11 قاراشا كۇنى حرومتاۋ اۋداندىق اۋرۋحاناسىنا ءىشى اۋىرىپ, قۇسۋ بەلگىلەرىمەن جاتقىزىلعان بالا ءۇش كۇننەن سوڭ وبلىستىق جۇقپالى اۋرۋلار اۋرۋحاناسىنا اۋىستىرىلعان. بۇل جەردە بالانىڭ ۆيرۋستىق پنەۆمونياعا شالدىققانى انىقتالدى.
«كوروناۆيرۋسقا پتسر-تالداۋ ناتيجەسى تەرىس بولعانىن كورسەتتى. الايدا بالا قايتىس بولدى. قازىر وسى بالا ولىمىنە بايلانىستى قۇرىلعان كوميسسيا تەكسەرۋدى باستادى», دەدى ب.ءىزباساروۆ.
قازىرگى كەزدە وبلىستىڭ 44 تۇرعىنى ۆيرۋستىق پنەۆمونيادان ەم قابىلداپ جاتىر. ونىڭ 11-ءى – قارعالى, مارتوك, شالقار, حرومتاۋ اۋدانىنىڭ تۇرعىندارى. ەكى اپتا بۇرىن كوروناۆيرۋس ينفەكتسياسىن جۇقتىرعان مەكتەپ وقۋشىسى انىقتالعان شالقار اۋدانىنداعى قورعانتۇز ورتا مەكتەبى, اقتوبە قالاسىنداعى ءۇش بالاباقشا دا كارانتينگە جابىلدى.
وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى نۇرسۇلۋ بەركىمباەۆا وڭىردە ەپيدەميالىق جاعداي تۇراقتى بولعانىمەن, جۇرتشىلىق كارانتين تالاپتارىن ساقتاماسا, جاعداي ءاپ-ساتتە وزگەرۋى مۇمكىن ەكەنىن حابارلادى. ويتكەنى تەك سوڭعى تاۋلىكتە عانا وبلىستا كوروناۆيرۋس ينفەكتسياسىن جۇقتىرعان 8 جاعداي تىركەلدى. ونىڭ بەسەۋى – اقتوبە قالاسىنىڭ, ەكەۋى – مارتوك, بىرەۋى العا اۋدانىنىڭ تۇرعىندارى. كارانتينگە قاراماستان, شەكاراداعى جولاۋشىلار اعىنى تولاستاماي وتىر. ماسەلەن, 6 قاراشادان بەرى قارعالى اۋدانىنداعى «الىمبەت» سانيتارلىق-وتكىزۋ بەكەتىنەن رەسەي فەدەراتسياسىنان ءارلى-بەرلى 7 893 ادام, مارتوك اۋدانىنداعى «جايساڭ» بەكەتىنەن 19 205 ادام وتكەن. بۇلاردىڭ ىشىنەن 27 جولاۋشىدان كوروناۆيرۋس ينفەكتسياسى انىقتالدى. ولاردىڭ 12-ءسى ترانزيتتىك كولىك جۇرگىزۋشىلەرى بولىپ شىقتى. وسى ۋاقىتتا كوروناۆيرۋس ينفەكتسياسىنا تەكسەرىلگەن پتر-انىقتاماسى بولماعان 14 رەسەيلىك ازامات ەلىمىزدىڭ شەكاراسىنان كەرى قايتارىلعان.
