ۇلى دەرجاۆالىق مۇددەلەر, يمپەرياليستىك وكتەم ساياسات, قوعامدىق پىكىرلەردىڭ ق ۇلى بولعان ساياسي قايراتكەرلەردىڭ سولقىلداق نەمەسە ساۋاتسىز شەشىمدەرى داۋ-دامايلاردىڭ, سوعىس وشاقتارىنىڭ كوبەيۋىنە, مەملەكەتارالىق, كونفەسسياارالىق قايشىلىقتاردىڭ ورشۋىنە, ەكسترەميستىك, لاڭكەستىك توپتاردىڭ بەلسەندى ءىس-قيمىلعا كوشۋىنە, ادام قۇقىعىنىڭ تاپتالۋىنا تىكەلەي اسەر ەتىپ وتىرعانىن ەشكىم جوققا شىعارمايدى. وسىناۋ ۇدەرىستەردىڭ وزەگىندە وزگەنىڭ كوزقاراستارى مەن ۇستانىمدارىنا توزىمسىزدىك تانىتۋ, مەنمەندىك پەن تاكاپپارلىق, باسقانىكىن جاسىق, وزىنىكىن جاھۇت سانايتىن وزىمشىلدىك پيعىلدار جاتىر. وسىندايدا ءوزارا كەلىسىم, تولەرانتتىلىق سىندى ەڭ قاجەتتى قۇندىلىقتاردىڭ كەيىنگە ىسىرىلىپ, ءبىر-بىرىنە جۇدىرىق الا جۇگىرۋ ءتاسىلىنىڭ «اتى وزىپ» تۇرعانىن ەرىكسىز مويىندايسىڭ.
قازىرگى تاڭدا ادامزات وركەنيەتتىڭ يگىلىگىن كورەمىن دەسە, ءبىرىنشى كەزەكتە تولەرانتتىلىققا, سونىڭ اياسىنداعى ادامگەرشىلىك قاعيداتتارىنا جۇگىنۋى ءتيىس. ءوزارا سىيلاستىق پەن قۇرمەتتىڭ ازايماۋىنا ۇيىتقى بولا بىلەتىن تولەرانتتىلىق قاعيدالارى قاتاڭ نەمەسە ءوز دەڭگەيىندە ساقتالاتىن قوعامدا ادامداردىڭ بوستاندىعى مەن قۇقىعى ەرەكشە قورعالادى. مۇنداي ءۇردىس قالىپتاسقان جەردە تۇراقتىلىق پەن ورنىقتى دامۋ قامتاماسىز ەتىلەدى.
نەگىزىندە, تولەرانتتىلىق قاعيدالارىن, ونىڭ باستى قۇندىلىقتارىن بۇگىنگى وركەنيەتتىڭ ءبىر تىرەگى نەمەسە ماڭىزدى وزەگى رەتىندە قاراستىرۋ اسا ماڭىزدى. الايدا ءبىز بۇگىنگى وركەنيەتتى عىلىمي-تەحنولوگيالىق جەتىستىكتەر, مادەني-رۋحاني تابىستار شەڭبەرىندە عانا سيپاتتاۋدان اسا الماي كەلەمىز. ەگەر بۇگىنگى كەزەڭدى وركەنيەت ءداۋىرى دەپ تانىعىمىز كەلسە, ءبىرىنشى كەزەكتە ءبىزدىڭ باستى جەتىستىگىمىز تولەرانتتىلىق تالاپتارىن قانشالىقتى ورىنداپ جۇرگەنىمىزبەن ولشەنۋى ءتيىس. شىن مانىندە, تولەرانتتىلىق الەمدىك ەڭ باستى قۇندىلىق رەتىندە قالىپتاسپاي, مويىندالماي ءبىز بۇگىنگى زامانىمىزعا «وركەنيەتتى» دەپ ايدار تاعۋعا ءتيىستى ەمەسپىز.
بۇگىندە ناسىلدىك كەمسىتۋشىلىكتەر, ءوزىن زور, وزگەنى قور سانايتىن وكتەمشىل كوزقاراس يەلەرىنىڭ قارادۇرسىن ءىس-ارەكەتتەرى دىنارالىق, ۇلتارالىق تۇيتكىلدەردى ۋشىقتىرا تۇسۋدە. بۇل جاعداي قارسىلاس كۇشتەردىڭ كوپتەپ شىعۋىنا, ءتۇرلى تاراپتاردىڭ قاپى قالماۋ قارەكەتىنە كوشۋىنە, جاڭا جانجال الاڭدارىنىڭ پايدا بولۋىنا اكەلۋدە. الەمدى تولعاندىرىپ وتىرعان وسىنداي جاعىمسىز ۇردىستەردەن قازاق قوعامى ءاردايىم ساباق الۋى ءتيىس.
ەلىمىزدە ارانداتۋشى, ازعىرۋشى كۇشتەردىڭ از ەمەس ەكەنىن ءىشىمىز سەزەدى. ولاردىڭ وتقا ماي قۇياتىن «قىزۋقاندى», اسىرە پىكىرلەرىن, قازاقستاندىق تولەرانتتىلىقتى بويكۇيەزدىككە تەڭەيتىن سىني ويلارىن, قازاقتىڭ بويىنداعى تابيعي سالقىنقاندىلىق پەن سابىرلىلىقتى, بايىپتىلىقتى ەنجارلىق پەن ەسسىزدىككە, قورقاقتىق پەن جاسىقتىققا بالايتىن شىمشىما سوزدەرىن, ەشتەڭەنىڭ بايىبىنا بارماي شوقپارىن الا جۇگىرەتىن تەنتەك بولۋعا ۇندەۋىن بۇگىنگى قازاق قوعامىن وياتۋدىڭ ءتيىمدى تەتىگى دەپ قاراستىرماعانىمىز ابزال.
ۇلى دالامىزدا, ياعني كەشەگى قازاق قوعامىندا قالىپتاسقان تولەرانتتىلىق, توزىمدىلىك ۇردىستەرى بۇگىنگى قوعامىمىزداعى ءوزارا كەلىسىم مەن تاتۋلىقتىڭ باستاۋىندا تۇرعانىن ەسكەرگەنىمىز ءجون. سونداي-اق قازاق ۇلتىنىڭ كەز كەلگەن دۇشپانىن, ىزعارىن شاشقان نەبىر زامانالاردىڭ ىلاڭىن ەڭ باستىسى توزىمدىلىگىمەن, شىدامدىلىعىمەن جەڭىپ, بولاشاقتىڭ ۇلى جولىنان اداسپاي كەلە جاتقانىن ۇمىتپاۋىمىز كەرەك. وسىنى جاقسى بىلەتىن پيعىلى بوتەندەر سوڭعى كەزدەرى جىمىسقىلىقپەن «شاپتان ءتۇرتۋ» ءادىسىن قولدانىپ, جىلقى مىنەزدى قازاقتى موڭكىتىپ, جولىنان تايدىرعىسى كەلەتىنىن اڭعارتىپ ءجۇر. شاپتان تۇرتكەندە ەر-توقىمىن باۋىرىنا الىپ موڭكيتىن اتتىڭ كۇيىن كەشتىرگىسى كەلەتىن نيەتى بۇزىقتاردىڭ ىزدەگەنىن الدىنان كەزىكتىرمەۋىمىز ءۇشىن بۇگىنگى قازاققا سابىر, شىدام, سالقىن اقىل كەرەك.
تاۋەلسىزدىك, ىشكى بىرلىك, ىنتىماق – ءتۇرتىپ قالساڭ شاشىلىپ كەتۋى وڭاي جۇقا شىنىنىڭ ىشىندە تۇرعان اسا باعالى قۇندىلىق. ونى ارانداتۋشى مەن شىنايى جاناشىردى, ازعىرۋشى مەن شىندىعىن ايتىپ شىرىلدايتىندى انىق ايىرا بىلەتىن ۇلت قانا سىندىرىپ الماي, ابايلاپ ۇستاي بىلەدى. ءبىز قازىر وسىنداي ۇلتتاردىڭ قاتارىندامىز. ءبىزدىڭ وسى ساپتان كورىنۋىمىز ءاردايىم تولەرانتتىلىققا, ءوزارا كەلىسىمگە عانا جۇگىنىپ كەلە جاتقانىمىزدىڭ ارقاسى. وسىنى ۇمىتپايىق.
