ءبىرىنشى بولىپ قازاقستان داعدارىستان شىعادى: ەدب 2021 جىلعا بولجام جاسادى

ەكونوميكا • 27 قاراشا، 2020

ءبىرىنشى بولىپ قازاقستان داعدارىستان شىعادى: ەدب 2021 جىلعا بولجام جاسادى

25 رەت كورسەتىلدى

ەۋرازيالىق دامۋ بانكى قازاقستان، قىرعىزستان، رەسەي، ارمەنيا جانە بەلارۋس ەلدەرى ەكونوميكاسىنىڭ 2021 جىلى قالاي بولارىن بولجاعان تالداۋلارىن ۇسىندى، - دەپ حابارلايدى Egemen.kz

اباي قازبەك ۇلى

بانكتىڭ بولجامىنشا، كەلەر جىلى ەدب قاتىسۋشىلارىنىڭ بارلىعىندا ءوسىم بايقالماق. حالىقارالىق قارجى ينستيتۋتىنىڭ بولجاۋىنشا، 2021 جىلدىڭ ەكىنشى توقسانىندا شەكتەۋ شارالارىنىڭ الىنىپ تاستالۋى ەكونوميكانىڭ قايتا ورىستەۋىنە جول اشادى. ەدب باس ەكونوميستى ەۆگەني ۆينوكۋروۆتىڭ، ايتۋىنشا ەاەو ەلدەرىنىڭ اراسىنان ءبىرىنشى بولىپ قازاقستان ەكونوميكالىق احۋالدى قالپىنا كەلتىرىپ، داعدارىسقا دەيىنگى ءوسىم دەڭگەيىنە جەتەدى.

– ءارتۇرلى ەكونوميكاداعى مەملەكەتتىك قولداۋ شارالارى دا ءارتۇرلى. ەڭ سالماتقى پاكەت قازاقستاندا. رەسەيدىكى دە ءبىرشاما جوعارى. مۇنداي شارالار ءوز جەمىسىن بەردى – ەكونوميكانى تىم قاتتى تىعىرىققا تىرەلۋدەن ساقتاپ قالدى. سوندىقتان كەلەر جىلى دا تەز قالپىنا كەلۋگە مۇمكىندىك بەرمەك، – دەيدى ۆينوكۋروۆ.

الايدا ەۋرازيالىق ەكونوميكالىق وداق ەلدەرىنىڭ بارلىعى دەرلىك قارىزدىق قيىندىققا دۋشار بولعان. سول سەبەپتى، ولار مەملەكەتتىك قارىزدىڭ ءجىو-گە قاتىناسىنا مۇقيات نازار اۋدارىپ، بيۋدجەت تۇراقتىلىعىنا باسا ءمان بەرۋى ءتيىس دەيدى ساراپشىلار. ەدب ەلدەردى تالداۋ ورتالىعىنىڭ جەتەكشىسى الەكسەي كۋزنەتسوۆتىڭ ايتۋىنشا، ءجىو 2019 جىلدىڭ سوڭىندا 1،7 پايىزعا وسسە، 2020 جىلدىڭ سوڭىنا قاراي 3،8 پايىزعا قۇلدىراپ كەتكەن.

بىراق بۇل كورسەتكىش بارلىق ەلدە بىردەي ەمەس. 2020 جىلدىڭ سوڭى بويىنشا قىرعىزستاندا 7،5 پايىزعا قۇلدىراسا، ارمەنيادا – 6،4، قازاقستاندا – 3، بەلارۋسيادا – 1،5 پايىزعا تومەن كەتكەن. 2019 جىلى ەكونوميكا ءوسىمى رەسەيدە – 4، تاجىكستان 7،5 پايىزعا قۇلدىراعان.

– مەملەكەتتىك قولداۋ پاكەتتەرى بىرقاتار ەلدەردە ءجىو قۇلدىراۋىن شامامەن 2-3 پايىزعا بەيتاراپتاندىرۋعا مۇمكىندىك بەردى. قازاقستانداعى داعدارىسقا قارسى قولداۋدىڭ كەڭ اۋقىمدى پاكەتى شامامەن 6 ترلن تەڭگە. بۇل ءجىو-ءنىڭ 8،4 پايىزى. وسى قولداۋدىڭ ارقاسىندا ءجىو شىعىندارى بيىل 2 پايىزعا ازايدى، – دەيدى اعا تالداۋشى ايگۇل بەردىعۇلوۆا.

دەگەنمەن كەلەر جىلى قاتىسۋشى-ەلدەر ءۇشىن سىرتقى سۇرانىس وسە تۇسپەك. 2021 جىلى Urals ماركالى مۇنايىنىڭ ورتاشا باعاسى باررەلىنە 49 دوللار بولادى دەپ بولجانىپ وتىر. 2020 جىلى بۇل مۇناي باررەلىنە 41 دوللار بولعان ەدى. سونىمەن قاتار مۇناي باعاسىنىڭ ءوسۋى جانە ينۆەستورلاردىڭ قاۋىپتى اكتيۆتەرگە دەگەن قىزىعۋشىلىعىنىڭ قالپىنا كەلۋى قاتىسۋشى-ەلدەردىڭ ۆاليۋتالارىنىڭ نىعايۋىنا دا سەپتىگىن تيگىزبەك. تەڭگەنىڭ ورتاشا كۋرسى – 423،8، رۋبل – 74،5، سوم – 83،2، بەلارۋس ءرۋبلى – 2،61، تاجىك ءسومونيى – 11،6، ارميان درامى – 492 دەڭگەيىندە بولادى دەپ بولجانعان.

ساراپشىلاردىڭ باعالاۋىنشا، ينفلياتسيا 2021 جىلى بارىنشا باياۋلايدى. ارمەنيادا تۇتىنۋشىلىق باعا يندەكسىنىڭ ءوسۋ قارقىنى 2020 جىلدىڭ سوڭىنداعى 1،2-دەن 1،1 پايىزعا، بەلارۋسيادا – 6،4-تەن 5،5 پايىزعا، قازاقستاندا – 7،3-تەن 5،3 پايىزعا، قىرعىزستاندا – 6،5-تەن 5،2 پايىزعا، رەسەيدە – 4،2-دەن 3،5 پايىزعا، تاجىكستاندا – 8،5-تەن 5،3 پايىزعا تومەندەيدى.

ايگۇل بەردىعۇلوۆانىڭ سوزىنشە، سالىق-بيۋدجەتتىك فاكتورى بيىل قازاقستان ەكونوميكاسىنا ۇلكەن كومەگىن تيگىزگەن. بۇل كەلەسى جىلى دا ماڭىزدى فاكتور رەتىندە قالا بەرەدى. دەگەنمەن ءبارى دە ىندەتتىڭ بەتى قايتۋىنا بايلانىستى بولماق دەيدى ساراپشىلار. ەگەر ينفەكتسيا تارالۋى توقتاماسا جانە ۆاكتسينانىڭ قولدانىسقا ەنگىزىلۋى كەشىكتىرىلسە، وندا ەكونوميكالىق شىعىندار بولجامدى ستسەناريدەن الدەقايدا اسىپ ءتۇسۋى ىقتيمال.

الماتى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز