ءار ادام ءۇشىن كىندىك قانى تامعان مەكەن – وتان. ال كەي ادامعا اۋەلدەن جات كورىنگەن مەكەن ۋاقىت وتە كەلە ءھام عۇمىرىنا گۇل بىتىرگەن ءبىرشاما مەزەتتەن سوڭ تۋعان وتانىنداي بولىپ كەتەدى. بۇل – ومىرلىك زاڭدىلىق.
ءار ادام ءۇشىن كىندىك قانى تامعان مەكەن – وتان. ال كەي ادامعا اۋەلدەن جات كورىنگەن مەكەن ۋاقىت وتە كەلە ءھام عۇمىرىنا گۇل بىتىرگەن ءبىرشاما مەزەتتەن سوڭ تۋعان وتانىنداي بولىپ كەتەدى. بۇل – ومىرلىك زاڭدىلىق.
ەرتىستى جار جاعالاي ورىن تەپكەن بەسقاراعاي اۋىلىنىڭ اۋىل بولعانىنا سەكسەن جىلدان اسىپ بارادى. زاماننىڭ اۋمالى-توكپەلى وزگەرىستەرىن دە, الاۋلاعان-جالاۋلاعان قۋانىشتارىن دا, قيناعان-ىڭىرانعان كەساپاتتارىن دا باسىنان وتكەردى بۇل ەلدى مەكەن. دەگەنمەن دە, ۇيىعان ايرانداي اۋىل تۇعىردان تۇسپەي كەلەدى, تۇسپەيدى دە.
تۇپكىلىكتى تۇرعىندار قازاقتارمەن قاتار, وزگە ۇلت وكىلدەرىنە دە بەسقاراعاي باۋرايى باۋىرمال جىلى قۇشاعىن ايقارا اشتى. شاراپات پەن شاپاعاتىن بىردەي بەردى. سوناۋ سۇراپىل سوعىس جىلدارى, ءتىپتى, ودان ءسال بۇرىنىراقتاۋ ساياسي قۋعىن-سۇرگىن جىلدارى وسىناۋ مەكەنگە نەمىس, چەشەن ۇلتىنىڭ وكىلدەرى كۇشتەپ كوشىرىلسە, حح عاسىردىڭ 50-جىلدارىنىڭ ەنشىسىندە قالعان تىڭ يگەرۋ جىلدارى ورىس, ۋكراين, ت.ب. ۇلت وكىلدەرى بەسقاراعايعا قۇت ىزدەپ قونىستاندى.
اۋىلدىڭ وسى كۇنگى ەگدە تۇرعىندارىن تىڭداپ وتىرساڭ, شەجىرەگە بەرگىسىز قىزىقتى اڭگىمەگە قانىق بولاسىڭ. وزگە ۇلت وكىلدەرى وزدەرىمەن بىرگە ءوز ۇلتىنىڭ سالت-ءداستۇرىن, ادەت-عۇرپىن, دىلدىك الەۋمەتىن الا كەلىپ, قالىپتى قازاقىلىققا جاڭاشا ءار بەردى. ءۇي-تام سوعۋدىڭ وزىندىك ۇلگىلەرىن كىرگىزدى. ورىس, ۋكراين, چەشەن, نەمىس تىلدەرى, ولاردىڭ كوركەم ونەرى قازاق اراسىنا تاراپ, حالىق بىرلىگىنىڭ بىرەگەي ۇلگىسىنە اينالدى. ۇلتتاردىڭ ەتەنە ارالاسىپ كەتكەنى سونشالىق, بارا-بارا ارالاس وتباسىلار دا شاڭىراق كوتەردى. ولاردان ءۇرىم-بۇتاق تارادى.
ال بەسقاراعاي اۋىلىنىڭ قايتالانباس تاريحىنا ءوز ەڭبەگىمەن قوسقان وزگە ۇلت وكىلدەرىنىڭ قوماقتى ۇلەسىن قازىرگىنىڭ ەگدە شىراقتارى ەش ۇمىتپايدى. زەردەلەسەك, ەل-ەلىمىزدىڭ, جەر-جەرىمىزدىڭ وزگە سۇيسىنەرلىكتەي, وزگەگە ۇلگى بولارلىقتاي جاسامپازدىعى ۇلت- ۇلىستار ىنتىماق-بىرلىكتى باۋىرمالدىعىندا ەكەن-اۋ.
بەگىمبەك كەرىمحان ۇلى.
پاۆلودار وبلىسى,
لەبياجى اۋدانى,
بەسقاراعاي اۋىلى.
