ورىستىڭ بەلگىلى اقىنى ەۆگەني ەۆتۋشەنكو رەسەي جازۋشىلار وداعىن قايتا جاڭعىرتۋدى تالاپ ەتتى. ونىڭ سوزىنە قاراعاندا, ماسكەۋدە باسشىلىعى جانە ادەبي قورى بار ءبىرتۇتاس ۇيىم بولۋعا ءتيىس. بۇل تۋرالى «نوۆىە يزۆەستيا» گازەتى حابارلادى.
ايتۋلى اقىننىڭ وسىنى تالاپ ەتكەن ماقالاسى «ليتەراتۋرنايا گازەتانىڭ» 27 قاراشا كۇنگى نومىرىندە جارىق كوردى. وندا اۆتور ۇيىمنىڭ «ءوز ارىپتەستەرىن ۇلتتىق نەمەسە ساياسي جاعىنان قورلاۋعا جول بەرگەن كەز كەلگەن مۇشەسىن ءوز قاتارىنان شىعار الاتىن ءبىرتۇتاس ەتيكالىق كودەكسى» بولۋى ءتيىس ەكەنىن قاداپ ايتقان.
ە.ەۆتۋشەنكونىڭ پىكىرىنشە, كسرو جازۋشىلار وداعى تاراعاننان كەيىن, ءبىر-بىرىمەن جاۋلاسۋشى ۇيىمدارداعى (رەسەي جازۋشىلار وداعى مەن ورىس جازۋشىلارىنىڭ وداعىن ايتىپ وتىر) «مۇشەلەردىڭ ساندىق مولشەرى كۇرت ارتتى دا, ساپاسى سولايشا كۇرت ءتۇسىپ كەتتى». بۇدان ءارى ول وداقتاردىڭ قالاي قۇلاعاندارىن, ادەبي قوردىڭ قالاي بولدى بولعانىن بايانداپ وتەدى. سوڭىندا ول ءبىرتۇتاس وداقتىڭ قالايدا كەرەك ەكەنىن العا تارتادى. «ول قازىر سۇمدىق ءتۇسىپ كەتكەن ساپالىق دەڭگەيدى كوتەرەر ەدى», - دەپ تۇيىندەيدى قالامگەر.
كسرو-دا جازۋشىلار وداعى 1934 جىلى قۇرىلعان ەدى. ال 1991 جىلى كەڭەس وداعىنىڭ تاراۋىمەن بىرگە ول دا تاۋەلسىزدىك العان ءار مەملەكەتكە ءبولىنىپ كەتتى. سول دۇربەلەڭنەن كەيىن رەسەيدە ەكى جازۋشىلار وداعى پايدا بولعان. ونىڭ ءبىرى «پاتريوتتىق» (بۇرىننان كەلە جاتقانى) جانە «دەموكراتيالىق» (سول كەزدە قۇرىلعانى) باعىت ۇستادى. بىراق «ءبىر تويدا ەكى جارشىنىڭ بولمايتىنى» راس ەكەن, ءبىرى-بىرىمەن ۇستاسقان ۇيىمدار اقىرىن ءبىر ءبىرىن جويىپ تىندى.
ساكەن مايلىباي.
دەرەككوز: نوۆىە يزۆەستيا.
