قازاقستان • 02 جەلتوقسان، 2020

بۇۇ COVID-19 قارسى كۇرەستە ايەلدەرگە قولداۋ كورسەتەدى

22 رەت كورسەتىلدى

بۇگىن بىرىككەن ۇلتتار ۇيىمىنىڭ ايەلدەرگە قاتىستى گەندەرلىك زورلىق-زومبىلىققا قارسى 16 كۇندىك جاھاندىق ناۋقانى جانە بۇۇ 75 جىلدىعى شەڭبەرىندە «ايەلدەر COVID-19 قارسى كۇرەستىڭ الدىڭعى شەبىندە» اتتى بۇۇ فوتوكورمەسىنىڭ ونلاين تۇساۋكەسەرى بولىپ ءوتتى. كورمەنىڭ ماقساتى – ادامزاتتىڭ ساناسىنا اسەر ەتىپ، تاريحتا قالار COVID-19 ىندەتى تۋدىرعان داعدارىس كەزىندەگى ايەلدەردىڭ قوسقان ۇلەسى مەن كۇشىن تانىتۋ. بۇل تۋرالى قازاقستانداعى بۇۇ ءباسپاسوز حاتشىسى حابارلادى.

كورمە COVID-19 داعدارىسىنىڭ بەل ورتاسىندا ءجۇرىپ، ءارتۇرلى سالادا قىزمەت ەتكەن قازاقستاندىق ايەلدەردىڭ شابىت بەرەر 15 وقيعاسىنان تۇرادى. كەيىپكەرلەر وزدەرىنىڭ باتىلدىق پەن توزىمدىلىك ۇشتاسقان اڭگىمەلەرىمەن بولىسەدى. بۇل ايەلدەردىڭ اراسىندا دارىگەرلەر، ەرىكتىلەر، بەلسەندىلەر، جۋرناليستەر، ينفليۋەنسەرلەر – ادەل ورازالينوۆا، دينا سمايلوۆا، سايدا تاۋكەلەۆا، ەلەنا بيلوكون جانە باسقالارى بار.

«COVID-19 قارسى كۇرەستە بىزگە دۇرىس شەشىمدەردى قابىلداۋ ءۇشىن ايەلدەردىڭ ءرولى ماڭىزدى. بىزگە ايەلدەر ينفەكتسيانىڭ قايتا ءورشۋى، جۇمىس كۇشىنىڭ جەتىسپەۋشىلىگى، ءتىپتى الەۋمەتتىك تولقۋدىڭ ەكىنشى رەت جاندانۋى سياقتى ەڭ اۋىر ستسەناريلەردىڭ الدىن الۋ ءۇشىن قاجەت. بىزگە ىندەتپەن كۇرەسۋ ءۇشىن ايەلدەر كەرەك. بىزگە الدىڭعى شەپتەگى ايەلدەر كەرەك»، - دەپ اتاپ ءوتتى قازاقستانداعى بۇۇ تۇراقتى ۇيلەستىرۋشىسى ميكاەلا فريبەرگ-ستوري.

COVID-19 پاندەمياسى جاسى، جىنىسى، ورنالاسقان جەرى، الەۋمەتتىك جاعدايى جانە باسقالارىنا قاراماستان بارلىق جاندى قامتىدى. جۇقپالى اۋرۋدىڭ ءورشۋى ايەلدەر مەن ەرلەرگە، ۇل بالالار مەن قىزدارعا ءارتۇرلى اسەر ەتەدى. بارلىق ەلدەر، ونىڭ ىشىندە قازاقستان، ايەلدەرگە قاتىستى زورلىق-زومبىلىق دەڭگەيىنىڭ جوعارىلاۋى تۋرالى حابارلاۋدا.

«بۇل ايەلدەردىڭ بارلىعىنىڭ داۋىستارىن ەستي جانە تىڭداي ءبىلۋىمىز كەرەك. ءبىز توزىمدىلىك، باتىلدىق جانە ەڭبەكقورلىق سالتانات قۇرعان وقيعالارامىزدى ايتا وتىرىپ، ايەلدەردىڭ مۇمكىندىكتەرىن كەڭەيتۋ جانە گەندەرلىك تەڭدىك قوعام ءال-اۋقاتىنىڭ كەپىلى بولىپ تابىلاتىنى تۋرالى جاعىمدى حابارلامالارمەن بولىسكىمىز كەلەدى»، - دەپ قورىتىندىلادى قازاقستانداعى يۋنفپا وكىلى دجۋليا ۆالەزە.

فوتوكورمە كەيىپكەرلەرىنىڭ ءبىرى، جۇقپالى اۋرۋلار ۆيرۋسولوگى قارلىعاش ابديەۆا COVID-19 تۋرالى ايتا وتىرىپ، ىندەتتىڭ باستالۋىمەن بارلىعى ونى «ەرەكشە قاۋىپتى» دەپ ساناي باستاعانىن اتاپ ءوتتى:ء «بىزدى دەرەۋ جاۋىپ تاستادى: قاي جەردە جۇمىس ىستەدىك – سول جەردە تۇرۋعا تۋرا كەلدى. ۇشاق كەلىپ، بىزگە سىنامالار اكەلەدى. ءبىز ولاردى اشىپ، دياگنوز قويامىز. عىلىم، ماقالالار جانە باسقا جۇمىستار تاسادا قالدى. تەك COVID-19!» - دەپ ەسكە الادى قارلىعاش.

دەنساۋلىق ساقتاۋ جانە الەۋمەتتىك سالاداعى جاھاندىق جۇمىس كۇشىنىڭ 70% قۇراعاندىقتان، ايەلدەر قاۋىمى وزدەرىنىڭ جانە جاقىن ادامدارىنىڭ ءومىرىن قاتەرگە تىگىپ، ىندەتتىڭ الدىڭعى شەبىندە كۇرەسەدى. سونىمەن قاتار ايەلدەر كوروناۆيرۋستىق ينفەكتسيامەن كۇرەستىڭ الدىڭعى قاتارىندا ءجۇرىپ، ىندەت تۋىنداعان ماسەلەلەردى شەشۋگە ۇلكەن ۇلەس قوسۋدا.

ناۋقاندى «مەلومان» دۇكەندەر جەلىسى دە قولدادى: بەلسەندىلىكتىڭ 16 كۇنى بارىسىندا نۇر-سۇلتان مەن الماتى تۇرعىندارى جەلىنىڭ كىتاپ دۇكەندەرىنەن گەندەرلىك تەڭدىك پەن ايەلدەردىڭ مۇمكىندىكتەرىن كەڭەيتۋگە ارنالعان ارنايى ادەبيەتتى تابا الادى.

كورمەنى بۇۇ حالىقتى قونىستاندىرۋ قورى (يۋنفپا) جانە اكتريسا اينۇر ءىلياسوۆا، فوتوگراف باۋىرجان بيسميلدين، رەجيسسەر ۆانيا ابراموۆ، جۋرناليست وكسانا ۆاسيلەنكودان قۇرالعان شىعارماشىلىق توپ دايىندادى.

سوڭعى جاڭالىقتار

سقو «قىزىل ايماققا» ەندى

ايماقتار • كەشە

ۇقساس جاڭالىقتار