اۋدان ورتالىعى شۇبارقۇدىق كەنتىندەگى جاڭادان بوي كوتەرگەن قىزىلجار شاعىن اۋدانىندا تۇرعىندار سانىنىڭ وسۋىنە بايلانىستى جاڭا مەكتەپ قاجەتتىلىگى بىرنەشە جىل بويى ايتىلىپ جۇرەتىن. 2018 جىلى باستالعان مەكتەپ قۇرىلىسى وسى جاز ايىندا اياقتالادى دەپ جوسپارلانعانىمەن, كارانتيندە سىرتتان اكەلىنەتىن قۇرىلىس ماتەريالدارى دەر كەزىندە جەتكىزىلمەۋىنە بايلانىستى ۋاقىتتان كەشىگىپ قالدى. وقۋ ورنىنىڭ اشىلۋ سالتاناتىنا كەلگەن ءوڭىر باسشىسى وڭداسىن ورازالين تۇرعىنداردى قۇتتىقتاپ, مەكتەپتىڭ ءبىر كابينەتىنە روبوت قۇراستىرۋ تەحنيكالارىن سىيعا تارتتى.
تەمىر اۋدانىنىڭ تۇرعىنى, ارداگەر ۇستاز تەمىرحان ءادىلحان ۇلىنىڭ ايتۋىنشا, سوڭعى جىلدارى اۋىل مەن قالا مەكتەپتەرىنىڭ اراسىنداعى ايىرماشىلىق بىرتە-بىرتە جويىلىپ كەلەدى. ويتكەنى زاماناۋي كەشەندى مەكتەپ, جاقسى جابدىقتالعان وقۋ كابينەتتەرى, كومپيۋتەرمەن جابدىقتالۋ دەڭگەيى جانە ەڭ باستىسى ساپالى ينتەرنەت قالا مەن اۋىل مەكتەپتەرىنىڭ ءبىلىم دەڭگەيىن تەڭەستىرۋگە ەرەكشە مۇمكىندىك بەرەدى.
شۇبارقۇدىق كەنتىندەگى قىزىلجار شاعىن اۋدانىندا تۇراتىن مۇعالىم, بەس بالانىڭ اناسى رىسگۇل قوشتانبەكوۆا وسى مەكتەپكە قازاق ءتىلى مەن ادەبيەتى ءپانىنىڭ مۇعالىمى بولىپ جۇمىسقا ورنالاسقان. ول «وقۋشىلارىم بۇرىن الىستاعى مەكتەپكە قاتىناپ وقيتىن. قىستىڭ كۇندەرى كۇن سۋىقتا توڭىپ قالدى ما دەپ ساباقتان كەلگەنشە الاڭداپ وتىراتىنبىز. ەندى ءۇيدىڭ قاسىندا جاڭا مەكتەپ اشىلعاندا, بالالارىمىزدان بۇرىن ءوزىمىز ريزا بولىپ جاتىرمىز. اسىرەسە, مەكتەپتىڭ كەڭ دە ەڭسەلى سپورت زالىندا دەنە شىنىقتىرۋمەن تۇراقتى تۇردە اينالىسۋعا وتە قولايلى. تەك اتا-انالار بالالارىمىزدىڭ كىشكەنتاي كەزىنەن باستاپ سپورتپەن اينالىسۋىن قاداعالاپ وتىرۋىمىز كەرەك» دەيدى.
قىزىلجار مەكتەبى جانىنان سالىنعان 60 ورىندىق ينتەرنات تا – وسى توڭىرەكتەگى مەكتەبى جوق ادام سانى از اۋىلداردىڭ بالالارىنىڭ الاڭسىز ءبىلىم الۋى ءۇشىن جاسالعان ەرەكشە جاعداي.
اقتوبە
