تۇڭعىش پرەزيدەنت كۇنى مەرەكەسى قارساڭىندا استانا قالاسىنىڭ ماڭايىنداعى قوسشى, قاراوتكەل, قوياندى, 96-رازەزد, تالاپكەر اۋىلدارىندا جاڭا, زاماناۋي مەكتەپتەر مەن بالاباقشالار اشىلدى.
تۇڭعىش پرەزيدەنت كۇنى مەرەكەسى قارساڭىندا استانا قالاسىنىڭ ماڭايىنداعى قوسشى, قاراوتكەل, قوياندى, 96-رازەزد, تالاپكەر اۋىلدارىندا جاڭا, زاماناۋي مەكتەپتەر مەن بالاباقشالار اشىلدى.
بۇرناعى كۇنى مەملەكەت باسشىسى نۇرسۇلتان نازارباەۆ استانا قالاسىن ودان ءارى دامىتۋ ماسەلەلەرىنە ارنالعان كەڭەس وتكىزىپ, سوندا سويلەگەن سوزىندە اتقارۋشى بيلىك وكىلدەرىنە استانا قالاسىنىڭ اينالاسىنداعى 30 شاقىرىمدىق ايماقتا ورنالاسقان ەلدى مەكەندەردى اباتتاندىرۋ جانە ولاردىڭ الەۋمەتتىك الەۋەتىن ارتتىرۋ تۋرالى ناقتى تاپسىرمالار بەرگەن بولاتىن. كەشە اقمولا وبلىسىنىڭ تسەلينوگراد اۋدانىنا قاراستى قوسشى اۋىلىندا 1200 ورىندىق جاڭا مەكتەپ عيماراتى پايدالانۋعا بەرىلدى. جالپى قۇنى 1,4 ملرد. تەڭگە بولاتىن ءتورت قاباتتى بۇل زاماناۋي مەكتەپ قۇرىلىسىن «ABINUKAS» جشس ەكى جىل ىشىندە سالىپ, جاس جەتكىنشەكتەردىڭ يگىلىگىنە بەرىپ وتىر.
قوسشى كەنتىندەگى جاڭا مەكتەپ عيماراتىن پايدالانۋعا بەرۋ سالتاناتىنا ءبىلىم جانە عىلىم ءمينيسترى اسلان ءسارىنجىپوۆ جانە اقمولا وبلىسىنىڭ اكىمى قوسمان ايتمۇحامەتوۆ قاتىستى. وسى سالتاناتتى جيىندا سويلەگەن سوزىندە ءبىلىم جانە عىلىم ءمينيسترى مەملەكەت باسشىسىنىڭ تىكەلەي قامقورلىعىنىڭ ناتيجەسىندە سوڭعى جىلدارى ەلىمىزدە 500 جاڭا مەكتەپ پايدالانۋعا بەرىلگەنىن, الداعى 2014 جىلدىڭ وزىندە عانا تاعى 50 مەكتەپ وقۋشىلار ءۇشىن ەسىگىن ايقارا اشاتىندىعىن مالىمدەدى. ءوز كەزەگىندە وبلىس اكىمى قوسشى كەنتى تۇرعىندارىن وسىنداي تاماشا ءبىلىم ورداسىنىڭ اشىلۋىمەن قۇتتىقتاي وتىرىپ, ەلباسىنىڭ اتىنان جاڭا مەكتەپكە 32 كومپيۋتەر جانە تەلەديدار سىيلادى.
ەلوردا جانىنداعى قوياندى اۋىلىندا 280 بۇلدىرشىنگە تاربيە بەرەتىن «ايالى-اي» اتتى جاڭا بالاباقشا عيماراتى اشىلدى. جالپى قۇنى 569 ملن. تەڭگەنى قۇراعان بۇل مەكتەپ جاسىنا دەيىنگى بالالار مەكەمەسى قۇرىلىسىن «ASTۋ» جشس جۇرگىزگەن. ەكى قاباتتى بۇل عيمارات جەكە جىلۋ, سۋ جانە كارىز جۇيەلەرىمەن جابدىقتالعان.
ىسكەر ازامات باقبەرگەن ءماۋلەنوۆ باسقاراتىن تسەلينوگراد اۋدانىنا قاراستى ەلوردا ىرگەسىندەگى قاراوتكەل اۋىلىندا بۇگىنگى زاماننىڭ سۇرانىستارىنا تولىق جاۋاپ بەرەتىن, جالپى قۇنى 1,7 ملرد. تەڭگە تۇراتىن 1200 وقۋشىعا ارنالعان جاڭا مەكتەپ عيماراتى ەسىگىن ايقارا اشتى. اشىلۋ سالتاناتىندا وسى عيماراتتى سالعان «رايكەن» قۇرىلىس ۇيىمىنىڭ باسشىسى دانيار تۇڭعىشباەۆ مەكتەپ ديرەكتورى التىنقان الەنوۆاعا جاڭا مەكتەپتىڭ سيمۆولدىق كىلتىن تابىس ەتتى.
سونىمەن بىرگە, تۇڭعىش پرەزيدەنت كۇنى مەرەكەسى قارساڭىندا استانالىق وبلىستىڭ تسەلينوگراد اۋدانىنا قاراستى تالاپكەر اۋىلىندا 280 ورىندىق بالاباقشا دا پايدالانۋعا بەرىلدى. جاڭا ۇلگىمەن سالىنعان, جان-جاقتى جاراقتاندىرىلعان بۇل جاڭا بالاباقشا عيماراتىن «ايان» جشس-ءنىڭ قۇرىلىسشىلارى تۇرعىزعان. سول كۇنى وسى اۋدانعا قاراستى 96-رازەزد ەلدى مەكەنىنىڭ تۇرعىندارى دا ۇلكەن قۋانىشقا بولەندى. بۇل ەلدى مەكەندە «استانا كوكتەم س» جشس قۇرىلىسشىلارى تۇرعىزعان 140 ورىندىق جاڭا بالاباقشا عيماراتى بۇلدىرشىندەر ءۇشىن ەسىگىن ايقارا اشتى.
جىلقىباي جاعىپار ۇلى,
باقبەرگەن امالبەك,
«ەگەمەن قازاقستان».
