سەناتورلار جول ساپاسىن جاقسارتۋ ءۇشىن باقىلاۋدى كۇشەيتۋدى ۇسىندى

پارلامەنت • 26 قاراشا، 2020

سەناتورلار جول ساپاسىن جاقسارتۋ ءۇشىن باقىلاۋدى كۇشەيتۋدى ۇسىندى

7 رەت كورسەتىلدى

سەنات توراعاسىنىڭ ورىنباسارى نۇرلان ءابدىروۆ جانە سەناتورلار رىسقالي ابدىكەروۆ پەن سەرگەي ەرشوۆ ەلىمىزدەگى ماڭىزدى اۆتوجولداردىڭ ساپاسىنا، سونداي-اق، وسى سالاداعى وزەكتى پروبلەمالارعا ۇكىمەت باسشىسىنىڭ نازارىن اۋداردى. دەپۋتاتتار ساۋالىندا جىل سايىن جولداردىڭ جوندەلۋى مەن كۇتىمى ءۇشىن بولىنەتىن قوماقتى قاراجات تا ءسوز بولدى، دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.

Marzhan Tileubekova

قازىرگى تاڭدا اۆتوجول سالاسىندا ەڭ ءجيى كەزدەسەتىن ماسەلەلەردىڭ ءبىرى – جۇك اۆتوموبيلدەرىنىڭ شامادان تىس جۇك تاسۋى بولىپ وتىر. بۇل جاڭادان سالىنعان جولداردىڭ مەرزىمىنەن بۇرىن بۇزىلۋىنا الىپ كەلەدى.

ستاتيتيكاعا جۇگىنسەك، ەلىمىزدەگى جولداردىڭ 9،3 پروتسەنتى عانا 10 توننادان استام جۇكتەمەنى قابىلداي الادى. ال، جالپى پايدالانىمداعى جولداردىڭ 90،7 پروتسەنتى جۇك كولىكتەرىنىڭ ەڭ از سالماعىنا دا توتەپ بەرە المايدى. ول ازداي، ساپاسى جاعىنان قاۋىپتى ساناتتا تۇر.

زاڭعا سايكەس جالپى پايدالانىمداعى اۆتوجولدار ارقىلى جۇك كولىگىمەن 25 توننادان استام جۇك تاسىمالداۋعا تىيىم سالىنعان. الايدا، دەپۋتاتتار كەلتىرگەن اقپارات بويىنشا وسى جولدارمەن 40 تونناعا دەيىن جۇك تاسىمالداۋ تولاستاماي تۇر.

"بۇل پروبلەماعا توسقاۋىل بولاتىن باقىلاۋشى ورگانعا باسا ءمان بەرۋ قاجەت. مىسالى، ەلىمىزدە 95 مىڭ 600 شاقىرىم بولاتىن اۆتوموبيل جولى بار. ال كولىكتىك باقىلاۋ ينسپەكتسياسىنىڭ جالپى شتات سانى 278 ماماندى قۇرايدى، كولىكتىك باقىلاۋ بەكەتتەرىنىڭ سانى – 53. دەمەك، ءبىر كولىكتىك باقىلاۋ بەكەتى شامامەن 2 مىڭ شاقىرىم اۆتوموبيل جولىن نازاردا ۇستاۋ كەرەك. بۇل، ارينە، اۆتوموبيل جولدارىن تولىققاندى باقىلاۋ ءۇشىن جەتكىلىكسىز"، – دەيدى سەناتورلار.

وسىعان بايلانىستى دەپۋتاتتار اۋىر جۇك تاسىمالداۋشى كولىكتەردى تەكسەرۋ مەن باقىلاۋدى كۇشەيتۋدى جانە جۇك تاسىمالداۋ فاكتىلەرىن (تەحپاسپورت نەگىزىندە، ولشەۋسىز) تەكسەرۋ قۇقىعىن پوليتسياعا دا بەرۋ مۇمكىندىگىن قاراستىرۋدى سۇراپ وتىر. سونداي-اق، ساۋال بارىسىندا وبلىستىق جانە اۋداندىق ماڭىزى بار اۆتوموبيل جولدارىن سالۋ، جوندەۋ جۇمىستارى كەزىندە زاماناۋي يننوۆاتسيالىق تەحنولوگيالاردى كەڭىنەن قولدانۋدى تالاپ ەتۋدىڭ قاجەتتىلىگى دە ايتىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز