بۇگىن, استانا قالاسىنداعى «نۇرساۋلەت» بيزنەس ورتالىعىنىڭ ءماجىلىس زالىندا «جاسىل ايماق» رەسپۋبليكالىق مەملەكەتتىك كاسىپورنىنىڭ باس ديرەكتورى جۇماتاي سۇيىندىكوۆ ءوزىنىڭ ايىپتالۋشى ۇلىنا قاتىستى بۇقارالىق اقپارات قۇرالدارى وكىلدەرىنە ءباسپاسوز ءماسليحاتىن وتكىزدى. بۇل تۋرالى Egemen.kz ءتىلشىسى حابارلادى.
وسىعان دەيىن بىرقاتار باسىلىمداردا ج. سۇيىندىكوۆتىڭ ۇلىنا قاتىستى ءبىراز حابارلار جاريالانعان بولاتىن. سولاردىڭ كەيبىرەۋلەرىندە «بەلدى ازاماتتىڭ «التىن ۇلى» قىز زورلادى دەپ تە جازىلدى. جاريالانعان اقپارعا تۇسىنىكتەمە بەرۋگە كەلگەن ج. سۇيىندىكوۆ ءوز ماقساتى جايىندا اشىپ ايتتى. «مەن, بىرىنشىدەن, ەلىمىزدىڭ قاراپايىم قىزمەتكەرىمىن. سەنسەڭىزدەر, ءالى كۇنگە دەيىن شەتەلگە بارىپ دەم العان ەمەسپىن. ۋاقىتىمنىڭ ءبارى ەلوردانى كوركەيتۋگە ارنالىپ جاتىر. بۇگىنگە دەيىن باس قالا اينالاسىنداعى 65 مىڭ گەكتار جەردى ورماندى القاپقا اينالدىردىق. باستى مىندەت - قورشاعان ورتانىڭ ەكولوگيالىق تازالىعىن ساقتاۋ. وسىنداي مىندەتتەردى العا قويعان ازاماتقا سوڭعى كەزدە ايتىلعان ءجونسىز ايىپتاۋلار مەنىڭ ءباسپاسوز ءماسليحاتىن وتكىزۋىمە تۇرتكى بولدى. اركىمنىڭ ارى قىمبات. ءوزىم جانە وتباسىم اتىنا ايتىلعان جاڭساق پىكىرلەر جان-دۇنيەمىزدى جەگىدەي جەدى. ال ۇلىم ايىپتى بولسا, ونى زاڭ ورگاندارى جازالايدى. سوندىقتان جۋرناليستەردەن بۇل ماسەلە تۋرالى جازعاندا, ادىلدىككە جۇگىنۋدى سۇرايمىن. ال مەن ءىستىڭ اق-قاراسىنا دەيىن جەتۋ ءۇشىن بار ءبىلىمىم مەن تاجىريبەمدى ايانباي جۇمسايمىن», - دەدى ول ءسوز باسىندا.
ەستەرىڭىزدە بولسا, 2011 جىلدىڭ ساۋىرىندە ج. سۇيىندىكوۆتىڭ ۇلى مۇرات پەن ونىڭ قاسىندا ءبىر پاتەردە بولعان مۇرات ءتۇسىپوۆ قىز زورلادى دەگەن ايىپپەن قۇقىق قورعاۋ قىزمەتكەرلەرىنىڭ قولىنا تۇسكەن. ايىپتالۋشى جاقتىڭ ايتۋىنا قاراعاندا, قۇقىق قورعاۋ قىزمەتكەرلەرى العاشىندا مۇرات سۇيىندىكوۆتى 4 كۇنگە قاماپ, ەشقايدا كەتپەۋ قولحاتىمەن بوساتىپ جىبەرگەن. سوسىن بيىلعى جىلى قايتادان قاماۋعا الادى. وسى ارالىقتا بىرنەشە سوت وتىرىسى بولىپ, سوڭعىسىندا 2013 جىلدىڭ 15 ساۋىرىندە سارىارقا اۋداندىق سوتىنىڭ سۋدياسى مۇرات سۇيىندىكوۆتى - 6 جىلعا, ال ونىڭ قاسىندا بولعان ايىپكەر مۇرات ءتۇسىپوۆتى 8 جىلعا باس بوستاندىعىنان ايىرۋعا ۇكىم شىعارادى.
الايدا, ءباسپاسوز ءماسليحاتىندا ج. سۇيىندىكوۆ پەن ۇلىنىڭ قورعاۋشىسى قايرات كۇسپەكوۆ اپپەلياتسيالىق سوتقا قايتادان شاعىم تۇسىرەتىنىن مالىمدەدى. «العاشقى جۇرگىزىلگەن ساراپتامادا ايعاقتى زاتتاردان قىزدى زورلاۋ بەلگىسى انىقتالماعان. ال 5 ايدان سوڭ جابىرلەنۋشى زاڭ ورىندارىنا ءوزىنىڭ ىشكيىمىن اكەلىپ كورسەتكەن. وسى كەزدەگى جاسالعان ساراپتاما قاعازىندا باسقا نارسە ايتىلادى. مۇنداي كەرەعار تۇجىرىممەن ءبىز كەلىسە المايمىز», - دەيدى قورعاۋشى ق. كۇسپەكوۆ.
ەندى قوزعالىپ وتىرعان بار كىلتيپان وسى ساراپتامالارعا قاتىستى سەكىلدى. ايىپتالۋشىنىڭ اكەسى ج. سۇيىندىكوۆ اڭگىمە رەتىندە بالاسىنىڭ جازاعا تارتىلۋىن ءوزىن جەك كورەتىندەردىڭ ءىس-ارەكەتىمەن بايلانىستىردى. ال كۇدىكتى م. سۇيىندىكوۆتىڭ تۋىسى ەركەبۇلان سۇيىندىكوۆ جابىرلەنۋشى قىزدىڭ سوزىندە تۇرماعانىن ايتتى. «سەنىڭ باۋىرىڭ مەنى زورلادى. مەنىڭ اكەم باس پروكۋراتۋرادا قىزمەت اقتارادى. سوندىقتان بۇل ءىستى اياقسىز قالدىرمايدى. ءىستىڭ جابىلعانىن قالاساڭىز, مەنىڭ قولىما 800 مىڭ دوللار ۇستاتاسىز. ولاي بولماعان جاعدايدا, باۋىرىڭىز قامالادى دەپ جابىرلەنۋشى قىز ۇرەيىمىزدى ۇشىردى», - دەدى ول.
وسى قوڭىراۋدان كەيىن ەركەبۇلان جابىرلەنۋشىمەن كەزدەسىپ, وعان ءمىنىپ جۇرگەن «تويوتا» ماشينەسىن نوتاريۋس ارقىلى بەرەدى. جابىرلەنۋشى قىز كولىكتىڭ قۇنىن 25 مىڭ دوللارعا باعالاپتى. ال اقشانىڭ قالعان بولىگى - 5 مىڭ دوللاردى ەركەبۇلان قولما-قول بەرگەن. بىراق جابىرلەنۋشى وسىلاردى الىپ العاسىن, ىشكى ىستەر دەپارتامەنتىنە قايتا ارىز جازعان.
ءباسپاسوز ءماسليحاتىنىڭ سوڭىندا «شاڭىراق» رەسپۋبليكالىق قوعامدىق بىرلەستىگىنىڭ باسقارما توراعاسى ماحامبەت ءابجان جۋرناليستەرگە مىنا جايدى باسا ايتتى: «اركىمنىڭ قورعانۋعا قۇقى بار. دەگەنمەن, جەكە باسقا ءجونسىز كىر جاعۋعا بولمايدى. سول سەبەپتى مۇرات سۇيىندىكوۆتىڭ اكەسى ادىلدىككە جۇگىنگەلى وتىر. ويتكەنى, قورعاۋشىلاردىڭ سوزىنەن ءمالىم بولعانىنداي, جابىرلەنۋشى قىزدىڭ ىشكيىم تۇسىنە بايلانىستى ايتىپ كەلگەن پىكىرلەرى ءبىر-بىرىمەن سايكەس كەلمەيدى. ەكىنشىدەن, باستاپقى ساراپتامادا زورلىق بەلگىسىنىڭ بولماعانى كورسەتىلگەن».
جيىندا ايىپتالۋشى جاقتىڭ ايتقان ۇستانىمى - ادىلدىكتىڭ تۇبىنە جەتۋ. سوندىقتان ءبىز ازىرگە ناقتى قورىتىندى جاساي المايمىز. بۇل رەتتە جابىرلەنۋشى قىزدىڭ ءوز پىكىرىن ايتۋعا دا قۇقى بار...
باقىتبەك كەنەش ۇلى.
دەرەككوز: «Egemen.kz».
