اقتوبە وبلىستىق پوليتسيا دەپارتامەنتىنىڭ باسشىسى اتىعاي ارىستانوۆتىڭ مالىمدەۋىنشە, بيىلعى جىلدىڭ ون ايىندا 100 مال ۇرلىعى تىركەلگەن. بۇل بىلتىرعى جىلمەن سالىستىرعاندا, 41,4 %-عا ازايسا دا, ورتاشا ەسەپپەن اقتوبە وبلىسىنىڭ ءار اۋدانىندا جىلىنا 8-9 مال ۇرلىعى تىركەلگەنىن كورسەتەدى. سالىستىرا كەتسەك, وتكەن جىلى وبلىس اۋماعىندا 170 مال ۇرلىعى تىركەلگەنىمەن, وسى قىلمىستاردىڭ قانشاسىنىڭ اشىلىپ, قانشا ءىستىڭ سوتقا جىبەرىلگەنى تۋرالى ناقتى مالىمەت جوق.
وڭىردە مال ۇرلىعىنىڭ بىلتىرعى جىلمەن سالىستىرعاندا ەداۋىر تومەندەۋىنە ۋچاسكەلىك پوليتسەيلەردىڭ وزدەرىنە بەكىتىلگەن اۋماقتا تۇرعىن ۇيلەر مەن شارۋا قوجالىقتارىن ارالاپ, اشىق سويلەسۋى سەبەپشى بولدى. وسى جاعداي اۋىلداعى جاسىرىن ۇرىلاردى دا ازداپ سەسكەندىرگەن سياقتى. ۋچاسكەلىك پوليتسەيلەر مالدى ورىسكە باقىلاۋسىز جىبەرۋدى توقتاتىپ, كەزەكپەن باعۋدى ۇيىمداستىرىپ, نە باقتاشى جالداۋدى قايتا-قايتا ەسكەرتىپ ءجۇر.
بيىل مال ۇرلىعى ەڭ از تىركەلگەن اۋدانداردىڭ قاتارىندا – ىرعىز اۋدانى تۇر. قاڭتار-قازان ايى ارالىعىندا ىرعىز اۋداندىق پوليتسيا بولىمىندە مال ۇرلىعىنا بايلانىستى 4 دەرەك تىركەلىپ, 2 قىلمىس اشىلعان. مالىم جوعالدى دەپ ارىزدانعان اۋدان تۇرعىنىنىڭ ورىستەن جوعالعان مالى ءبىر سايدان تابىلىپ, ول ارىزىن قايتارىپ العان. بىراق ءالى كۇنگە دەيىن ءبىر قىلمىس اشىلماي تۇر.
اۋدان پوليتسەيلەرىنىڭ حابارلاۋىنشا, مالدىڭ قولدى بولۋىنا كوپ جاعدايدا يەلەرى كىنالى. سيىر, جىلقىلارىن كۇندە تۇگەندەمەيدى, وزدەرى 8-10 كۇن ىزدەپ, تابا الماعان سوڭ بارىپ قانا پوليتسياعا ارىز بەرەدى. «مىنا توبەنىڭ تۇسىندا جۇرگەن شىعار» دەپ اپتالاپ ىزدەپ جۇرگەندە, ۇرى دا ءىزىن سۋىتىپ ۇلگەرەدى. ۋچاسكەلىك پوليتسەيلەر تۇرعىنداردان ءوز مالدارىنا قىراعىلىق تانىتىپ, ەن-تاڭبالارىن سالدىرىپ, اسىرەسە, جىلقىلاردى قۇجاتتاندىرۋدى سۇرايدى. مال قامايتىن قورالاردى جاقسىلاپ بەكىتىپ, ق ۇلىپ ورناتۋ كەرەك. اۋىل ادامدارى مالدى ۇزاق ۋاقىتقا قاراۋسىز قالدىرماي, كورشىلەرمەن بىرلەسىپ مالدىڭ كەزەگىن ۇيىمداستىرۋ كەرەك دەپ ەسەپتەيدى. قوراداعى مال تۇندە قولدى بولعان جاعدايدا پوليتسيا قىزمەتكەرلەرىنە, نە ۋچاسكەلىك پوليتسەيگە دەرەۋ حابارلاسىپ, قىلمىس ىزدەرىنە قول تيگىزبەۋ كەرەك دەپ ەسكەرتەدى. سونىڭ ىشىندە قورانىڭ قۇلپىن بۇزعان جەردەگى اياق كيىم ىزىنە, قىلمىس قۇرالىنا, شينا پروتەكتورىنىڭ ىزدەرىنە, مالدى جەتەكتەپ اكەتكەن ىزدەرگە تيمەۋ قاجەت. بۇل – ۇرىلاردى ۇستاۋدىڭ ەڭ ءبىرىنشى ايعاعى.
