قازاقستان رەسپۋبليكاسىنىڭ تۇڭعىش پرەزيدەنتى كۇنى مەن تاۋەلسىزدىك كۇنىنە وراي 27 قاراشا كۇنى ەلورداداعى «قازمەديا» ورتالىعىنىڭ عيماراتىندا «MEDIA EXPO-2013» بۇقارالىق اقپارات قۇرالدارىنىڭ II رەسپۋبليكالىق كورمەسىنىڭ اشىلۋ سالتاناتى بولىپ ءوتتى.
كورمەنى مادەنيەت جانە اقپارات مينيسترلىگىنىڭ قولداۋىمەن «باس رەداكتورلار كلۋبى» قوعامدىق بىرلەستىگى ۇيىمداستىردى. ءىس-شارانىڭ باستى ماقساتى بۇقارالىق اقپارات قۇرالدارىنىڭ جۇمىستارىن كورسەتۋ, اقپارات سالاسىندا ساليقالى باسەكەلەستىكتى دامىتۋ, باق پەن جالپى جۇرتشىلىق اراسىندا تىعىز قارىم-قاتىناس ورناتۋ بولىپ وتىر. كورمەدە 30-عا جۋىق الدىڭعى قاتارلى رەسپۋبليكالىق جانە ايماقتىق باق وكىلدەرى ءوز ونىمدەرىن حالىق نازارىنا ۇسىندى. سالتاناتتى شاراعا سونداي-اق ەلىمىزدەگى ەلشىلىكتەردىڭ قىزمەتكەرلەرى, ۇلتتىق كومپانيالاردىڭ ءباسپاسوز حاتشىلارى, حالىقارالىق ۇيىمدار, قوعام قايراتكەرلەرى, زيالى قاۋىم مەن شىعارماشىلىق ۇيىم وكىلدەرى قاتىستى.
– ەلىمىزدىڭ تۇڭعىش پرەزيدەنتى كۇنى قارساڭىندا وتكىزىلىپ وتىرعان رەسپۋبليكالىق كورمەنىڭ اشىلۋىمەن بارشاڭىزدى قۇتتىقتايمىن. ەلباسى قازاقستاندىق بۇقارالىق اقپارات قۇرالدارىنىڭ دامۋى ءۇشىن بارلىق جاعداي جاساپ وتىر. سالتاناتتى شارا وتكىزىلىپ وتىرعان مىنا ءزاۋلىم عيمارات تا مەملەكەت باسشىسىنىڭ وتاندىق بۇقارالىق اقپارات قۇرالدارىنا دەگەن ەرەكشە نازارىن اڭعارتادى, – دەدى مادەنيەت جانە اقپارات مينيسترلىگىنىڭ جاۋاپتى حاتشىسى جاننا قۇرمانعاليەۆا «MEDIA EXPO-2013» رەسپۋبليكالىق كورمەسىنىڭ اشىلۋ راسىمىندە.
«MEDIA EXPO-2013» رەسپۋبليكالىق كورمەسى تەك ونىمدەر مەن جاسالعان جۇمىستاردى كورسەتەتىن ورىن عانا ەمەس, ول سونداي-اق وزىق تاجىريبەلەرمەن بولىسەتىن الاڭ جانە قازىرگى زامانعى قازاقستاندىق جۋرناليستيكانىڭ وزەكتى ماسەلەلەرىن تالقىلايتىن, جاس جۋرناليستەرگە ارنالعان شەبەرلىك سىنىپتارى مەن ادىستەمەلىك سەمينار وتكىزەتىن تاپتىرماس ورىن بولىپ تابىلادى.
كورمە بارىسىندا «دەلوۆوي مير» باسپاسىنان شىققان قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ تۋرالى كىتابىنىڭ تانىستىرىلىمى, «قازمەديا ورتالىعى» مەكتەبى مەن تەلەجۋرناليست گۇلناز الىمگەرەيدىڭ مەكتەپ-ستۋدياسىنىڭ تۇساۋكەسەرلەرى, بەلگىلى جۋرناليستەردىڭ شەبەرلىك سىنىپتارى وتەدى.
كورمەدە سونىمەن قاتار باق قىزمەتكەرلەرى اسەم ءان مەن قۇيقىلجىعان كۇي ورىنداپ, ءوز ونەرلەرىن ورتاعا سالدى. سالتاناتتى راسىمدە «باس رەداكتورلار كلۋبىنىڭ» پرەزيدەنتى كەنجەبولات جولدىباي ەكىنشى رەت وتكىزىلىپ وتىرعان رەسپۋبليكالىق كورمەگە قاتىسۋشىلار مەن كەلگەن قوناقتارعا ءساتتى قادام تىلەدى.
ايدار ورىسباەۆ.
