قازاقستان قۇراماسى ءۇشىن البانيادا 3 ۇپاي ولجالاۋ وتە ماڭىزدى ەدى. ويتكەنى جەرلەستەرىمىز تۋرنير كەستەسىندە سوڭعى ورىندا كەلە جاتسا دا, كەيىنگى ەكى ويىندا جەڭىسكە جەتسە, كوش باستاۋعا مۇمكىندىگى بولعان-دى. وسىنى ەسكەرگەن قازاقستان فۋتبول فەدەراتسياسىنىڭ باسشىلىعى البانيامەن وتەر ماتچ الدىندا ويىن مانەرى ۇقساس چەرنوگوريا قۇراماسىمەن جولداستىق كەزدەسۋ ۇيىمداستىردى. پودگوريتسادا ارالاس قۇراممەن جاسىل الاڭ قوجايىندارىمەن تەڭ ويناعان جەرلەستەرىمىز تيراناعا كوتەرىڭكى كوڭىل-كۇيمەن كەلدى.
چەرنوگوريامەن وتكەن ويىندا قولدانعان 3-5-2 تاكتيكاسى ناتيجە بەرگەن سوڭ, ميحال بيلەك البانيا قۇرماسىنا قارسى ءدال وسى تاكتيكانى قولداندى, بىراق الاڭعا مۇلدە جاڭا فۋتبولشىلاردى شىعاردى. باس باپكەر مەيلىنشە قورعانىسقا كوپ كوڭىل بولگەن بولسا دا, كەزدەسۋدىڭ العاشقى 15-مينۋتىنا دەيىن فۋتبولشىلارىمىز شابۋىلداۋمەن بولدى. عافۋرجان سۇيىمباەۆ پەن ءبىر اي بۇرىنعى ماتچقا قاتىسا الماعان يان ۆورگوۆسكي قارسىلاستى قوس قاپتالدان قىسپاققا الىپ, شابۋىلشىلارىمىز الباندىق قاقپاشى بەريشانى ءبىراز ساستىردى.
الايدا تەز ەس جيىپ ۇلگەرگەن البانيا فۋتبولشىلارى 16-مينۋتتا ەسەپ اشتى. لەديان مەمۋشايدىڭ ايىپ الاڭىنا اسىرعان دوبىنا ءبىزدىڭ قورعاۋشىلارعا قاراعاندا ءبىرىنشى بولىپ جەتكەن سوكول چيكاللەشي باسپەن گول سوعىپ, كومانداسىن ەسەپتە العا شىعاردى. بۇدان كەيىن دە شابۋىلىن توقتاتپاعان البانيالىقتار ستاس پوكاتيلوۆ قورعاعان قاقپانى ءبىراز تورۋىلدادى. ناتيجەسىندە ارديان يسمايلي 23-مينۋتتا ستاندارتتى جاعدايدا قۇراماسىنىڭ ەكىنشى گولىن سوقتى. الاڭ قوجايىندارىنىڭ قاقپاعا باعىتتاعان دوبىن جۇدىرىعىمەن قاعىپ جىبەرگەن پوكاتيلوۆ ابايسىزدا دوپتى قارسىلاس فۋتبولشىنىڭ اياعىنا سالىپ بەردى. قاقپاشى مەن قورعاۋشىلاردىڭ قاتەلىگىن ءتيىمدى پايدالانعان يسمايلي گول سوعۋدا ءمۇلت كەتكەن جوق. ءدال وسىنداي گول سوعىلاتىن قاربالاس ءسات ەكىنشى تايمدا دا ءبىزدىڭ قاقپا ماڭىندا ورىن الدى. ابىروي بولعاندا ول جاعدايدا قورعاۋشى نۇرالى ءالىپ دوپتى قايتارىپ, قاقپامىزدى 100 پايىزدىق گولدان قۇتقارىپ قالدى.
البانيانىڭ ءبىرىنشى تايمدا سوققان ەكى گولىنا جەرلەستەرىمىز جىلدام جاۋاپ بەردى. دوپتى الاڭ ورتاسىنان جىلدام ويىنعا قوسىپ, سول ۋاقىتتا بەريشانىڭ قاقپاسىنان الىستاپ كەتكەنىن بايقاعان ايبول ابىكەن دوپتى ءدال قاقپاعا ورتالىق الاڭنان باعىتتاپ, ەسەپ ايىرماسىن قىسقارتتى. ءسويتىپ كەزدەسۋدىڭ ءبىرىنشى بولىگى 2:1 ناتيجەسىمەن اياقتالدى.
ەكىنشى تايمدا ميحال بيلەك الاڭعا تىڭنان ويىنشىلار قوسقانىمەن, ولار قۇرامانى جەڭىلىستەن قۇتقارىپ قالا المادى. 60-مينۋتتا الەكساندر ماروچكين قاقپا الدىنداعى قاربالاستا قاتەلەسىپ قانا قويماي, قارسىلاس فۋتبولشىعا قارسى ءتارتىپ بۇزىپ, تورەشى ەش ويلانباستان ءبىزدىڭ قاقپاعا 11 مەترلىك ايىپ دوبىن بەلگىلەدى. پەنالتيدى ءساتتى ورىنداعان رەي ماناي ەسەپتى 3:1-گە جەتكىزدى. ەكىنشى تايمدا دا قازاقستان قۇراماسىنىڭ ەسەپ ايىرماسىن قىسقارتاتىن مۇمكىندىگى بولعان ەدى. الايدا عافۋرجان سۇيىمباەۆ بوس قالعان قاقپاعا گول سوعا المادى. كەزدەسۋ سوڭىنا دەيىن ەسەپ وزگەرمەي, 3:1 ەسەبى ساقتالىپ قالدى.
ماتچتان كەيىن ويىن تۋرالى پىكىر بىلدىرگەن باس باپكەر ميحال بيلەك كەزدەسۋدىڭ قيىن وتكەنىن ايتتى. «بۇگىنگى ويىندا ءۇش گول وتكىزىپ العانىمىز وتە وكىنىشتى. ەكىنشى تايمدا ەسەپ ايىرماسىن قىسقارتاتىن مۇمكىندىك سۇيىمباەۆ پەن ۆورگوۆسكيدە بولعان ەدى. وكىنىشكە قاراي, ەكەۋى دە گول سوعا المادى. ەگەر بىرەۋى گول سوعىپ, تابلوداعى ەسەپ 3:2 بولعاندا تەڭ ناتيجەگە قول جەتكىزۋىمىزگە دە بولار ما ەدى. دەسە دە البانيا بۇگىن جيناقى, ۇيىمداسقان فۋتبول كورسەتتى. جىلدامدىق جاعىنان دا, دوپتى باقىلاۋ جاعىنان دا بىزدەن ءبىر باس جوعارى تۇردى. بۇل ءبىز ءۇشىن وتە قيىن ماتچ بولدى. كەلەسى ماتچقا دەيىن قالپىمىزعا كەلۋ ءۇشىن ءۇش كۇندەي ۋاقىت بار. ليتۆامەن وتەتىن كەزدەسۋ ءبىز ءۇشىن وتە ماڭىزدى ەكەنىن بارلىعىمىز جاقسى تۇسىنەمىز. سوندىقتان ءوز الاڭىمىزدا تەك جەڭىس ءۇشىن وينايمىز», دەدى م.بيلەك.
وسىلايشا بەس ويىننىڭ ۇشەۋىندە جەڭىلگەن قازاقستان قۇراماسىنىڭ توپتا ءبىرىنشى ورىن الۋ مۇمكىندىگىنەن تۇبەگەيلى ايىرىلعانى بىلاي تۇرسىن, كەلەسى جىلى D ديۆيزيونىنا ءتۇسىپ قالۋ قاۋپى تۋىندادى. ەگەر 18 قاراشادا ءوز الاڭىمىزدا وتەتىن ويىندا ليتۆانى جەڭە الماساق, وندا ۇلتتار ليگاسىنىڭ الداعى ماۋسىمىندا اندوررا, مالتا, سان-مارينو, ليحتەنشتەين سەكىلدى قۇرامالارعا قارسىلاس اتانامىز.
