Instagram پاراقشاسىنان الىندى
«بار-جوعى جەتى جاستامىن. اۋدان تۇرعىندارىنىڭ مەملەكەت باسشىسىمەن كەزەكتى ءبىر كەزدەسۋىنە اكەمە ەرىپ باردىم. ول كىسى قازىرگى انداس باتىر اۋىلىنداعى اۋداندىق ەلەكتر جۇيەسىنە قاراستى بولىمشەنى باسقاراتىن ەدى. العاشىندا «بالا-شاعا باراتىن جينالىس ەمەس» دەپ مەنى وندا اپارعىسى كەلمەگەن. «نۇر-اتانى جاقىننان كورگىم كەلەدى» دەگەن وتىنىشىمە قۇلاق استى, اقىرى», – دەپ سول كەزدەسۋدى ك ۇلىمسىرەي ەسىنە الدى ول.
كىشكەنە قىز جيىندا ايتىلعان جايلاردىڭ ءبىرىن ءتۇسىندى, ءبىرىن تۇسىنبەدى. نە دە بولسا نۇرسۇلتان اتاسىن جاقىننان كورگەنىنە ءماز. جيىن بىتكەننەن كەيىن دە جۇرتتىڭ ەلباسىن ورتاعا الىپ, قۇرمەت كورسەتۋى جالعاسقان. سول تۇستا ۇلكەن كىسى كوپشىلىكتىڭ ورتاسىندا اركىمگە ءبىر قاراپ, جاۋتاڭداۋمەن تۇرعان مۇنى كورىپ قالىپ, قاسىنا شاقىرىپ: «اتىڭ كىم؟» – دەپ سۇرايدى. «لۋيزا». «نەشىنشى سىنىپتا وقيسىڭ؟». ء«بىرىنشى». ەلباسىنىڭ وزىمەن اشىق سويلەسۋى, مەيىرىمدى ءجۇزى, جىلى كوزقاراسى باۋرادى ما, قارشاداي قىز ەندىگى ءبىر ساتتە توسىرقاۋىن قويىپ: «اتا, ءبىز ءسىزدى جاقسى كورەمىز. سىزگە دەنساۋلىق تىلەيمىز. ءسىز جاقسى ادامسىز», – دەپ كوڭىلىندەگى ىزگى تىلەگىن دە جەتكىزەدى. بارىنەن دە قىزىعى – كىشكەنە قىزدىڭ قىزدى-قىزدىمەن «قاشان ءبىزدىڭ اۋىلدا بالمۇزداق بولادى؟ مەنىڭ كوپ-كوپ «موروجەنوە» جەگىم كەلەدى» دەپ ماسەلەنى قابىرعاسىنان قويعانى بولدى. جۇرت دۋ ك ۇلىسىپ, ونىڭ باتىلدىعىنا ريزا بولىپ, شاپالاق ۇرىپ تا جىبەردى.
ەلباسىنا دا لۋيزانىڭ العاۋسىز كوڭىلمەن ايتقان ءسوزى ۇناي تۇسكەن سەكىلدى. جايدارىلانا كۇلىپ, ونى قولىنا الىپ كوتەرىپ, ماڭدايىنان ءسۇيىپ: ء«بارى دە بولادى, قىزىم. تەك ساباعىڭدى جاقسى وقى. جاراي ما؟ باقىتتى بول!» – دەپ باتاسىن بەرگەن ەدى. لۋيزا دا نۇر-اتاسىنا ساباعىن تەك جاقسى باعاعا وقۋعا ۋادە ەتتى. كوپ وتپەي ونىڭ ءوتىنىشى دە ورىندالعان. سول جازدا قىرعىز ەلىمەن شەكارالاس شالعاي اۋىلعا اۋدان ورتالىعىنان اۆتودۇكەندەر كۇن قۇرعاتپاي قاتىناپ, بالمۇزداق دەگەنىڭدى ءۇيىپ-توگىپ اكەلىپ, ساتۋمەن بولىپتى. اسىرەسە, كىشكەنتايلار ءبىر جىرعاعان. ولار مۇنىڭ ءوز قۇرداستارى لۋيزانىڭ «قوعامدىق بەلسەندىلىگىنىڭ» جەمىسى ەكەنىن دە بىلمەدى.
ەڭ باستىسى, سول كۇنگى كەزدەسۋدەن باستاپ لۋيزانىڭ كوڭىلىندە ىلكى وزگەرىستەر ورىن الادى. ەلباسىنىڭ سول جولى ايتقان ءسوزى ءوزىن ۇدايى بيىكتەرگە تالپىندىرىپ, ءالى كۇنگە جولىن نۇرلاندىرۋمەن كەلە جاتقانداي سەزىنەتىنى بار. قالايدا ايتقان ۋادەسىنىڭ ۇدەسىنەن شىعۋعا كۇش سالدى. پوبەدا اۋىلىنداعى №21 ورتا مەكتەپتى «التىن بەلگىگە», تاراز مەملەكەتتىك ۋنيۆەرسيتەتىن «قارجى جانە نەسيە» ماماندىعى بويىنشا ۇزدىك ديپلومعا بىتىرەدى. وسى وقۋ ورنىنان ەكىنشى جوعارى ءبىلىم – «حالىقارالىق قۇقىق باكالاۆرى» ماماندىعىن دا قوسا مەڭگەرىپ شىققان.
ول العاشقى ەڭبەك جولىن «قازكوممەرتسبانك» اق تاراز بولىمشەسىندە ەسەپشى-وپەراتسياشى بولۋدان باستاپ, شىمكەنتتەگى «Alyance Retail Group» جشس-ءنىڭ نەسيەلەۋ مەنەدجەرى, ءبولىم باسشىسى, «وڭتۇستىك» الەۋمەتتىك كاسىپكەرلىك كورپوراتسياسى ۇلتتىق كومپانياسى اق-نىڭ مەنەدجەرى, سەرىكتەس كومپانيالارداعى بيزنەس ۇدەرىستەرىن اكىمشىلىكتەندىرۋ باسقارماسىنىڭ باسشىسى, «Asyl Arman» كورپوراتسياسى» جشس-نىڭ قارجىلىق ديرەكتورى سەكىلدى قىزمەت باسپالداقتارىنان ءوتىپتى. بۇگىندە «سبەربانك روسسي» اق شىمكەنت فيليالىنىڭ كرەديتتىك مەنەدجەرى ەكەن.
وتباسىندا ديلناز, دينارا, اقنازار, سانجار ەسىمدى پەرزەنتتەرى جەلكىلدەپ ءوسىپ كەلەدى. ءبىر كەزدەگى ەلباسى باتا-تىلەگىنىڭ قابىل بولىپ, ومىردە وركەن جايىپ, قىزمەتتە وسۋىنە شاراپاتى تيگەنىنىڭ ءبىر كورىنىسى وسىنداي.
قازىر ەلىمىزدىڭ بارلىق وڭىرىندە دە جاعداي جاقسى عوي. اسىرەسە, بالالار نە ىشەم, نە كيەم دەمەيدى. لۋيزانىڭ كەيدە وسى كىشكەنتايلارىنا شىمقالانىڭ شىلىڭگىر شىلدەسىندە ءشول باسسىن دەپ ءتاتتى بالمۇزداقتار الىپ بەرىپ, الدارقاتاتىنى بار. سول تۇستا باعزى ءبىر كەزدەگى «بالمۇزداق وقيعاسى» ەسىنە ءتۇسىپ, ەلباسىنا دەگەن ريزاشىلىق سەزىمى كوكىرەگىن كەرنەپ-اق كەتەدى.
بايماحانبەت احمەت,
جۋرناليست
تاراز
