وڭىرلىك مەديتسيناعا كومەك رەتىندە 100 جىلجىمالى مەديتسينالىق كەشەن جەتكىزىلدى

قوعام • 25 قاراشا، 2020

وڭىرلىك مەديتسيناعا كومەك رەتىندە 100 جىلجىمالى مەديتسينالىق كەشەن جەتكىزىلدى

10 رەت كورسەتىلدى

شالعاي اۋدانداردىڭ تۇرعىندارىن باستاپقى مەديتسينالىق دياگنوستيكامەن قامتاماسىز ەتۋ ءۇشىن وڭىرلەردەگى مەديتسينالىق ۇيىمدارعا 100 جىلجىمالى مەديتسينالىق كەشەن جەتكىزىلە باستادى. كەشەندەردى وبلىستارعا تابىستاۋ شارالارى قاراشا ايىنىڭ سوڭىندا تولىقتاي اياقتالادى، دەپ حابارلايدى Egemen.kz يدم ءباسپاسوز قىزمەتىنە سىلتەمە جاساپ.

Marzhan Tileubekova

مەديتسينالىق كەشەندەر كوشپەلى جاعدايدا ازاماتتاردىڭ دەنساۋلىعىن تەكسەرۋدىڭ كەڭ سپەكترىنە ارنالعان. دياگنوستيكالىق كەشەن 7 كابينەتتەن تۇرادى: جالپى قابىلداۋ كابينەتى، جالپى تاجىريبەلىك دارىگەر ايماعى، تالداۋلاردى قابىلداۋ ايماعى، ءدارىحانا پۋنكتى، فۋنكتسيونالدىق دياگنوستيكا كابينەتى، اكۋشەر-گينەكولوگ كابينەتى، سونداي-اق ساۋلەلىك دياگنوستيكا كابينەتى بار. سونىمەن قاتار، ءموبيلدى مەديتسينالىق ورتالىقتا ارنايى قورعاسىنمەن قاپتالعان بولمە ورناتىلعان، وندا رەنتگەن جانە فليۋوروگرافيانى قاۋىپسىز جاساۋعا بولادى.

كابينەتتەر كومپيۋتەر، ەدەن تارازىسى، وتوسكوپ، وفتالموسكوپ، بيوحيميالىق اناليزاتور، گەماتولوگيالىق اناليزاتور، كواگۋلوگراف، لەيكوتسيتتەر ەسەپتەگىشى، ەكگ، ۋدز، گليۋكومەتر سياقتى زاماناۋي تسيفرلىق جابدىقتارمەن جابدىقتالعان.

مەديتسينالىق كەشەننىڭ تاعى ءبىر ەرەكشەلىگى – اۆتونومدىق جۇيە، اۆتوبۋستا 16 كۆ (كيلوۆات) گەنەراتور ورناتىلعان، ول قالالىق ەلەكتر جەلىسىنەن دە جۇمىس ىستەي الادى. تولىق تەرمووقشاۋلاۋ جانە انتيكوۆيد جۇيەسى قاۋىپسىز جۇمىس ىستەۋ ءۇشىن وڭتايلى جاعداي جاسايدى. ال اۆتوماتتاندىرىلعان پاندۋس-ليفت مۇمكىندىگى شەكتەۋلى جانداردى قابىلداۋ ءۇشىن ىڭعايلى.

جىلجىمالى مەديتسينالىق كەشەندەر دەنساۋلىق ساقتاۋ مينيسترلىگىنىڭ تاپسىرىسى بويىنشا وتاندىق كاسىپورىنداردا جاسالدى.

ايتا كەتۋ كەرەك، دەنساۋلىق ساقتاۋ مينيسترلىگى مەن يندۋستريا جانە ينفراقۇرىلىمدىق دامۋ مينيسترلىگىنىڭ جول كارتاسى اياسىندا "ونەركاسىپتى دامىتۋ قورى" اق ليزينگتىك قارجىلاندىرۋ تەتىگى ەسەبىنەن ەلىمىزدە وسى جىلى بارلىعى 1167 سانيتارلىق اۆتوكولىكتى جاڭارتۋ جوسپارلانعان.

باعدارلامانى ىسكە اسىرۋ ءۇشىن وتاندىق وندىرۋشىلەر: "سارىارقااۆتوپروم" جشس، "سەماز" جشس جانە "Hyundai Trans Auto" جشس تارتىلدى، ولار Jac Sunrey، گازەل NEXT جانە Hyundai h350 وتاندىق ءوندىرىس بازاسىندا اۆتوموبيلدەردى جەتكىزۋدى جۇزەگە اسىرادى.

سونىمەن قاتار "سامۇرىق-قازىنا "ۇلتتىق ءال-اۋقات قورى" اق جانە Kaspi بانكىنىڭ ارنايى تاپسىرىستارى بويىنشا اعىمداعى جىلى دەنساۋلىق ساقتاۋ مينيسترلىگىنە قوستاناي "سارىارقااۆتوپروم" زاۋىتىنان Chevrolet Damas بازاسىندا 200 بىرلىك سانيتاريالىق ماشينا بەرىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز