«اكتسيانىڭ نەگىزگى مىندەتى - قوعام نازارىن ەكى شۇعىل پروبلەماعا اۋدارۋ: تۇرمىستىق زورلىق-زومبىلىق پەن ادام ساۋداسىنىڭ الدىن-الۋ جانە وعان قارسى ءىس-قيمىل, سونداي-اق مەملەكەتتىك مەكەمەلەر مەن قوعامدىق بىرلەستىكتەردىڭ ادام قۇقىقتارىن قورعاۋ بويىنشا كۇش-جىگەردى بىرىكتىرۋ قىزمەتىن جانداندىرۋ. ىشكى ىستەر ورگاندارى ايەلدەر مەن بالالارعا قاتىستى زورلىق-زومبىلىق جاسايتىن جانە جاساۋعا بەيىم ادامداردى بەلسەندى تۇردە انىقتايدى جانە ولارمەن پروفيلاكتيكالىق جۇمىستار جۇرگىزەدى. سونداي-اق ايەلدەردىڭ وزدەرىنىڭ قۇقىقتارى مەن قورعاۋ نىساندارى تۋرالى قۇقىقتىق ساۋاتتىلىق دەڭگەيىن ارتتىرۋ بويىنشا ماماندارمەن ءىس-شارالار وتكىزىلەدى», - دەدى اكىمنىڭ باس ينسپەكتورى - نۇر-سۇلتان اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا حاتشىسى ءمولدىر بولەباەۆا.
پوليتسيا دەپارتامەنتىنىڭ مالىمەتى بويىنشا, ۇستىمىزدەگى جىلى تۇرمىستىق قۇقىق بۇزۋشىلىق بويىنشا 1 146 ادام جاۋاپقا تارتىلعان. زارداپ شەككەندەردى قورعاۋ ءۇشىن 6554 قورعانىس بۇيرىعى شىعارىلدى, 270 ايەل داعدارىس ورتالىعىنا ورنالاستىرىلدى.
«وتباسىلىق جانجالدارعا بايلانىستى 102 نومىرىنە قايتالانعان قوڭىراۋلاردى وڭدەۋ تاجىريبەسى ەنگىزىلدى. وسىلايشا, ۋچاسكەلىك ينسپەكتورلاردىڭ جۇمىسىنا باقىلاۋ كۇشەيتىلدى. ازاماتتىق باستامالاردى قولداۋ ورتالىعىمەن بىرگە تۇرمىستىق زورلىق-زومبىلىق قۇرباندارىنا جانە پروبلەمالى وتباسىلارعا قۇقىقتىق جانە پسيحولوگيالىق كومەك كورسەتىلەدى», - دەدى نۇر-سۇلتان قالاسى پوليتسيا دەپارتامەنتى ايەلدەردى زورلىق-زومبىلىقتان قورعاۋ ءبولىنىسىنىڭ اعا ينسپەكتورى گۇلميرا شراحمەتوۆا.
«زورلىق-زومبىلىقسىز 16 كۇن» الەۋمەتتىك اكتسياسى - ايەلدەرگە قاتىستى زورلىق-زومبىلىقتى جويۋدىڭ حالىقارالىق كۇنى - 25 قاراشادا باستالاتىن جانە 10 جەلتوقسان - ادام قۇقىقتارى كۇنىنە دەيىن جالعاساتىن جىل سايىنعى حالىقارالىق ناۋقان.
بۇل كۇندى 1999 جىلى بۇۇ باس اسسامبلەياسى رەسمي تۇردە جاريالادى جانە اتاۋلى كۇن الەمنىڭ 100-دەن استام ەلىندە قولداۋ تاپقان.
