قوعام • 01 جەلتوقسان، 2020

اقتوبەدە وتباسىلار باسپانالى بولدى

تۇڭعىش پرەزيدەنت كۇنىنە وراي اقتوبە قالاسىنىڭ نۇر-اقتوبە تۇرعىن ءۇي الابىندا جاڭادان سالىنعان 256 پاتەرلىك تۇرعىن ءۇي پايدالانۋعا بەرىلدى، دەپ حابارلايدى Egemen.kz

بايان قۋاندىققىزى

بۇگىن وسى ۇيدەن ءوڭىر باسشىسى وڭداسىن ورازالين 30 وتباسىنا پاتەر كىلتتەرىن تابىستادى. ولاردىڭ اراسىندا ۇلى وتان سوعىسىنىڭ ارداگەرى، كوپ بالالى، اتا-اناسىز قالعان جاسوسپىرىمدەر مەن از قامتىلعان 30 وتباسى بار دەپ حابارلايدى egemen.kz.

– ءار ادامنىڭ ءوز وتباسىمەن بىرگە ءوسىپ-ونەتىن جەكە شاڭىراعى، جايلى قونىسى بولۋى ومىرىندەگى ەڭ ماڭىزدى جايت. مىنە، سىزدەر ءۇشىن بۇگىنگى كۇن قۋانىشقا تولى بولىپ وتىر. مەرەكە كۇنى كىرگەلى وتىرعان شاڭىراقتارىڭىزدىڭ ءىشى قۇت-بەرەكەلى بولىپ، ءوسىپ كەلە جاتقان جاس بالالارىمىز ءبىلىمدى ءارى بىلىكتى ازامات بولىپ ەرجەتسىن، ەلىن سۇيەتىن پاتريوتى بولىپ ءوسسىن دەگەن تىلەك بىلدىرەمىن. جاڭا باسپانالى بولعان جاس شاڭىراقتاردىڭ كوبەيۋى دە مەملەكەتىمىزدىڭ كۇننەن-كۇنگە دامىپ، ءال-اۋقاتىنىڭ ءوسىپ جاتقانىن بىلدىرەدى. حالقىمىزدىڭ بەرەكە-بىرلىگى مەن مەملەكەت باسشىسىنىڭ جۇرگىزىپ وتىرعان سارابدال ساياساتىنىڭ، ەل ازاماتتارىنىڭ اۋىزبىرشىلىگى ارقاسىندا كوپتەگەن يگىلىكتى ىستەر اتقارىلىپ جاتىر. جىل وتكەن سايىن قالامىزدىڭ اۋماعى كەڭەيىپ، جاڭا باسپاناعا دەگەن تۇرعىنداردىڭ سۇرانىسى دا ارتىپ كەلە جاتقانىنا وزدەرىڭىز كۋا بولىپ وتىرسىزدار. ءبىز بار كۇش-جىگەرىمىزدى جۇمىلدىرىپ، قالا تۇرعىندارىنىڭ جىلى ءارى جايلى ۇيدە الاڭسىز ءومىر سۇرۋىنە قولايلى جاعداي جاساۋعا تىرىسامىز. بۇل جەردە ۋاقىتپەن ساناسپاي، از مەرزىمدە وسىنداي ساپالى ءۇيدى تۇرعىزعان قۇرىلىسشىلارعا دا العىسىمدى بىلدىرەمىن، – دەدى وبلىس اكىمى جاڭا قونىس يەلەرىن قۇتتىقتاۋ سوزىندە.

بۇگىندە اقتوبە قالاسى بويىنشا تۇرعىن ءۇي كەزەگىنە 24 مىڭنان استام ادام تىركەلسە، وڭىردە ءتۇرلى باعدارلامالار ارقىلى باسپانالى بولۋ جولدارى دا قاراستىرىلىپ كەلەدى. سونىڭ ىشىندە جاستار ءۇشىن ەڭ ءتيىمدىسى – ەل ۇكىمەتى قابىلداعان "باقىتتى وتباسى" باعدارلاماسى. قازىرگى ۋاقىتتا اقتوبە وبلىسىندا 276 جاس وتباسى وسى باعدارلاما اياسىندا جالپى سوماسى 2،37 ملرد تەڭگەگە يپوتەكالىق نەسيە راسىمدەپ، جاڭا قونىسقا كىردى.

سونداي-اق ەكىنشى دۇنيەجۇزىلىك سوعىسىنىڭ ارداگەرى، 96 جاستاعى قالا تۇرعىنى ءانۋار احمەتزيانوۆ تا قونىس تويىن تويلادى. وڭداسىن ورازالين اقساقالدىڭ ۇيىنە ارنايى كەلىپ وعان ءبىر بولمەلى پاتەردىڭ كىلتىن تابىستادى. ەكىنشى دۇنيەجۇزىلىك سوعىسىنىڭ ارداگەرى ءانۋار احمەتزيانوۆ كوپ جىلدار بويى ايماقتىڭ ءوسىپ-وركەندەۋى مەن الەۋمەتتىك-ەكونوميكالىق دامۋىنا زور ۇلەسىن قوسقان جان. جاسى جۇزگە جاقىنداعان قاريا ءالى تىڭ، ەلىمىزدە بولىپ جاتقان يگىلىكتى ىستەردەن حاباردار. ول ەلىمىزدىڭ باستى بايلىعى –حالقىمىزدىڭ تاتۋلىعى پەن تىنىشتىعى ەكەنىن ايتا كەلىپ، ءوڭىر باسشىلىعى مەن ازاماتتاردىڭ اتقارىپ جاتقان قىزمەتتەرىنە ريزاشىلىعىن ءبىلدىرىپ، جاڭا پاتەرگە يە بولىپ جاتقان جاس وتباسىلارعا باتاسىن بەردى.