ايماقتار • 02 جەلتوقسان، 2020

ەلباسىنىڭ ەڭبەك وتانىندا ەستەلىكتەر ايتىلدى

24 رەت كورسەتىلدى

قاراعاندى وبلىسىندا قازاقستان رەسپۋبليكاسىنىڭ تۇڭعىش پرەزيدەنتى كۇنى ءتۇرلى ءىس-شارالار ۇيىمداستىرىلىپ، ماڭىزدى مەرەكە لايىقتى دەڭگەيدە اتالىپ ءوتتى دەپ، حابارلايدى Egemen.kz

سونداي يگى ءىس-شارانىڭ ءبىرى تۇڭعىش پرەزيدەنت - ەلباسىنىڭ ەڭبەك وتانى تەمىرتاۋ قالاسىندا جوعارى دەڭگەيدە ءوتتى. كەزدەسۋگە نۇرسۇلتان نازارباەۆتىڭ سەرىكتەستەرى، ەتنومادەني بىرلەستىكتەردىڭ بەلسەندىلەرى، قوعام وكىلدەرى قاتىستى. ەپيدەميولوگيالىق جاعدايعا بايلانىستى قاتىسۋشىلاردىڭ كوپشىلىگى قاشىقتان ونلاين رەجىمىندە بايلانىستا بولدى. ال قۇرمەتتى ققوناقتاردىڭ ءبىرازى تۇڭعىش پرەزيدەنتتىڭ تاريحي-مادەني ورتالىعىندا باس قوستى.

تاعىلىمى مول كەزدەسۋدە ءسوز سويلەگەن وبلىس اكىمى جەڭىس قاسىمبەك تۇڭعىش پرەزيدەنت كۇنىنىڭ بارشا قازاقستاندىقتار ءۇشىن ايتۋلى مەرەكە ەكەنىن ەرەكشە اتاپ ءوتتى.

– ءبىرىنشى بولۋ قاشاندا قيىن، ءارى وراسان زور جاۋاپكەرشىلىك. نۇرسۇلتان ءابىش ۇلى نازارباەۆ قازىرگى زامانعى جاڭا مەملەكەتتىڭ نەگىزىن قالاۋشى عانا ەمەس، ول ناعىز ۇلت كوشباسشىسىنا، تاۋەلسىزدىگىمىزدىڭ سيمۆولىنا اينالدى. حالقىمىز وعان جاڭا قازاقستاندى جوبالاپ، قۇرۋدى سەنىپ تاپسىردى، – دەدى ول.

سونىمەن قاتار ءوڭىر باسشىسى تاۋەلسىزدىك جىلدارىندا ۇلتتىق دامۋدىڭ تابيعي جولىن قالپىنا كەلتىرۋ، مادەنيەتىمىز بەن تاريحىمىزدى قايتارۋ جانە ساقتاۋ ءۇشىن كوپ شارۋا جاسالعانىن تىلگە تيەك ەتتى.

بۇل رەتتە قازاقستان ەتنوستىق ارالۋاندىقتى ارتىقشىلىققا اينالدىرا وتىرىپ، ءوزىنىڭ ۇلتتىق بىرلىگىنىڭ بىرەگەي ستاندارتىن جاساي الدى. بۇل ۇدەرىستە قازاقستان حالقى اسسامبلەياسىنىڭ باستى ءرول اتقارىپ وتىرعانىنا ايرىقشا نازار اۋدارىلدى.

كەزدەسۋ بارىسىندا قوناقتار وبلىس تەاترلارىنىڭ ارتىستەرى دايىنداعان تاۋەلسىز مەملەكەتتىڭ ەلباسىنىڭ باسشىلىعىمەن قالىپتاسۋى مەن دامۋى تۋرالى بەينەروليكتى تاماشالادى.

سونىمەن بىرگە تۇڭعىش پرەزيدەنتتىڭ سەرىكتەستەرى ەستەلىكتەرىمەن ءبولىسىپ، جينالعاندارعا قىزىقتى دا مازمۇندى وقيعالاردى ايتىپ بەردى.. تەمىرتاۋدىڭ قۇرمەتتى ازاماتى، مەتاللۋرگ قۋانىش وماشەۆ ەلباسىنىڭ مەتاللۋرگيا ونەركاسىبىن دامىتۋعا قوسقان ۇلەسى تۋرالى پىكىرىن ءبىلدىردى.

ەڭبەك ارداگەرى، تەمىرتاۋدىڭ قۇرمەتتى ازاماتى نينا ۆاحيتوۆا تەمىرتاۋدىڭ دامۋىن تىكەلەي ەلباسىنىڭ ەڭبەگىمەن بايلانىستىرادى.

– ءبىز نۇرسۇلتان ءابىش ۇلىنىڭ ارقاسىندا قالامىزدىڭ بولاشاعى بار دەپ ەسەپتەيمىز. تۇڭعىش پرەزيدەنتىمىز ارقاشان دا ادامدارعا دەگەن ءىلتيپاتتى كوزقاراسىمەن ەرەكشەلەنەتىن. ول قازاقستاندىقتارعا قامقورلىق كورسەتۋدى، يگى ىستەر جاساۋدى جالعاستىرۋدا، – دەپ سىر اقتاردى ەڭبەك ارداگەرى.

كەزدەسۋدە بولاشاق تۇڭعىش پرەزيدەنت وقىعان مەكتەپ تۋرالى بەينەروليك كورسەتىلىپ، ەلباسىنىڭ سىنىپتاسى كۇلاش ءامىروۆا مەكتەپتەگى جىلدار تۋرالى قىزىقتى ەستەلىكتەر ايتىپ بەردى.

گگگ

سونداي-اق، كەزدەسۋگە قاتىسقان بالالار ءۇيىنىڭ بۇرىنعى تۇلەگى باقىتگۇل عابدۋللينا ءوزىنىڭ ومىرىنە تىكەلەي قاتىسى بار جان تەبىرەنتەرلىك وقيىعانى بايانداپ بەردى. باسىندا باسپاناسى جوق جەتىم قىز ەلباسىنا حات جولداپ، كومەك سۇراعان ەكەن.  ونىڭ حاتى نازاردان تىس قالماي، تۇرعىن ءۇي ماسەلەسى وڭىنان  شەشىلىپتى. بۇگىنگى كۇندە باقىتگۇل قابدۋللينا تاسى ورگە دومالاعان كاسىپكەر جانە باقىتتى انا ەكەن.

– بۇل تۇڭعىش پرەزيدەنتتىڭ دانا ساياساتىنىڭ، باستامالارى مەن باعدارلامالارىنىڭ، سونداي-اق ارقايسىمىزدىڭ ومىرىمىزگە جاناشىرلىق تانىتۋىنىڭ ارقاسىندا مۇمكىن بولدى. ءبىرىنشى جەلتوقسان مەن ءۇشىن نۇرسۇلتان ءابىش ۇلىنا دەگەن قۇرمەت پەن العىستىڭ كۇنى، – دەپ تەبىرەندى باقىتگۇل.

مازمۇندى جانە عيبراتتى جاعدايدا وربىگەن باسقوسۋدا ءارتۇرلى ماماندىق يەلەرى مەن ۇرپاق وكىلدەرى ەلباسىنا ارنالعان العىس سوزدەرىن ايتتى. ۇلىتاۋ اۋدانىنىڭ جاس اقىنى مۇقاعالي سەيتقازى دا ءوز شىعارماسىن وسى تاقىرىپقا  ارنادى. سونداي-اق، دارىگەر نۇرقاسي ابباتوۆ بارلىق تۇرعىنداردى  دەنساۋلىق شارالارىن ساقتاۋعا شاقىردى.

كەزدەسۋدىڭ سوڭى  جەزقازعان بالاباقشاسى تاربيەلەنۋشىلەرىنىڭ كەشكە جيىلعان قوناقتاردى مەرەكەمەن قۇتتىقتاپ، ولەڭ وقىپ، سىيلىقتار ۇسىنۋىمەن تۇيىندەلدى.

 

 

قاراعاندى وبلىسى

سوڭعى جاڭالىقتار

الەم كۋبوگى وتەدى

سپورت • كەشە

ۇقساس جاڭالىقتار