تايلاند استاناسىندا وپپوزيتسيونەرلەر نارازىلىق اكتسيالارىن قايتا جانداندىردى. بۇل تۋرالى تيار-تاسس حابارلادى.
بانگكوكتا ەرەۋىلشىلەر ۇكىمەت ءۇيىن تاعى دا شابۋىل ارقىلى باسىپ الماق بولعان. سوداي-اق ولار قۇقىق قورعاۋ ورگاندارى مەكەمەسىنىڭ اينالاسىنا جينالا باستادى. وپپوزيتسيونەرلەر تاعى بىرقاتار ۇكىمەتتىك مەكەمەلەردى باسىپ الۋعا ارەكەت ەتەتىندەرىن العا تارتتى.
بانگكوكتاعى جەرگىلىكتى باسقارۋ مەكەمەسى ماڭىندا پوليتسيا ەرەۋىلشىلەرگە قارسى كوز جاساۋراتاتىن گاز قولداندى. كۋاگەرلەردىڭ ايتۋى بويىنشا, پوليتسيامەن قاقتىعىسقا تۇسكەن وپپوزيتسيونەرلەر كەيىن شەگىنگەن.
وپپوزيتسيونەرلەر تايلاند قارجى مينيسترلىگى عيماراتىن باسىپ العان. بيلىك بۇل عيماراتتى ءوز باقىلاۋلارىنا قايتارۋ ءۇشىن ارناي وپەراتسيا جۇرگىزەتىندەرىن ەسكەرتكەن بولاتىن. الايدا, وپپوزيتسيا وكىلدەرى مەكەمەنى بوساتۋدان باس تارتۋدا. ءتىپتى مۇندا قازىر ەرەۋىلشىلەر شتابى ورنالاسقان ەكەن.
جەكسەنبى كۇنى تايلاند ۇكىمەتى قاۋىپسىزدىك ماقساتىندا بانگكوك تۇرعىندارىن بىرنەشە ساعات ۇيلەرىنەن شىقپاۋعا شاقىردى. ول كۇنى قالادا كۇشتىك قۇرىلىمدار ارنايى وپەراتسيا جۇرگىزۋى ءتيىس ەدى. 1 جەلتوقسان كۇنى تايلاند پرەمەر-ءمينيسترى ينگلاك چيناۆات وپپوزيتسيا جەتەكشىسى سۋتەپ تاۋگسۋبانمەن كەزدەستى. وپپوزيتسيونەردىڭ ايتۋى بويىنشا, ول پرەمەردەن ەكى كۇن ىشىندە بيلىكتى حالىقتىڭ قولىنا وتكىزۋدى تالاپ ەتكەن. الايدا, ول ينگلاك چيناۆاتتان قانداي دا ءبىر جاۋاپ الا الماعان كورىنەدى.
ايدار ورىسباەۆ.
دەرەككوز: Itar-tass.com
