەتەدى, بۇل وسى جىلدىڭ باعاسىنان 22% جوعارى. الداعى 4 جىلدا 6,2 ترلن تەڭگەنىڭ جالپى كىرىسىنە قول جەتكىزىلەدى دەپ كۇتىلۋدە. كاپيتال تيىمدىلىگىنىڭ كورسەتكىشى 4,7% دەڭگەيىندە جوسپارلانىپ وتىر, 2025 جىلعا قاراي 9,1% دەڭگەيىنە دەيىن جاقسارادى.
وسىلايشا, ديرەكتورلار كەڭەسى بەكىتكەن دامۋ جوسپارى قوردىڭ 2028 جىلعا دەيىنگى دامۋ ستراتەگياسىنا تولىق سايكەس كەلەدى جانە ونى ىسكە اسىرۋدى قولدايدى. بۇدان باسقا قور توبى 2021 جىلى وسى جىلدىڭ باسىندا باستالعان شىعىستار مەن كۇردەلى سالىمدار دەڭگەيىن باقىلاۋ جونىندەگى جۇيەلى جۇمىستى جالعاستىرادى.
ەستەرىڭىزگە سالا كەتەيىك, 13 قاراشادا قور باسشىسى احمەتجان ەسىموۆ تۇڭعىش پرەزيدەنت - ەلباسى توراعالىق ەتكەن قور باسقارماسىنا قوردى ينۆەستيتسيالىق حولدينگكە اينالدىرۋ تۇجىرىمداماسىن ۇسىندى. تۇجىرىمداما اياسىندا قور 2028 جىلعا دەيىنگى جاڭارتىلعان دامۋ ستراتەگياسىندا نەگىزگى ماقساتتاردى ايقىندادى. ولاردىڭ ەڭ باستىسى - «سامۇرىق-قازىنا» قورىنىڭ ورتا مەرزىمدى كەلەشەكتە جەتەكشى ەگەمەندى ءال-اۋقات قورلارىنا ۇقساس ينۆەستحولدينگ رەتىندە جۇمىس ىستەۋدىڭ جاڭا فورماتىنا كوشۋى.
