«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ 87 جانە 89-بابتارىنا سايكەس, ساياسي پارتيالار سايلاۋ كوميسسياسىنا ءوز ۇمىتكەرلەرىنىڭ ءتىزىمىن جانە قاجەتتى قۇجاتتاردى ۇسىنعان. قۇجاتتار قاتارىندا ساياسي پارتيانىڭ جوعارعى ورگانىنىڭ پارتيالىق ءتىزىمدى ۇسىنۋ تۋرالى حاتتاماسىنان ءۇزىندى كوشىرمە, پارتيا وكىلىنىڭ وكىلەتتىكتەرىن راستايتىن قۇجات, ەلەكتروندى جانە قاعاز نۇسقاداعى پارتيالىق ءتىزىم, ازاماتتىڭ پارتيالىق تىزىمگە ەنگىزۋگە كەلىسىمى تۋرالى ءوتىنىشى, تىزىمگە ەنگەن ءاربىر كانديداتتىڭ ءومىربايانى, كانديدات پەن ونىڭ جۇبايىنىڭ كىرىستەرى مەن مۇلكى تۋرالى دەكلاراتسيالار تاپسىرعانى تۋرالى مەملەكەتتىك كىرىس ورگانىنىڭ انىقتاماسى بار.
ورتالىق سايلاۋ كوميسسياسى پارتيالىق تىزىمدەرگە ەنگەن كانديداتتاردىڭ قازاقستان كونستيتۋتسياسىندا جانە «قازاقستان رەسپۋبليكاسىنداعى سايلاۋ تۋرالى» زاڭدا كورسەتىلگەن تالاپتارعا سايكەستىگىن ءتيىستى ورگاندارعا سۇراۋ سالۋ ارقىلى انىقتايتىن بولادى.
پارلامەنت ءماجىلىسىنىڭ دەپۋتاتتارىن سايلاۋ جونىندەگى كۇنتىزبەلىك جوسپارعا سايكەس, ساياسي پارتيالار ۇمىتكەرلەر ءتىزىمىن 30 قاراشا ساعات 18.00-گە دەيىن وتكىزە الادى. ال پارتيالار بەرگەن تىزىمدەردى تىركەۋ 10 قاراشادان باستالىپ, 10 جەلتوقسان كۇنى ساعات 18.00-دە اياقتالادى.
