جارىستىڭ شىمىلدىعىن ەركىن كۇرەس شەبەرلەرى اشادى. ولار 10 سالماق دارەجەسىنىڭ جۇلدەلەرىن ساراپقا سالادى. 57 كگ سالماق دارەجەسىندەگى بالۋانداردىڭ دەڭگەيلەرى بىردەي. ولاردىڭ اراسىنان ەشكىمدى بولە-جارا اتاي المايمىز. ەسەسىنە, 61 كگ سالماقتاعى تارتىس قىزىقتى وتەدى دەگەن ويدامىز. نەگىزگى باسەكەلەستىك نۇريسلام ساناەۆ پەن راسۋل قاليەۆ اراسىندا وتۋگە ءتيىس. ەكەۋى دە 29 جاستا. قانداسىمىزعا قاراعاندا تىۆادان كەلگەن جىگىتتىڭ اتاق-داڭقى الدەقايدا زور ەكەنى ءمالىم. 2018 جىلى بۋداپەشتە وتكەن الەم چەمپيوناتىندا كۇمىس مەدالدى ەنشىلەگەن ول 2019 جىلى نۇر-سۇلتاندا قولاعا قول سوزدى. ازيا چەمپيونى دەگەن اتاعى تاعى بار. الايدا راسۋلدىڭ دا ء«وز ايتارى» بار. ول دا – ازيا بىرىنشىلىگىنىڭ جەڭىمپازى. ينچحوندا الاۋى تۇتانعان ازيا ويىندارىنىڭ كۇمىس جۇلدەگەرى. تەگىن بالۋاننىڭ ونداي دارەجەگە جەتپەيتىنى انىق. ونىڭ ۇستىنە, وسىدان بىرەر جىل بۇرىن جاۋاپتى جارىستاردىڭ بىرىندە قاليەۆتىڭ ساناەۆتى سان سوقتىرىپ كەتكەنى ەسىمىزدە. ەگەر باس جۇلدە ءۇشىن تالاس وسى قوس ساڭلاق اراسىندا ءوتىپ, قالعاندارى سىرتتان باقىلاپ وتىرادى دەپ ويلاساڭىزدار, قاتەلەسەسىزدەر. بۇل سالماقتا ادلان اسقاروۆ ەسىمدى دارىندى ورەن بار. جاس جولبارىس ءوزى قۇرالىپتاس بالۋاندار اراسىنداعى الەمدىك دەڭگەيدەگى جارىستاردى تەگىستەي ۇتىپ, جانكۇيەرلەردىڭ كوزايىمىنا اينالدى. بىلتىر 23 جاسقا دەيىنگىلەر اراسىنداعى الەم بىرىنشىلىگىندە 19 جاستاعى ادلان كۇمىس مەدالدى موينىنا ءىلدى. وسى جايتتىڭ بارلىعى بۇل جىگىتتىڭ شىنايى الەۋەتىن بايقاتسا كەرەك.
65 كگ سالماقتا داۋلەت نيازبەكوۆتىڭ شوقتىعى بيىك. 31 جاستاعى سىر بويىنىڭ ساڭلاعى الەم چەمپيوناتىنىڭ ەكى دۇركىن جۇلدەگەرى, ازيانىڭ ءۇش دۇركىن چەمپيونى جانە سول جارىستىڭ ءتورت دۇركىن قولا جۇلدەگەرى دەگەن اتاقتارى بار. الماتىداعى دودادا داۋلەتتىڭ باستى قارسىلاسى – ساياتبەك وقاسوۆ. 29 جاستاعى پاۆلودار وبلىسىنىڭ تۋماسى – ازيا ويىندارى مەن چەمپيوناتىندا جەڭىس تۇعىرىنا كوتەرىلگەن ساقا سپورتشى.
جانكۇيەرلەر 70 كگ سالماقتاعى مەيىرجان ءاشىروۆ پەن اماندىق باكەەۆ اراسىنداعى تارتىستى تاعاتسىزدانا كۇتۋدە. بۇعان دەيىن ءبىر-ءبىرىن الما-كەزەك ۇتىپ جۇرگەن سايىپقىراندار وسى جولى كىمنىڭ شىن مىقتى ەكەنىن انىقتايدى. ال 74 كگ سالماق دارەجەسىندە كۇش سىناساتىندار شەتىنەن «سەن تۇر, مەن اتايىندار». ولار – نۇرلان بەكجانوۆ, نۇرقوجا قايپانوۆ جانە دانيار قايسانوۆ. ۇشەۋى دە الەم چەمپيوناتىنىڭ جۇلدەگەرى اتانعان اپايتوستەر. نۇرلان بۇل اتاققا 2016 جىلى بۋداپەشتتە قول جەتكىزدى. 2019 جىلى نۇر-سۇلتاندا وتكەن دودادا نۇرقوجا كۇمىس السا, دانيار قولا مەدالدى موينىنا ءىلدى. بىراق ول كەزدە قايپانوۆ 70 كگ سالماقتا كۇرەسكەن ەدى. ودان بولەك, ەسىمدەرى اتالعان ورەندەردىڭ بارلىعى دا قۇرلىقتىق دەڭگەيدەگى جارىستاردا جاسىنداي جارقىلدادى.
79 كگ سالماقتىڭ ءفاۆوريتى عالىمجان وسەرباەۆ ەكەنى ءسوزسىز. وليمپيا ويىندارى مەن الەم چەمپيوناتىندا بەسىنشى ورىنعا تابان تىرەپ, بىرقاتار حالىقارالىق دودادا جۇلدەگەرلەر ساناتىنا قوسىلعان ساڭلاقتى تۇعىردان تايدىرۋ ءۇشىن مەيىر كوشكەنباەۆ پەن بولات ساتاەۆ سىندى جاستار بارىن سالۋعا ءتيىس.
86 كگ سالماقتا ازامات داۋلەتبەكوۆتىڭ قارقىنى كۇشتى. 26 جاستاعى سەمەي ءوڭىرىنىڭ تۋماسى ازيا چەمپيوناتىندا ەكى مارتە جەڭىس تۇعىرىنا كوتەرىلدى. ونىڭ سىرالعى قارسىلاسى ادىلەت داۋلىنباەۆ بۇل جارىسقا قاتىسپايدى. بىراق سوعان بولا ازامات بوساڭسىماۋ كەرەك. ويتكەنى قازىرگى كەزدە ەسقالي داۋلەتقازى مەن باقتيار ءىزباساروۆ باستاعان ءبىر توپ جاس ورەننىڭ تەگەۋرىنى كۇشتى.
92 كگ سالماقتا نۇرعالي نۇرعايىپ ۇلى مەن يليسحان چيلاەۆتى ءوتاپ وتۋگە بولادى. 97 كگ سالماقتا ەرعالي الىشەر مەن مامەد يبراگيموۆ بار. ال 125 كگ سالماق دارەجەسىندە ايقاساتىن ءۇش الىپتىڭ باسەكەسى كورەرمەندەر كوڭىلىنەن شىعاتىنىنا سەنىمدىمىز. ولار – ولەگ بولتين, ىڭكار ەرمۇحامبەت جانە يۋسۋپ باتىرمۇرزاەۆ.
مىنە, ەركىن كۇرەس شەبەرلەرى اراسىنداعى جارىستىڭ باستى فاۆوريتتەرى وسىلار. بىراق ءبىر شوعىر جاس جولبارىس ولاردىڭ ءىزىن باسىپ, ءوسىپ كەلە جاتقانىن دا ەستەن شىعارمايىق. ولاردىڭ دا ءوز جوسپارلارى, كوزدەگەن ماقساتتارى بار. سول سەبەپتى بىزدىكىن تەك جورامال دەپ قابىلداڭىزدار. ال سولاردىڭ اراسىنان كىمنىڭ مىقتى ەكەنىن بوز كىلەمدەگى «جان الىسىپ, جان بەرىسكەن» بەلدەسۋلەر انىقتايدى.
الماتى
