بىرىڭعاي جيناقتاۋشى زەينەتاقى قورى ءباسپاسوز قىزمەتىنىڭ حابارلاۋىنشا, سالىمشىلاردىڭ دەنى جەكە شوتتى ينتەرنەت ارقىلى باقىلاپ وتىرعاندى ءجون كورەدى. بۇگىندە بۇل ءتاسىلدى 6,6 ملن-نان استام ادام پايدالانىپ وتىر. بۇل دەگەنىمىز – جالپى سالىمشىلار ۇلەسىنىڭ 54,2 پايىزى. ماسەلەن, enpf.kz سايتىنداعى جەكە كابينەت نەمەسە ENPF ۇيالى قوسىمشاسى ارقىلى 5 762 454 شوتتىڭ جاي-كۇيى باقىلانىپ وتىرادى ەكەن. مۇنداي ءتاسىلدى تاڭداعانداردىڭ سانى ءبىر جىل ىشىندە 4 پايىزعا نەمەسە 225 125 ادامعا كوبەيگەن.
سونداي-اق جەكە زەينەتاقى شوتى تۋرالى اقپاراتتاردى ەلەكتروندى پوشتا ارقىلى باقىلاۋعا بولادى. بۇل ءتاسىلدى 853 954 ادام پايدالانادى ەكەن. اتالعان ءتاسىلدى پايدالانۋ ءۇشىن بىرىڭعاي جيناقتاۋشى زەينەتاقى قورىنا ەلەكتروندى پوشتانىڭ مەكەنجايىن قالدىراسىز. كەيىن شوت يەسىنە تاڭداعان كەستەگە سايكەس ءتيىستى اقپارات اي سايىن, توقسان سايىن, جارتى جىلدا ءبىر رەت نەمەسە جىل سايىن كەلىپ تۇراتىن بولادى.
شوتتاعى اقپاراتتىڭ كوشىرمەسىن ءداستۇرلى پوشتا ارقىلى الاتىندار ءالى دە كوپ. بۇل ءتاسىلدى 1 297 726 ادامنىڭ قولداناتىنى بەلگىلى بولدى. دەسە دە, ءداستۇرلى پوشتاعا يەك ارتاتىنداردىڭ ۇلەسى ازايىپ كەلەدى. ماسەلەن, 5 جىل بۇرىن مۇنداي ءتاسىلدى تاڭداعان سالىمشىلاردىڭ سانى 2 939 233 ادامدى قۇراعان. دەمەك, كورسەتكىش بەس جىل ىشىندە 44 پايىزعا كەمىگەن.
«سالىمشى شوت تۋرالى اقپاراتتى جىلىنا ءبىر رەت ءداستۇرلى پوشتا ارقىلى الىپ تۇرۋدى قالاسا, تۇرعىلىقتى مەكەنجايىن دۇرىس كورسەتۋى كەرەك. مەكەنجايى وزگەرگەن جاعدايدا ونى قورعا حابارلاۋى ءتيىس. «زەينەتاقىمەن قامسىزداندىرۋ تۋرالى» زاڭدا مۇنداي تالاپتى مەكەنجايى وزگەرگەننەن كەيىن 10 كۇن ىشىندە ورىنداۋ قاجەت ەكەنى كورسەتىلگەن. ايتپەسە, پوشتا وپەراتورى شوت تۋرالى اقپاراتتى ءتيىستى مەكەنجايعا جەتكىزە الماۋى مۇمكىن. يەسىن تاپپاعان حات قورعا قايتىپ ورالادى. سوندىقتان بىرىڭعاي جيناقتاۋشى زەينەتاقى قورى كەلەسى جىلدان باستاپ حابارلاۋ مارتەبەسى «انىقتالماعان» دەپ كورسەتىلگەن سالىمشىعا شوت تۋرالى اقپاراتتى جىبەرمەيدى. قاراشا ايىنىڭ باسىندا مۇنداي سالىمشىلاردىڭ سانى 1 ملن-نان استام ادامدى نەمەسە جالپى سالىمشىلار سانىنىڭ 8,8 پايىزىن قۇرادى», دەلىنگەن قوردىڭ رەسمي حابارلاماسىندا.
ال قور كەڭسەلەرىنە كەلىپ اقپارات الاتىنداردىڭ سانى – 3 029 417 ادام. وتكەن جىلى بۇل كورسەتكىش 1 938 547 ءوتىنىشتى قۇراعان ەكەن. ءبىر جىل ىشىندەگى ءوسىم 56,3 پايىزعا جەتكەن. وسى ورايدا, بۇل ستاتيستيكانى كوبىنەسە جاڭادان اشىلعان شوت يەلەرىنىڭ تولىقتىرعانىن ەسكەرگەن ءجون.
«بىرىڭعاي جيناقتاۋشى زەينەتاقى قورى زەينەتاقى جۇيەسىنە جاڭادان تىركەلگەندەرگە 2019 جىلدان باستاپ جەكە شوت اشۋ ءۇشىن شارت جاساۋدىڭ قاجەتى جوق ەكەنىن ەسكەرتەدى. ءبىرىنشى جارنا تۇسكەن كەزدە شوت اۆتوماتتى تۇردە اشىلادى. جەكە تۇلعانى سايكەستەندىرۋ مىندەتتى زەينەتاقى جارنالارىن اۋدارۋ كەزىندە تولەم تاپسىرماسىنىڭ ەلەكتروندى فورماتىندا كورسەتىلگەن دەربەس دەرەكتەر بويىنشا جۇزەگە اسىرىلادى. ال جەكە تۇلعانىڭ جەكە باسىن كۋالاندىراتىن قولدانىستاعى قۇجاتتىڭ دەرەكتەمەلەرى, تۇراقتى تۇراتىن جەرى تۋرالى بارلىق قاجەتتى مالىمەتتەردى بىرىڭعاي جيناقتاۋشى زەينەتاقى قورى مەملەكەتتىك ورگانداردىڭ اقپاراتتىق جۇيەلەرىنەن الادى. مۇنداي شوتتى اشۋ كەزىندە حابارلاۋ ءتاسىلى اۆتوماتتى تۇردە ء«وزى كەلىپ ءوتىنىش بىلدىرگەن» دەپ ايقىندالادى. سوندىقتان جەكە زەينەتاقى شوتىن ەندى اشقان سالىمشىلار بجزق كەڭسەسىنە كەلىپ, قاجەتتى حابارلاۋ ءتاسىلىن تاڭداۋى كەرەك. سونداي-اق مۇنى ەلەكتروندى تسيفرلى قولتاڭبا ارقىلى enpf.kz سايتىنە ەنىپ, قاشىقتان جاساۋعا دا مۇمكىندىك بار», دەيدى قوردىڭ ءباسپاسوز قىزمەتى.
