كەشە جوبا اياسىندا ساياساتتانۋشىلار مەن ساراپشىلاردىڭ قاتىسۋىمەن ديالوگ الاڭى ۇيىمداستىرىلدى. "جاستاردىڭ ەلەكتورالدى مiنەز-قۇلقىن قالىپتاستىرۋداعى ساراپشىلار قاۋىمداستىعىنىڭ ءرولi" تاقىرىبىندا وتكەن سۇحبات الاڭىنا "قازاقستاننىڭ ازاماتتىق اليانسى" زتب پرەزيدەنتى بانۋ نۇرعازيەۆا, قر پرەزيدەنتى جانىنداعى ۇلتتىق قوعامدىق كەڭەستىڭ مۇشەلەرى ايدوس سارىم مەن اندرەي چەبوتارەۆ, قر قوعام قايراتكەرى, اكادەميك ناتاليا كالاشنيكوۆا, "ساياساتتانۋ" ماماندىعى بويىنشا PhD دوكتورى ينديرا رىستينا جانە قر اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتى توراعاسىنىڭ ورىنباسارى نۇربول سەرىكبەكوۆ قاتىستى.
"قازاقستاننىڭ ازاماتتىق اليانسى" زتب پرەزيدەنتى بانۋ نۇرعازيەۆانىڭ ايتۋىنشا, قازىرگى قوعامدا جاس ساياساتتانۋشىلاردىڭ ءرولى وتە جوعارى. ولار بەلسەندى بولعان سايىن قوعام دا دامي تۇسپەك.
"ازاماتتىق قوعامى نەعۇرلىم كۇشتى ەلدەر سوعۇرلىم جىلدام داميدى. بۇل – اكسيوما. سوندىقتان, جاس ساياساتتانۋشىلار بەلسەندى جۇمىس جۇرگىزىپ قانا قويماي, جان-جاقتى ساۋاتتى بولۋى قاجەت", - دەدى بانۋ نۇرعازيەۆا.
ءوز كەزەگىندە ساياساتتانۋشى, قر پرەزيدەنتى جانىنداعى ۇلتتىق قوعامدىق كەڭەستىڭ مۇشەلەرى ايدوس سارىمنىڭ ويىنشا بۇگىنگى قوعام ساياساتتىڭ ماقساتى مەن مۇددەلەرىن شاتاستىرىپ الىپ جاتىر.
"شىنداپ كەلەتىن بولساق, ءبىزدىڭ حالىق, ءبىزدىڭ قوعام كوپ نارسەنى شاتاستىراتىن سياقتى. سونىڭ ىشىندە ساياساتتىڭ ماقساتى مەن ساياساتتىڭ كەيبىر قۇرالىن شاتاستىرىپ الادى. مىسالعا, فەيسبۋككە ويىڭدى جازۋ – ساياسات ەمەس, ساياساتتى جەتكىزۋ. ال ەگەر قانداي دا ءبىر باعدارلامانى نەمەسە زاڭدى جاساپ, حالىقتى سوعان كوندىرىپ, سونى ەكى پالاتاعا دا ماقۇلداتىپ, پرەزيدەنتتىڭ قولىن قويدىرا بىلسەڭ, مىنە, ناعىز ساياسات وسى", - دەدى ايدوس سارىم.
وسى ورايدا اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتى توراعاسىنىڭ ورىنباسارى نۇربول سەرىكبەكوۆ بۇگىندە قازاقستاندىق قوعامنىڭ كىمدەرگە كوبىرەك سەنىم ارتاتىنىن ايتىپ بەردى.
"سوتسيولوگيالىق زەرتتەۋلەرگە سۇيەنسەك, ساۋالناماعا قاتىسقانداردىڭ 48,7 پايىزى قوعامدىق پىكىر كوشباسشىلارى رەتىندە جۋرناليستەردى كورەدى ەكەن, ال 35,3 پروتسەنتى پىكىر كوشباسشىلار ساياسي قايراتكەرلەردى ساناسا, تاعى 25,9 پايىزى پىكىر كوشباسشىلارى دەپ قوعام قايراتكەرلەرىن, عالىمدار مەن ساراپشىلاردى اتاعان. ياعني, ءبىزدىڭ قوعامدا عالىمدارعا, زەرتتەۋشىلەرگە, ءتۇرلى سالانىڭ ساراپشىلارىنا سەنىم وتە جوعارى. ءبىزدىڭ مىندەتىمىز – جاستاردىڭ ساياسي ساۋاتتىلىق دەڭگەيىن ودان ءارى ارتتىرۋ جانە قازاقستاننىڭ ساراپشىلىق قوعامداستىعىن دامىتۋ. جالپى, بۇگىندە ساراپشىلار قاۋىمداستىعىنىڭ ءرولى الەمنىڭ بارلىق ەلدەرىندە, سونىڭ ىشىندە قازاقستاندا دا ارتىپ كەلەدى. سوندىقتان جاستاردىڭ ساياسي ساۋاتتىلىعىن ارتتىرۋ, ساراپشىلار قاۋىمداستىعىن دامىتۋ وزەكتى ماسەلەلەردىڭ ءبىرى بولىپ سانالادى", - دەپ اتاپ ءوتتى نۇربول سەرىكبەكوۆ.
ايتا كەتەيىك, Policy Camp» رەسپۋبليكالىق جاس ساياساتتانۋشىلاردىڭ ونلاين مەكتەبى 14 قاراشاعا دەيىن جالعاسادى. جوبا اياسىندا بۇگىن ساياساتتانۋشىلار مەن ساراپشىلاردىڭ قاتىسۋىمەن ونلاين سەمينار-ترەنينگ, ال ەرتەڭ ونلاين-دەبات ۇيىمداستىرىلادى.
