باق وكىلدەرىن 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنى مەرەكەسىمەن قۇتتىقتاعان قحا توراعاسىنىڭ ورىنباسارى جانسەيىت تۇيمەباەۆ مەملەكەت ساياساتىن اقپاراتتىق تۇرعىدان قولداۋعا, قوعامدىق كەلىسىم مەن جالپىۇلتتىق بىرلىكتى نىعايتۋعا, قازاقستان حالقى اسسامبلەياسىنىڭ قىزمەتىن ناسيحاتتاۋعا ۇلەس قوسىپ جۇرگەن جۋرناليستەرگە العىسىن ايتتى.
– تۇڭعىش پرەزيدەنتىمىز نۇرسۇلتان نازارباەۆتىڭ كوشباسشىلىعىمەن ەلىمىز الەمنىڭ ساياسي كارتاسىنان لايىقتى ورىن الىپ, بيىك حالىقارالىق بەدەلگە يە بولدى. تاۋەلسىزدىكتىڭ 30 جىلى ىشىندە جۇزەگە اسقان بارلىق رەفورم مەن ماڭىزدى باعدارلامالار, ەلىمىزدىڭ قول جەتكەن تابىستارى جۋرناليستەر نازارىنان تىس قالعان ەمەس. قازاقستان حالقى اسسامبلەياسى جىل سايىن مەملەكەت ساياساتىن اقپاراتتىق تۇرعىدان قولداۋعا, قوعامدىق كەلىسىم مەن جالپىۇلتتىق بىرلىكتى نىعايتۋعا بەلسەندى ۇلەس قوسىپ جۇرگەن جۋرناليستەردى قولداۋ ماقساتىندا «شاڭىراق» رەسپۋبليكالىق بايقاۋىن وتكىزۋدى داستۇرگە اينالدىرعان, – دەدى.
قۇتتىقتاۋ ءسوز بارىسىندا جانسەيىت قانسەيىت ۇلى جۋرناليستەردىڭ قوعام ومىرىندەگى ماڭىزى مەن الەۋەتىنە دە كەڭىنەن توقتالدى.
– وسى ورايدا وتاندىق جۋرناليستيكا قوعامدىق كەلىسىمدى دامىتۋ, ارانداتۋشى اقپاراتتارعا قارسى يممۋنيتەتتى قالىپتاستىرۋ جانە قوعام بىرلىگىن ساقتاۋ تاقىرىپتارىن ءجيى كوتەرۋى ءتيىس. مەملەكەتتىك ءتىلدىڭ مارتەبەسىن كوتەرۋ مەن مەملەكەت ساياساتىن حالىققا ءتۇسىندىرۋ ماسەلەسىندە دە قولىنا قالام ۇستاعان اعايىننىڭ اتقاراتىن ءرولى ايرىقشا. ءبىز ءار ۋاقىتتا بارلىق باق وكىلدەرىمەن تىعىز قارىم-قاتىناستا جۇمىس ىستەۋگە كۇش سالىپ كەلەمىز. وسى رەتتى پايدالانا وتىرىپ, سىزدەردىڭ تاراپتارىڭىزدان كورسەتىلىپ جاتقان اقپاراتتىق قولداۋ ءۇشىن العىس بىلدىرەمىن, – دەدى ج.تۇيمەباەۆ.
بايقاۋ قورىتىندىسى بويىنشا گران-پري «قازاقپارات» حالىقارالىق اقپارات اگەنتتىگىنە تابىستالدى. بۇل ارنايى ماراپاتتىڭ جۇلدە قورى – 350 مىڭ تەڭگە. 1-ورىن «اباي» تەلەارناسىنداعى ء«ساراسوز» باعدارلاماسىنىڭ جۇرگىزۋشىسى ەلەنا ابدىحالىقوۆاعا, «الماتى» تەلەارناسى ديرەكتورىنىڭ ورىنباسارى راليدا مۇقانوۆاعا جانە «قازاق ءۇنى» گازەتىنىڭ باس رەداكتورى قازىبەك يساعا بەرىلدى. ال «قازاق گازەتتەرى» سايتىنىڭ رەداكتورى بەرىك بەيسەن ۇلى, «كازاحستانسكايا پراۆدا» گازەتىنىڭ الماتى قالاسىنداعى ءتىلشىسى ايگۇل تۇرىسبەكوۆا جانە «Kazakh-TV» ارناسىنىڭ ءتىلشىسى جەڭىس ەرمۇقانوۆتار 2-ورىنعا يە بولدى. 3-ورىنعا «انا ءتىلى» رەسپۋبليكالىق گازەتىنىڭ باس رەداكتورى جاناربەك ءاشىمجان, «Egemen Qazaqstan» گازەتىنىڭ ءتىلشىسى سۆەتلانا قوجاقۇلوۆا جانە «حابار-24» ارناسى جاڭالىقتار ءبولىمىنىڭ ءتىلشىسى قورعانبەك كوپەي لايىق دەپ تانىلدى. سونىمەن قاتار 1-ورىن يەگەرلەرىنە – 300, 2-ورىن يەگەرلەرىنە – 200, 3-ورىن يەگەرلەرىنە 150 مىڭ تەڭگە كولەمىندە اقشالاي سىيلىق تابىس ەتىلدى.
سونداي-اق بىرقاتار اقىن, جۋرناليست, قوعام قايراتكەرلەرى «قازاقستان حالقى اسسامبلەياسىنا- 25 جىل» مەدالىمەن جانە «مەيىرىم» توسبەلگىسىمەن ماراپاتتالدى.
ءىس-شاراعا ەتنومادەني بىرلەستىك وكىلدەرى, اسسامبلەيا مۇشەلەرى جانە رەسپۋبليكالىق باق باس رەداكتورلارى قاتىستى.
الماتى
