قازىرگى كۇندەرى ىشكى ىستەر ورگاندارىندا جۇرگىزىلىپ جاتقان ۇيلەردەگى تىركەلمەگەن قارۋلاردى تاپسىرۋ جونىندەگى اكتسيانىڭ ءوزىن تابىس تابۋدىڭ بيزنەسىنە اينالدىرعان پىسىق جىگىتتەر تابىلىپ جاتىر.
قازىرگى كۇندەرى ىشكى ىستەر ورگاندارىندا جۇرگىزىلىپ جاتقان ۇيلەردەگى تىركەلمەگەن قارۋلاردى تاپسىرۋ جونىندەگى اكتسيانىڭ ءوزىن تابىس تابۋدىڭ بيزنەسىنە اينالدىرعان پىسىق جىگىتتەر تابىلىپ جاتىر.سولاردىڭ ءبىرى – الماتى وبلىسى قاراتال اۋدانىنىڭ كوپبىرلىك اتتى شالعايداعى اۋىلىندا تۇراتىن 29 جاسار ءسالىم ءاليمانوۆ ەسىمدى جىگىت گازەتتەن ءوتىپ جاتقان شارا تۋرالى وقىعان بويدا جاقىن ماڭداعى ەلدى مەكەندەرگە شۇعىل اتتانادى. بيزنەستىڭ جاڭا تۇرىنە بىلەك سىبانا كىرىسكەن ءوزى تۇراتىن بالقاش كولىنىڭ اۋماعىن ءبىراز شارلاپ, جەرگىلىكتى تۇرعىندار مەن بالىقشىلاردان تەگىس وقپاندى قارۋلارىن ارقايسىسىن 15 000 تەڭگەگە ساتىپ الا باستاعان. ول بار-جوعى 10 كۇننىڭ ىشىندە وسىلاي ءتۇرلى ۇلگىدەگى 12 تەگىس وقپاندى قارۋ جيناپ الادى دا, قاراتال اۋداندىق ىشكى ىستەر بولىمىنە وتكىزەدى. سول ءۇشىن پىسىق جىگىت بىردەن 399 861 تەڭگە تازا پايدا العان.
كول جاعاسىنداعى اۋىل جىگىتىنىڭ بۇل بيزنەسى قازىر كورشى قاراعاندى وبلىسىنا دا جەتىپتى. ءسويتىپ, بالقاشتىڭ كەلەسى بەتىندەگى قارۋى بار تۇرعىندار دا بۇعان تارتىلا باستاعان. الايدا, كوپ ۇزاماي بۇل داقپىرت پروكۋرورلاردىڭ قۇلاعىنا جەتىپ, ولار «الىپساتارلىقتىڭ» جولىن كەستى.
قاراتال اۋدانىنىڭ پروكۋرورى قۇرالبەك شويبەكوۆتىڭ سوزىنە قاراعاندا, زاڭسىز ساقتالىپ كەلگەن قارۋدى ەرىكتى تۇردە تاپسىرۋ ازاماتتاردى قىلمىستىق جاۋاپكەرشىلىكتەن بوساتادى. قىلمىستىق جاۋاپكەرشىلىكتەن بوساعاننان بولەك, وعان ەرىكتى تۇردە قارۋ تاپسىرعانى ءۇشىن ماتەريالدىق وتەماقى تولەنەدى. بىراق قارۋلاردى ءوز بەتىمەن ساتىپ الاتىنداي ءسالىم اليمانوۆقا ەشكىم قۇقىق بەرگەن جوق. بۇل جاعدايدا ول ازاماتتىق قارۋدى ساتىپ الۋ ءۇشىن ىشكى ىستەر ورگاندارىنان رۇقسات الۋ كەرەك ەكەن.
قاراتال اۋداندىق پروكۋراتۋراسى اۋداندىق ىشكى ىستەر ءبولىمىنىڭ باسشىسى اتىنا قارۋ ساتىپ الۋشىنى اكىمشىلىك جاۋاپكەرشىلىككە تارتۋ تۋرالى ۇسىنىس جولدادى.
رۋسلان يگىلىك.
