ماسكەۋدە ۇلكەن تەاتر بالەتىنىڭ جەتەكشى ءسوليستى پاۆەل دميتريچەنكونى وسى مەكەمەنىڭ كوركەمدىك جەتەكشىسى سەرگەي ءفيليننىڭ دەنساۋلىعىنا قاستاندىقپەن زيان كەلتىرگەنى ءۇشىن التى جىلعا باس بوستاندىعىنان ايىرۋ جونىندە ۇكىم شىعارىلدى. بۇل تۋرالى «ارگۋمەنتى ي فاكتى» گازەتى ماسەلە كوتەرىدى.
بۇدان بۇرىن سوت ۇلكەن تەاتردىڭ كوركەمدىك جەتەكشىسى سەرگەي ءفيليننىڭ دەنساۋلىعىنا قاستاندىقپەن زيان كەلتىرگەنى ءۇشىن پاۆەل دميتريچەنكو, يۋري زارۋتسكي مەن اندرەي ليپاتوۆتى ايىپتى دەپ تانىعان بولاتىن. ريا «نوۆوستي» حابارلاعانداي, زارۋتسكي ون, ال ليپاتوۆ ءتورت جىلعا باس بوستاندىعىنان ايىرىلدى.
ماسكەۋدە سەرگەي فيلينگە قاستاندىقپەن شابۋىل جاسالعان ەدى. قاسكويلەر كوركەمدىك جەتەكشىنىڭ بەتىنە قىشقىل سۇيىقتىق شاشىپ جىبەرگەن. بەتى مەن كوزى جاراقاتتانعان ول قالالىق اۋرۋحاناعا جەتكىزىلدى. ول جەردەن شىققان سوڭ فيلين دەنساۋلىعىن وڭالتۋ ماقساتىندا گەرمانياعا اتتاندى. كورۋ قابىلەتىن قالپىنا كەلتىرۋ ءۇشىن بالەتمەيستەر جالپى 20 وپەراتسيانى باستان وتكەرىپ شىقتى.
پروكۋراتۋرا سوتتان شابۋىلدى ۇيىمداستىرعانى ءۇشىن دميتريچەنكونى 9, ال بولجام بويىنشا قىلمىستى جاساعان زارۋتسكيدى 10 جىلعا باس بوستاندىعىنان ايىرۋىن سۇراعان بولاتىن.
سوت ءفيليننىڭ وتەماقى جونىندەگى شاعىمىن قاناعاتتاندىردى. ايىپتىلار وعان 3,5 ملن. رۋبل تولەيتىن بولدى.
ايدار ورىسباەۆ.
دەرەككوز: Aif.ru
