قوعام • 24 قاراشا، 2020

ساراپشىلار "Nur Otan"-نىڭ سايلاۋالدى باعدارلاماسىن تالقىلادى

19 رەت كورسەتىلدى

"Nur Otan" پارتياسىنىڭ ءماجىلىس سايلاۋىنا ارنالعان سايلاۋالدى باعدارلاماسىن ساراپشىلار قاۋىمداستىعىنىڭ وكىلدەرى، سونىمەن بىرگە، بەلگىلى ساياساتتانۋشىلار، قوعام بەلسەندىلەرى مەن ەكونوميستەر تالقىلادى، دەپ حابارلايدى Egemen.kz.

ولاردىڭ اراسىندا قسزي ديرەكتورى زارەما شاۋكەنوۆا، ەكونوميكالىق زەرتتەۋلەر ينستيتۋتىنىڭ توراعاسى رۋسلان سۇلتانوۆ، ساياساتتانۋشىلار ايدوس سارىم، ماكسيم كازناچەەۆ، يسلام كۋراەۆ جانە راسۋل جۇمالى، ەۋرازيالىق ينتەگراتسيا ينستيتۋتىنىڭ ديرەكتورى ەرلان سايروۆ، قولدانبالى زەرتتەۋلەر ورتالىعىنىڭ باسشىسى راحىم وشاقباەۆ، ساراپشىلار يارالي حاليلوۆ، نۇرلان ماحمۋدوۆ، بەللا گادزيەۆا، ءلاززات نۇرقاتوۆا جانە ت. ب. بار.

كەزدەسۋدە سويلەگەن "Nur Otan" حاتشىسى ارمان قىرىقباەۆتىڭ اتاپ وتكەنىندەي، ەلباسى، پارتيا ليدەرى نۇرسۇلتان نازارباەۆتىڭ تاپسىرماسىنا وراي جۇمىس توبى ۇكىمەتپەن بىرگە ەكى اي ىشىندە، بۇرىنعى تاجىريبە مەن الەمدىك ترەندتەردى ەسكەرىپ، قوعامنىڭ سۇرانىستارىن نازارعا الا وتىرىپ، باعدارلامانى پىسىقتادى.

ەلىمىز بويىنشا 70-كە جۋىق فوكۋس-توپتار وتكىزىلدى، سونىڭ اياسىندا مەملەكەتتىك ورگان قىزمەتكەرلەرىنىڭ دە، پارتيالىقتاردىڭ دا سۇرانىستارى مەن تالاپ-تىلەكتەرى زەردەلەندى.

ەگەر باعدارلامانىڭ باستاپقى جوباسى سالالىق سيپاتقا يە بولسا، پىسىقتالعاننان كەيىن بەسجىلدىق قۇجاتتا حالىقتىڭ بارلىق توبىنىڭ سۇرانىسى بارىنشا قامتىلا ءتۇستى.

بۇل رەتتە "Nur Otan" پارتياسىنىڭ باعدارلاماسى پرەزيدەنت قاسىم-جومارت توقاەۆتىڭ سايلاۋالدى تۇعىرناماسىنا جانە حالىققا ارناعان جولداۋىندا كورسەتىلگەن مىندەتتەرىنە نەگىزدەلگەن. اتالعان قۇجاتتارداعى تۇجىرىمدامالىق يدەيالار پارتيانىڭ سايلاۋالدى باعدارلاماسىنىڭ ناقتى ينديكاتورلارىندا، شارالارى مەن مىندەتتەرىندە كورىنىس تاپتى.

كەزدەسۋگە قاتىسۋشىلاردىڭ ايتۋىنشا، "Nur Otan" پارتياسىنىڭ باعدارلاماسى پاندەميادان تۋىنداعان كۇردەلى ەكونوميكالىق احۋالعا قاراماستان اۋقىمدى بولا تۇسكەن. سونىمەن بىرگە ولار "Nur Otan" پارتياسىنىڭ رەسپۋبليكالىق پارتياىشىلىك سايلاۋ اۋقىمىندا وتكىزگەن پرايمەريزىن جوعارى باعالادى.

ساراپشى بەللا گازديەۆانىڭ ايتۋىنشا، پرايمەريزدىڭ ارقاسىندا ازاماتتاردىڭ وزەكتى ۇسىنىستارى مەن تالاپ-تىلەكتەرى جينالىپ، باعدارلاما جوباسىنا ەنگەن. ءوز كەزەگىندە ساياساتتانۋشى ماكسيم كازناچەەۆ پارتيا الداعى سايلاۋ ناۋقانىنىڭ كۇن ءتارتىبىن ايقىنداپ العانىن اتاپ ءوتتى.

"بۇل باعدارلاما پارتيانىڭ داعدارىس جاعدايىنا جەدەل دەن قويا وتىرىپ، ۋاقىتپەن قاتار قادام باسىپ كەلە جاتقانىن كورسەتەدى. وتكەن پرايمەريز پارتيانىڭ جۇيەلى جاڭارۋعا دايىن ەكەنىن دالەلدەدى. پارتياىشىلىك ىرىكتەۋ بارىسىندا بەلسەندى تۇلعالاردى انىقتاۋعا مۇمكىندىك تۋدى. پارتياعا جاڭا مۇشەلەر، ونىڭ ىشىندە ءوز سالاسىنىڭ تانىمال تۇلعالار كىردى. وڭىرلەردەگى پىكىرتالاستاردا باعدارلامالاردىڭ قىزۋ تالقىلانۋى قورىتىندى قۇجاتتا ناقتى پروبلەمالاردىڭ ەسكەرىلەتىنىن بىلدىرەدى"، - دەپ اتاپ ءوتتى ماكسيم كازناچەەۆ.

كەزدەسۋ قورىتىندىسىندا قاتىسۋشىلار وزدەرىنىڭ بىرقاتار ۇسىنىستارىن العا تارتتى. پارتيا حاتشىسى ارمان قىرىقباەۆتىڭ ايتۋىنشا، ولاردىڭ بارلىعى قارالىپ، ەسكەرىلەتىن بولادى.

ەستەرىڭىزگە سالا كەتەيىك، پارتيا ليدەرى نۇرسۇلتان نازارباەۆتىڭ تاپسىرماسى بويىنشا "Nur Otan" ءار ءوڭىر، قالا جانە اۋدان بويىنشا 216 سايلاۋالدى باعدارلامانىڭ جوبالارىن ازىرلەدى.

جوبالار وڭىرلەردەگى، ونىڭ ىشىندە ەلدىڭ ەڭ شالعاي ەلدى مەكەندەرىندەگى حالىقپەن كەزدەسۋلەردىڭ قورىتىندىلارى بويىنشا قالىپتاستىرىلعان ءتۇيىندى ماسەلەلەر كارتاسى نەگىزىندە ازىرلەندى.

پرەزيدەنت قاسىم-جومارت توقاەۆتىڭ "حالىق ۇنىنە قۇلاق اساتىن مەملەكەت" تۇجىرىمداماسىن ىسكە اسىرۋ اياسىندا باعدارلامالاردىڭ بارلىق جوبالارى پرايمەريز بارىسىندا تۇرعىندارمەن كەڭىنەن تالقىلاندى. قابىلدانعان وڭىرلىك باعدارلامالاردا ازاماتتاردىڭ 17 مىڭ ۇسىنىس پەن ەسكەرتۋلەرىنىڭ 80%-تەن استامى ەسكەرىلگەن.

سوڭعى جاڭالىقتار

ۇقساس جاڭالىقتار