ولار دەمەۋ قارجىنى قىستاقتارىنا كۇن پانەلدەرىن ورناتقاندارى ءۇشىن العان ەكەن. الايدا ايماقتاعى اۋىل شارۋاشىلىعى باسقاراماسى قوجالىقتارعا حات جولداپ, ارتىق بەرىلىپ قويعان اقشانى قايتارۋ كەرەكتىگىن ايتقان.
سۋبسيديانىڭ ءبىر بولىگىن قايتارۋ قاجەت دەگەن مازمۇنداعى حات تاياۋدا قوجالىق يەسى ساعىندىق ساپاروۆقا دا كەلگەن. ونىڭ شارۋاشىلىعى تاۋلى جەردە ورنالاسقاندىقتان ەلەكتر جەلىسى تارتىلماعان. مايشامنىڭ جارىعىمەن وتىراتىن ەمەس, ساتىلىمدا بولعان سوڭ كۇن پانەلدەرىن ورناتقان. سول ءۇشىن دە مەملەكەتتەن 2 920 000 تەڭگە ينۆەستيتسيالىق سۋبسيديا العان.
– قاجەتتى قۇجاتتىڭ بارىنە ءمور مەن قول قويىلىپ, سۋبسيديا العانبىز. ەندى مىنە, 480 مىڭ تەڭگە ارتىق كەتىپ قالىپتى دەپ جاتىر. كەلىسىمشارتتا ءۇش ءمور باسىلعان, قول قويىپ وزدەرى بەرگەن. ەندى وسىنى قايتا بۇزىپ جاتىر. وسى دۇرىس پا؟ – دەيدى ساعىندىق ساپاروۆ.
ساپاروۆتاردىڭ بۇل قىستاقتا تابان ەت, ماڭداي تەرىمەن ءتورت ت ۇلىگىن باعىپ وتىرعاندارىنا 45 جىل بولعان. جارتى عاسىرعا جۋىق ۋاقىت. كۇن كوزىنەن ەلەكتر قۋاتىن الاتىن پانەلدەرىن ورناتۋعا كەتكەن شىعىننىڭ 80 پايىزىن مەملەكەت وتەپ بەرگەندە قۋانىشتان بورىكتەرىن اسپانعا اتقان. مەمەلەكەتتەن مۇنداي كومەكتى العاش رەت العان سوڭ قۋانباي قايتسىن؟!
– بەرگەن قارجىنى قايتارىڭدار دەگەنى اقىلعا قونبايدى. دۇرىس ەمەس. ءبىز ەندى ونى قالاي قايتارامىز؟! ونى وبلىستىق اۋىل شارۋاشىلىعى باسقارماسىنىڭ دۇرىس ەسەپتەمەي بەرگەنىنە ءبىز كىنالى ەمەسپىز, – دەيدى قۇمكول اۋىلىنىڭ تۇرعىنى تولەۋ قاديروۆا.
قوجالىق يەلەرى سۋبسيديانى الۋدا دا از اۋرەلەنبەگەن سياقتى. سۋبسيديا بەرۋ ەرەجەلەرى وزگەرىپ, قىل اياعى شىتىرمان ىسكە پروكۋراتۋرا ارالاسقاننان كەيىن عانا شارۋالار قارجىعا قول جەتكىزگەن.
– رەۆيزيالىق كوميسسيا تەكسەرگەن كەزدە بەرىلگەن سۋبسيديانى زاڭسىز دەپ, ارتىق اقشانى ۇكىمەتكە قايتارۋ كەرەكتىگىن حاباردار ەتىپ كەتتى, – دەدى وبلىستىق اۋىل شارۋاشىلىعى باسشىسىنىڭ ورىنباسارى ەربول قۋانىشەۆ.
شىعىستاعى شارۋالاردىڭ كۇن پانەلدەرىن جاپپاي قولدانا باستاعاندارىنا ەكى-ءۇش جىل بولعان. قوجالىقتارعا ينۆەستيتسيالىق سۋبسيديا رەتىندە بارلىعى 5 ملرد تەڭگەدەن استام قارجى بەرىلگەن.
وسى سالاعا جاۋاپتى لاۋازىمدى تۇلعالار جىلدىڭ باسىندا ۇننىڭ ىشىنە اقشا جاسىرىپ, 35 ملن تەڭگە پارا الدى دەگەن كۇدىكپەن ۇستالعانى دا ەلدىڭ ەسىندە. ول قىلمىستىق ءىس ءالى تەرگەلىپ جاتىر. ال سۋبسيديانى ارتىق الىپ قويدى دەگەن شارۋالار قايتپەك؟!
شىعىس قازاقستان وبلىسى
