ايماقتار • 24 قاراشا، 2020

جامبىل وبلىسىندا جەدەل مەديتسينالىق جاردەم كولىكتەرى جاڭارتىلدى

11 رەت كورسەتىلدى

بۇگىندە جامبىل وبلىستىق كوپبەيىندى بالالار اۋرۋحاناسىنىڭ بازاسىندا ورنالاسقان ەلباسى نۇرسۇلتان نازارباەۆ قورىنىڭ «قامقورلىق» وڭالتۋ ورتالىعىندا ەرەكشە قاجەتتىلىگى بار بالالارعا بارىنشا قولداۋ كورسەتىلۋدە. پرەمەر-ءمينيستردىڭ ورىنباسارى ەرالى توعجانوۆ تاراز قالاسىنا كەلىپ، اتالعان ورتالىققا اتباسىن بۇردى، دەپ حابارلايدى Egemen.kz.

عيماراتتى ارالاپ كورىپ، مۇنداعى اتقارىلىپ جاتقان جۇمىستارمەن دە تانىستى. سونىمەن قاتار، ەرالى توعجانوۆ وبلىستىق جەدەل مەديتسينالىق جاردەم ستانساسىنىڭ باس دارىگەرى ۆەنەرا بالقىبەكوۆاعا جەدەل جاردەم كولىكتەرىنىڭ كىلتىن تابىس ەتتى. جالپى، وسى ۋاقىتقا دەيىن وبلىستا 65 جەدەل جاردەم كولىگىنىڭ توزىعى جەتكەنى سەبەپتى ولاردى اۋىستىرۋ كەرەكتىگى ايتىلىپ كەلگەن بولاتىن. ياعني، وڭىردەگى جەدەل جاردەم كولىكتەرىنىڭ 48،8 پايىزى جاڭارتۋدى قاجەت ەتەتىن. ەندى سول ولقىلىقتىڭ ورنى تولىپ، 18 Hyundai ماركالى رەانوموبيل، 3 ۋاز جانە JAC

ماشينالارى پايدالانۋعا بەرىلدى. بەرىلگەن كولىكتەردىڭ ءبارى دە تالاپقا ساي زاماناۋي قۇرال-جابدىقتارمەن جابدىقتالعان.

«جامبىل وبلىسىنداعى جۇمىس ساپارىمدى قورداي اۋدانىنان باستادىم. پرەزيدەنت قاسىم-جومارت توقاەۆتىڭ تاپسىرماسىنا سايكەس، بەيبىتشىلىك جانە كەلىسىم جوباسى اياسىنداعى كۇن تارتىبىندە تۇرعان ماسەلەلەر وندا ءجۇز پايىز دەڭگەيدە ورىندالعانىن كوردىم. سول جەردەگى جەرگىلىكتى جانە ءاربىر ەتنوس وكىلدەرىنىڭ ازاماتتارىمەن كەزدەسىپ، پىكىرلەستىم. كوروناۆيرۋستىڭ اسەرىنەن مەديتسينا سالاسىندا كوپتەگەن قيىندىقتار تۋىنداعانىن بىلەسىزدەر. ول كەزەڭدى بىرلىكتىڭ ارقاسىندا بۇكىل ەل بولىپ بىرگە ەڭسەردىك. ونداي قيىندىقتار ەندى بولماسىن دەپ تىلەيىك. مىنە، بۇگىن ءوڭىردىڭ دەنساۋلىق سالاسىن ىلگەرىلەتەتىندەي ماتەريالدىق-تەحنيكالىق بازاسى جاراقتاندىرىلىپ وتىر. الەمدى جايلاعان وسى ىندەتتىڭ الدىن-الۋ شارالارىنا بايلانىستى ناقتى تاپسىرمالار دا بەرىلدى. سونىڭ ءبىرازى جۇزەگە اسىرىلعان. ءدارى-دارمەكتىڭ ەكى ايلىق قورى تولىقتاي قامتاماسىز ەتىلگەن. سونىمەن قاتار، ءاربىر وبلىستا ارنايى تۇراقتىلىق قورلارى قۇرىلعان بولاتىن. جامبىل وبلىسى دا بۇل ءىستى ستاندارتقا ساي ورىنداپ وتىر»، دەدى ۆيتسە-پرەمەر.

سونىمەن قاتار، جەدەل جاردەم كولىكتەرىن ءجۇز پايىز جاڭالاۋعا مۇمكىندىكتىڭ بار ەكەنىن ايتىپ، قيىن-قىستاۋ كەزەڭدە اتقارعان جۇمىستارى ءۇشىن دارىگەرلەرگە العىسىن ءبىلدىردى. ال، وبلىس اكىمى بەردىبەك ساپارباەۆ مەملەكەت تاراپىنان كورسەتىلىپ جاتقان بۇل كومەكتىڭ ەل يگىلىگى ءۇشىن ەكەنىن ايتىپ، پرەزيدەنت پەن ۇكىمەتكە العىسىن جەتكىزدى.

سوڭعى جاڭالىقتار

ۇقساس جاڭالىقتار