پرەزيدەنت • 04 جەلتوقسان، 2020

پرەزيدەنت مەملەكەتتىك قىزمەت ىستەرى اگەنتتىگىنىڭ توراعاسىن قابىلدادى

32 رەت كورسەتىلدى

مەملەكەت باسشىسىنا اگەنتتىكتىڭ بيىلعى اتقارعان قىزمەتىنىڭ نەگىزگى قورىتىندىلارى جانە پرەزيدەنت تاپسىرمالارىنىڭ ورىندالۋى تۋرالى ەسەپ بەرىلدى. بۇل تۋرالى اقوردانىڭ ءباسپاسوز قىزمەتى حابارلادى.

قاسىم-جومارت توقاەۆقا 2021 جىلدىڭ باسىندا وتەتىن پرەزيدەنتتىك كادر رەزەرۆىنىڭ ەكىنشى ىرىكتەۋىنە دايىندىق جۇمىستارى تۋرالى اقپارات بەرىلدى. ىرىكتەۋدەن 50 ادام وتەدى. انار جايىلعانوۆا ۇمىتكەرلەرگە قويىلاتىن كريتەريلەر مەن بىلىكتىلىك تالاپتارىنىڭ كۇشەيتىلگەنى تۋرالى ايتتى. رەزەرۆتى جاساقتاۋ كەزىندە قوعامدىق مۇددەلەردى نەگىزگە الاتىن تۇلعالارعا باسىمدىق بەرىلىپ، وزگەرىستەر جونىندە ناقتى تاجىريبەسى بار زاماناۋي باسشىلاردى انىقتاۋعا ءمان بەرىلەدى.

مەملەكەت باسشىسى ەڭ ۇزدىك ۇمىتكەرلەردى تاڭداۋ ءۇشىن ىرىكتەۋ جۇمىستارىن ساپالى ءارى اشىق وتكىزۋدىڭ ماڭىزدى ەكەنىن اتاپ ءوتتى.

سونىمەن قاتار اگەنتتىك توراعاسى مەملەكەتتىك قىزمەتكە ىرىكتەۋ جۇيەسىن جەتىلدىرۋ ىسىنە دە توقتالدى. ونىڭ ايتۋىنشا، وسى باعىت اياسىندا باسشىلىق جانە اتقارۋشىلىق قىزمەتتەرگە قويىلاتىن قۇزىرەتتەردى انىقتاۋ ءۇشىن تەستىلەۋ ەمەس، سۇحبات وتكىزۋ ۇسىنىلىپ وتىر. بۇل ىرىكتەۋدىڭ ساپاسىن ارتتىرۋعا مۇمكىندىك بەرەدى.

پرەزيدەنتكە مەملەكەتتىك اپپاراتتى قىسقارتۋ، مەملەكەتتىك ساياسي قىزمەتتى كاسىبيلەندىرۋ، مەملەكەتتىك باسقارۋ ۇدەرىسىن تسيفرلاندىرۋ جونىندەگى جۇمىستار تۋرالى دا باياندالدى.

قاسىم-جومارت توقاەۆ انار جايىلعانوۆاعا اگەنتتىك جۇمىسىنىڭ نەگىزگى باعىتتارى بويىنشا تاپسىرمالار بەردى.

سوڭعى جاڭالىقتار

ۇقساس جاڭالىقتار