مىسىر كونستيتۋتسيالىق كوميسسياسى ەلدىڭ نەگىزگى زاڭىن جەتىلدىرىپ شىعاردى. بۇل تۋرالى يتار-تاسس حابارلادى.
جەكسەنبى كۇنى مىسىر كونستيتۋتسيالىق كەڭەسىنىڭ باسشىسى امر مۋسا مالىمدەگەندەي, 3 جەلتوقساندا كونستيتۋتسيا جوباسى ەلدىڭ ۋاقىتشا پرەزيدەنتى ادلي مانسۋرعا قول قويۋعا بەرىلەدى. مەملەكەت باسشىسىندا نەگىزگى زاڭنىڭ جەتىلدىرىلگەن نۇسقاسىن رەفەرەندۋمعا شىعارۋعا ءبىر اي ۋاقىت بار.
نەگىزگى زاڭدا كونستيتۋتسيانىڭ قابىلدانۋىنان كەيىن التى اي ىشىندە سايلاۋ ءوتۋ كەرەكتىگى جازىلعان. سونداي-اق كوميسسيا پارلامەنت سايلاۋىنان بۇرىن پرەزيدەنتتىك سايلاۋدى وتكىزۋ جونىندە تۇزەتۋ ەنگىزدى.
مىسىر اسكەرىنىڭ قابىلداعان «جول كارتاسى» بويىنشا, ەلدە الدىمەن جاڭا كونستيتۋتسيا جوباسى تۋرالى رەفەرەندۋم وتكىزىلىپ, كەلەسى جىلدىڭ كوكتەمىندە پارلامەنتتىك ال جازىندا پرەزيدەنتتىك سايلاۋ ءوتۋى ءتيىس ەدى.
داۋىس بەرۋ بارىسىندا, سايلاۋدى «جول كارتاسى» تارتىبىمەن وتكىزۋدى كوميسسيانىڭ 28 وكىلى قولداعان. قالعاندارى الدىمەن پرەزيدەنتتىك, سودان كەيىن بارىپ پارلامەنتتىك سايلاۋ وتكىزۋدى قولداپ وتىر.
ايدار ورىسباەۆ.
دەرەككوز: Itar-tass.com
