ساياسات • 04 جەلتوقسان، 2020

ۆەدومستۆولىق كەڭەستىڭ وتىرىسى

6 رەت كورسەتىلدى

ەڭبەك جانە حالىقتى الەۋمەتتىك قورعاۋ مينيسترلىگىندە الەۋمەتتىك جۇمىستىڭ باسىم باعىتتارى ماسەلەلەرى جونىندەگى ۆەدومستۆوارالىق كەڭەستىڭ وتىرىسى ءوتتى.

كەڭەستە ۆەدومستۆو وكىلدەرى بەي­نە­­كونفەرەنتسبايلانىس رەجى­مىندە ەلىمىزدە الەۋمەتتىك قىزمەت كور­سەتۋدى ودان ءارى جاڭعىرتۋدىڭ 2025 جىلعا دەيىنگى ۇلتتىق جوس­پارىنىڭ جوباسىن، ارناۋلى الەۋ­مەتتىك قىزمەتتەر سالاسىن جان باسىنا نورماتيۆتىك قارجىلاندىرۋعا كوشۋ تاسىلدەرىن، الەۋمەتتىك قام­سىز­­داندىرۋ كودەكسىنىڭ «الەۋ­مەت­تىك قىزمەتكەرلەردىڭ وڭ مارتەبەسى» ءبو­لى­مىن جۇرتشىلىققا تانىستىردى.

ءىس-شارا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆتىڭ توراعالىعىمەن جانە بالا قۇقىقتارى جونىندەگى ۋاكىل ارۋجان ساين، جەرگىلىكتى ات­قارۋشى ورگاندار، ەلىمىزدىڭ مەدي­تسينالىق-الەۋمەتتىك مەكەمەلەرى، الەۋ­مەتتىك جۇمىستىڭ باسىم با­عىت­تارى ماسەلەلەرى جونىن­دەگى ۆەدومستۆوارالىق كەڭەس، ەكونو­ميكالىق جانە ساپالى جۇمىسپەن قامتۋ، الەۋمەتتىك وڭالتۋ، الەۋمەت­تىك قىزمەتتەر جۇيەسىن جەتىلدىرۋ ماسەلەلەرى جونىندەگى ۇيلەستىرۋ كەڭەسى مەن جۇمىس توبى وكىلدەرىنىڭ قاتىسۋىمەن ءوتتى.

ونلاين-كونفەرەنتسيا بارىسىندا ا.ساين قازىر اۋقىمدى جۇيەلى وزگەرىستەر بولىپ جاتقانىن، ولاردىڭ ۇلتتىق جوسپاردا كورىنىس تاپقان اتاپ ءوتتى. ء«بىز بالالاردىڭ مۇگەدەكتىگىن ازايتۋ جونىندەگى جول كارتاسىن – سكرينينگتىك دياگنوستيكا ساتىسىندا قاجەتتى مەديتسينالىق جانە تۇزەتۋ-پەداگوگيكالىق كومەك الۋ ءۇشىن قازاقستاندا مۇمكىندىگى شەكتەۋلى بالالارعا كەشەندى كومەك كورسەتۋدى جەتىلدىرۋ جونىندەگى 2021-2023 جىلدارعا ارنالعان جول كارتاسىن قابىلدادىق. بۇل بالالاردىڭ تولەمدەرگە، تەحنيكالىق وڭالتۋ قۇرال­­دارىنا جانە الەۋمەتتىك قىز­مەتتەرگە مۇقتاج بولۋىن تومەن­دەتۋگە ىقپال ەتۋگە ءتيىس. جول كار­­تا­سى 3 جىلعا ەسەپتەلگەن، ونى كەلەسى جىلدان ىسكە اسىرا باستايمىز. بارلىق مۇددەلى ورگاننىڭ قولداۋىنا ءۇمىت ارتامىز، ويتكەنى بۇل – ءبىزدىڭ ورتاق ءىسىمىز. شەشىلۋى قاجەت ماڭىزدى مىندەتتەردىڭ ءبىرى – الەۋمەتتىك سالا قىزمەتكەرلەرىنىڭ مارتەبەسى مەن جاعدايى. ەگەر ءسىز كاسىبي كادرلاردى تارتپاساڭىز، ادام­داردى ءوز جۇمىسىنا ادال بولۋ­عا ىنتالاندىرماساڭىز، جۇ­يە­دە بىردەڭەنى وزگەرتۋ قيىنعا سوعا­دى. سوندىقتان الەۋمەتتىك قىزمەت­كەر­لەردىڭ جالاقىسىن كوتەرۋدى تولىقتاي قۇپتايمىن جانە مۇنىڭ مۇمكىندىگىنشە تەزىرەك بولعانىن قالايمىن»، دەدى ا.ساين.

سونداي-اق كەڭەس بارىسىندا ۇلتتىق جوسپار جوباسىنىڭ تا­نىس­تىرىلىمى بويىنشا اتال­عان مينيسترلىكتىڭ الەۋمەت­تىك قىز­مەتتەر ساياساتىن دامىتۋ دە­پار­تامەنتىنىڭ ديرەكتورى دامەجان سادۋاقاسوۆا ءسوز سويلەدى. «مەملەكەت باسشىسىنىڭ بىل­تىر­عى 2 قىركۇيەكتەگى «سىندار­لى قوعامدىق ديالوگ – قازاق­ستان­نىڭ تۇراقتىلىعى مەن وركەندەۋىنىڭ نەگىزى» اتتى جولداۋىن ورىنداۋ اياسىندا «وتباسى جانە بالا ينستيتۋتىن قولداۋ، ينكليۋزيۆتى قوعام قۇرۋ» باعىتى بەلگىلەنگەنىن اتاپ وتكىم كەلەدى. وسى جۇمىس شەڭبەرىندە بىزدە الەۋمەتتىك جۇمىس ماسەلەلەرى جونىندەگى ۆەدومستۆوارالىق كەڭەس جۇمىس ىستەيدى، الەۋمەتتىك جۇمىس جونىندەگى ۇلتتىق رەسۋرستىق ورتا­لىق قۇرىلدى، الەۋمەتتىك قىزمەت­تەر پورتالى ەنگىزىلدى جانە بارلىق وڭىردە وتباسىن قولداۋ ورتالىقتارى قۇرىلدى»، دەدى سپيكەر. جان باسىنا شاققانداعى نورما­تيۆتىك قارجىلاندىرۋعا كوشۋگە قاتىستى د.سادۋاقاسوۆا مۇنداي مودەل بالاباقشالاردا، مەكتەپتەردە، ەمحانالاردا جانە ت.ب. ىسكە اسىرىلعانداي «اقشا كليەنتتىڭ سوڭىنان ەرەدى» قاعيداتىن ىسكە اسىرۋعا مۇمكىندىك بەرەتىنىن ايتتى.

سونىمەن قاتار الەۋمەتتىك قامسىز­داندىرۋ كودەكسىنىڭ «الەۋ­مەتتىك قىزمەتكەرلەردىڭ وڭ مارتە­بەسى» تاراۋىن تانىستىرعان ۆە­دومستۆونىڭ الەۋمەتتىك كومەك سايا­ساتىن دامىتۋ دەپارتامەنتىنىڭ ديرەك­تورى اسقار نيازوۆ الەۋمەت­تىك قىز­مەتكەر مارتەبەسىن ارتتىرۋ ءۇشىن بىرقاتار شارا قا­بىل­دا­ناتىنىن جەتكىزدى. اتاپ اي­ت­قاندا، «الەۋمەتتىك قىزمەتكەر» ۇعى­­مى اي­قىندالىپ، مارتەبەسى زاڭ­نا­ما­لىق تۇردە بەكىتىلەدى، تىركەۋ جانە اتتەستاتتاۋ ارقىلى الەۋمەتتىك قىز­مەتكەرلەردى ەسەپكە الۋ جولعا قويىلادى، بىلىكتىلىك ساناتتارىن بەرۋگە قويىلاتىن تالاپتار ارتادى، كادرلاردى دايارلاۋ جانە ۇزدىكسىز ءبىلىم بەرۋ دەڭگەيى جەتىلدىرىلەدى.

قازىرگى ۋاقىتتا ەلىمىزدە الەۋ­­مەتتىك قىزمەتكەرلەر تەستى­لەۋ­دەن ءوتىپ جاتىر. بيىل 5 جەل­توق­سانعا دەيىن شامامەن 12 مىڭ ادامدى سىناقتان وتكىزۋ جوسپار­لانۋدا. تەستىلەۋ الەۋمەتتىك قىز­­مەتكەرلەردىڭ بازالىق ءبىلىم دەڭ­گەيىن انىقتاۋ ءۇشىن وتكىزىلەدى، سودان كەيىن ولاردى وقىتۋ جۇر­گىزىلەدى. بۇل قازاقستاندا الەۋ­مەت­تىك قىزمەت كورسەتۋدى ودان ءارى جاڭعىرتۋدىڭ 2025 جىلعا دەيىنگى ۇلتتىق جوسپارىنىڭ جوباسىندا قاراستىرىلعان.

 

سوڭعى جاڭالىقتار

ۇقساس جاڭالىقتار