مەملەكەت باسشىسى نۇرسۇلتان نازارباەۆ «نازارباەۆ ورتالىعى» جاڭا عيماراتىندا بولدى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆ «نازارباەۆ ورتالىعى» جاڭا عيماراتىندا بولدى, دەپ حابارلادى پرەزيدەنتتىڭ ءباسپاسوز قىزمەتى.
عيماراتتى ارالاۋ بارىسىندا نۇرسۇلتان نازارباەۆ ونى قاراپ شىعىپ, نىساننىڭ نەگىزگى ولشەمدەرىمەن تانىستى.
مەملەكەت باسشىسى قازاقستاندىقتاردى مەرەكەمەن قۇتتىقتاپ, تۇڭعىش پرەزيدەنت كۇنى وزگە دە مەملەكەتتەردە – اقش-تا, ەۋروپا, ازيا ەلدەرىندە مەرەكە رەتىندە اتاپ وتىلەتىنىن ايتتى.
– قازاقستان پارلامەنتى ءوز شەشىمىمەن مەملەكەتتىك مەرەكە رەتىندە بەكىتتى. بۇل كۇننەن كەيىن ماڭىزدى مەرەكەلەر باستالادى, وسىدان كەيىن ولاردىڭ ىشىندەگى ەڭ ماڭىزدىسى – تاۋەلسىزدىك كۇنى اتاپ وتىلەتىن بولادى. بۇل وقيعالار ءوزارا بايلانىستى. مەن ماندات الىپ, بارشا حالىقتىڭ قولداۋىنا يە بولعان سوڭ ونىڭ اتىنان ەلىمىزدىڭ تاۋەلسىزدىگىن جاريالاۋعا ءمۇمكىندىك الدىم. سوندىقتان ءبىز بۇل كۇندى حالقىمىزدىڭ دامۋ جانە ءوسىپ-وركەندەۋدىڭ جاڭا جولىنا تۇسكەن كۇن رەتىندە اتاپ وتەمىز. بۇگىن استانا مەن وبلىستاردا ەلىمىزدىڭ ازاماتتارىنا تۇرعىن ۇيلەر بەرىلۋدە, حالىقتىڭ يگىلىگىنە قىزمەت ەتەتىن جاڭا الەۋمەتتىك نىساندار ىسكە قوسىلۋدا. بۇدان ءبولەك, بۇگىن ەلوردادا «ەكو تاكسي» جوباسىنىڭ تۇساۋى كەسىلدى, ول ەكسپو-2017 كورمەسىنە دايىندىقتىڭ باسى بولىپ سانالادى. بۇل استاناداعى ەكولوگيالىق احۋالدى جاقسارتۋعا باعىتتالعان. ءبىز وسى تاجىريبەنى الماتىعا جانە قازاقستاننىڭ باسقا دا قالالارىنا تاراتامىز, – دەدى نۇرسۇلتان نازارباەۆ.
سونىمەن قاتار, قازاقستان پرەزيدەنتى «نازارباەۆ ورتالىعى» عيماراتى ەلوردامىزدىڭ جاڭا بىرەگەي نىسانى بولىپ تابىلاتىنىن اتاپ ءوتتى.
– بۇل – كۇللى الەمگە بەلگىلى ارحيتەكتور نورمان فوستەردىڭ تۋىندىسى. مۇنداي ورتالىقتار الەمنىڭ كوپ قالالارىندا سالىنۋدا. مىسالى, اقش پرەزيدەنتتەرى كىتاپحانالار, ورتالىقتار اشىپ جاتادى. بۇل ورتالىقتا تاۋەلسىزدىگىمىزدىڭ تاريحى, الەمدىك ەكونوميكا مەن ساياسات جونىندە زەرتتەۋلەر جۇرگىزىلەتىن بولادى. جاستار وتاندىق تاريح سالاسىندا جاڭاشا ءبىلىم الادى جانە تىلدەردى ۇيرەنەتىن بولادى. عيمارات بيىكتى شولعان كوز جانارىنىڭ ءپىشىنى تارىزدەس. مەن نىساندى سالۋعا اتسالىسقان قۇرىلىسشىلارعا, دەمەۋشىلەرگە ريزاشىلىعىمدى بىلدىرگەلى كەلدىم. بۇل عيمارات مەملەكەت قاراجاتىنا ەمەس, جەكە كاسىپكەرلەردىڭ قارجىسىنا سالىندى. بارشاڭىزدى وسىناۋ مەرەكەمەن قۇتتىقتايمىن, قازاقستاندىق ءار وتباسىعا يگىلىك جانە تابىس تىلەيمىن, – دەدى مەملەكەت باسشىسى.
بۇعان قوسا, عيماراتتى ارالاۋ بارىسىندا نۇرسۇلتان نازارباەۆقا مەملەكەت باسشىسىنىڭ قازىرگى زامانعى قازاقستاننىڭ قالىپتاسۋى مەن دامۋىنا ەلەۋلى سەپتىگىن تيگىزگەن, ارنايى ۇلگىمەن راسىمدەلگەن تاريحي جارلىقتارى كورسەتىلدى.
كوپفۋنكتسيونالدى عيماراتتىڭ اۋماعى – 28 مىڭ شارشى مەتردەن استام, 9 قاباتتان تۇرادى.
كىتاپحانا جالپى قورى 460 مىڭ بىرلىكتى ساقتاۋعا ەسەپتەلىنگەن, ولاردىڭ 200 مىڭعا جۋىعى – جابىق قور.
